ଜୟପୁର : କୋରାପୁଟ ଜିଲାର ଜୟପୁର ପୁଲିସ ବୁଧବାର ଭୋର ସମୟରେ କୁଖ୍ୟାତ ଗଞ୍ଜେଇ ମାଫିଆଙ୍କୁ ଏନକାଉଣ୍ଟର କରିଥିବା ଜଣାପଡ଼ିଛି। ବିଶ୍ୱସ୍ତ ସୂତ୍ରରୁ ଖବର ମିଳିବା ପରେ ହାତୀଶାଳୀ ଛକ ଏବଂ ଜୟପୁର ଟାଉନ ମଝି ରାସ୍ତାରେ କୁଖ୍ୟାତ ଅପରାଧି କାବୁଲ ଖରାକୁ ପୁଲିସ ଏନକାଉଣ୍ଟର କରିଥିଲା। ପ୍ରଥମେ ଅପରାଧି ୨ ରାଉଣ୍ଡ ଗୁଳି କରିଥିଲା ଓ ଜବାବରେ ପୁଲିସ ଗୁଳି କରିଥିଲା ଯାହା ଅପରାଧିର ଡ଼ାହାଣ ଗୋଡ଼ରେ ବାଜିଥିଲା। ଫଳରେ ସେ ତଳେ ପଡ଼ିଯାଇଥିଲା। ଆହତ ହେବା ପରେ କାବୁଲକୁ ଜୟପୁରସ୍ଥିତ କୋରାପୁଟ ଜିଲା ସଦର ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। କାବୁଲ ନାଁରେ ଜୟପୁର ଟାଉନ, ସଦର ଥାନା, ବୋରିଗୁମା ଥାନା ଓ ନବରଙ୍ଗପୁର ଥାନାରେ ୫ଟି ଅପରାଧିକ ମାମଲା ରହିଛି। ଗଞ୍ଜେଇ ମାଫିଆଙ୍କ ସହ ସଂପୃକ୍ତ ହୋଇ ସେ ରାଜ୍ୟ ବାହାରକୁ ଗଞ୍ଜେଇ ଚାଲାଣ କରୁଥିବା ଜଣାପଡ଼ିଛି। ପୁଲିସ ଘଟଣାସ୍ଥଳରୁ ୭ପିସ୍ତଲ, ଗୁଳି ଆଦି ଜବତ କରିଛି।
