ପ୍ରତି ଜିଲାରେ ମାନବାଧିକାର ଅଦାଲତ ପ୍ରତିଷ୍ଠା ପ୍ରସଙ୍ଗ; କେନ୍ଦ୍ର, ରାଜ୍ୟ ସରକାରଙ୍କଠାରୁ ଜବାବ ତଲବ

ନୂୂଆଦିଲ୍ଲୀ : ମାନବାଧିକାର ଉଲ୍ଲଙ୍ଘନ ସମ୍ପର୍କିତ ମାମଲାଗୁଡ଼ିକର ତ୍ବରିତ ବିଚାର ପାଇଁ ଦେଶର ପ୍ରତି ଜିଲାରେ ମାନବାଧିକାର ଅଦାଲତ ପ୍ରତିଷ୍ଠା ଓ ଏଥିପାଇଁ ସ୍ବତନ୍ତ୍ର ବିଚାରପତି ନିଯୁକ୍ତି କରାଯିବା କ୍ଷେତ୍ରରେ ଅହେତୁକ ବିଳମ୍ବ ନେଇ ସୁପ୍ରିମକୋର୍ଟ ସୋମବାର ବିରକ୍ତି ପ୍ରକାଶ କରିଛନ୍ତି। ଏଥିସହିତ ଏହି ବିଳମ୍ବର କାରଣ ଓ ଗ୍ରହଣ କରାଯାଇଥିବା ପଦକ୍ଷେପ ସମ୍ପର୍କରେ କେନ୍ଦ୍ର ଓ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ସରକାରଙ୍କଠାରୁ ଜବାବ ତଲବ କରିଛନ୍ତି।

ଜନୈକ ଆଇନ ଛାତ୍ର ଭାବିକା ଫୋରେଙ୍କ ଦ୍ବାରା ଆଗତ ଏକ ମାମଲାର ଶୁଣାଣି ସମୟରେ ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗଇଙ୍କ ନେତୃତ୍ବାଧୀନ ପୀଠ ମାନବାଧିକାର ଆଇନର ଧାରା-୩୦ରେ ରହିଥିବା ଉପରୋକ୍ତ ବ୍ୟବସ୍ଥା ପ୍ରତି ସମସ୍ତ ସରକାରଙ୍କୁ ଚେତାଇ ଦେଇଛନ୍ତି। ଏହି ଆଇନାନୁସାରେ ପ୍ରତି ରାଜ୍ୟ ସରକାର ସ୍ଥାନୀୟ ହାଇକୋର୍ଟଙ୍କ ଅନୁମତି ବା ସହଯୋଗକ୍ରମେ ପ୍ରତି ଜିଲାରେ ଏଭଳି ଅଦାଲତ ଖୋଲିବା ଆବଶ୍ରକ। ଧାରା-୩୧ ଅନୁସାରେ ସମ୍ପୃକ୍ତ ଅଦାଲତରେ ବିଚାରପତି ନିଯୁକ୍ତ କରିବା ଆବଶ୍ୟକ। ଏହା ସତ୍ତ୍ବେ କେନ୍ଦ୍ର କିମ୍ବା କୌଣସି ରାଜ୍ୟ ସରକାର ଏ ଦିଗରେ ପଦକ୍ଷେପ ନେଉ ନାହାନ୍ତି।