ନୂଆଦିଲ୍ଲୀ : ଦେଶର ବିଭିନ୍ନ କୋଣରେ ଲୁଚି ରହିଥିବା ଅନୁପ୍ରବେଶକାରୀଙ୍କୁ ଚିହ୍ନଟ କରି ଦେଶରୁ ବାହାର କରାଯିବ। ଏଥିପାଇଁ କେନ୍ଦ୍ର ସରକାର ପ୍ରତିବଦ୍ଧ ବୋଲି ରାଜ୍ୟସଭାରେ ବୁଧବାର କହିଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା।
ଅମିତ ଶାହା କହିଛନ୍ତି ଯେ ପ୍ରତି ଇଞ୍ଚ ଭୂମିରେ ବେଆଇନ ପ୍ରବାସୀଙ୍କୁ ଚିହ୍ନଟ କରାଯାଇ ଦେଶାନ୍ତର କରାଯିବ। ଜାତୀୟ ନାଗରିକତା ପଞ୍ଜିକା (ଏନଆରସି) ଉପରେ ଆଲୋଚନା କରି ଅମିତ ଶାହା କହିଥିଲେ ଯେ ଏହା ଆସାମ ବୁଝାମଣାର ଏକ ଅଂଶ ଅଟେ। ରାଷ୍ଟ୍ରପତି ନିଜ ଅଭିଭାଷଣରେ ଏନଆରସି କଥା ଉଲ୍ଲେଖ କରିଥିଲେ। ଶାସକ ଦଳର ଘୋଷଣାପତ୍ରରେ ଏନଆରସି କଥା ରହିଛି। ତେଣୁ ଦେଶର ବିଭିନ୍ନ କୋଣ ଅନୁକୋଣରେ ରହୁଥିବା ବେଆଇନ ପ୍ରବାସୀଙ୍କୁ ଚିହ୍ନଟ କରାଯିବ। ଏହାପରେ ଅନ୍ତର୍ଜାତୀୟ ଆଇନ ଅନୁସାରେ ସେମାନଙ୍କୁ ଦେଶାନ୍ତର କରାଯିବ। ସମାଜବାଦୀ ପାର୍ଟି ସାଂସଦ ଜାଭେଦ ଅଲ୍ଲି ଖାନଙ୍କ ଏକ ପ୍ରଶ୍ନର ଉତ୍ତରରେ ଅମିତ ଶାହା ଏହା କହିଛନ୍ତି। ଏହା ପୂର୍ବରୁ ଆମାସ ଗଣ ପରିଷଦର ସାଂସଦ ବୀରେନ୍ଦ୍ର ପ୍ରସାଦ ବୈଶ୍ୟଙ୍କ ଏକ ପ୍ରଶ୍ନରେ ଗୃହ ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାୟ କହିଥିଲେ ଯେ କେନ୍ଦ୍ର ସରକାର ଆସାମରେ ଏନଆରସି ଲାଗୁ କରିବା ପାଇଁ ବଦ୍ଧ ପରିକର। ଏନଆରସି ପ୍ରକ୍ରିୟାରେ ଭାରତର କୌଣସି ନାଗରକି ଯେପରି ରହିନଯାନ୍ତି, ତାହା ସୁନିଶ୍ଚିତ କରାଯିବ ବୋଲି ନିତ୍ୟାନନ୍ଦ କହିଛନ୍ତି।
Comments are closed.