ହାଇଦରାବାଦ : ଗାଧୁଆ ଘର ମଧ୍ୟରେ ଏକ ୭ବର୍ଷର ବାଳିକା ୫ଦିନ ଫସି ରହିବା ଓ ପାଣି ପିଇ ଜୀବନ ବଞ୍ଚାଇବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି। ତେଲଙ୍ଗାନାର ନାରାୟଣପେଟ ଜିଲା ମଖତାଲ ସହରରେ ଏପରି ଘଟଣା ଘଟିଛି। ପୁଲିସର କହିବା ଅନୁଯାୟୀ ବାଳିକାଟି ଘର ଛାତ ଉପରେ ଖେଳୁଥିବାବେଳେ ପଡୋଶୀଙ୍କ ଗାଧୁଆ ଘର ଭିତରକୁ ଖସି ପଡିଥିଲା। ଗାଧୁଆ ଘର ଉପରେ ଛାତ ନଥିବା ବେଳେ ପ୍ଲାଷ୍ଟିକ ଜାଲ ରହିଥିଲା। ପିଲାଟି ଗାଧୁଆ ଘର ଭିତରକୁ ଖସି ପଡିଥିବାବେଳେ ତାର କୌଣସି କ୍ଷତ ହୋଇ ନଥିଲା। କାରଣ ଗାଧୁଆ ଘେର ଟଣା ଯାଇଥିବା ରସି ଯୋଗୁଁ ତାର କିଛି କ୍ଷତ ହୋଇ ନଥିଲା। ଗାଧୁଆ ଘରଟି ବାହାର ପଟୁ ବନ୍ଧ ରହିଥିଲା ଓ ପଡୋଶୀ ଘର ଲୋକ ବୁଲାବୁଲି କରିବାକୁ ହାଇଦରାବାଦ ଯାଇଥିଲେ। ପିଲାଟି ଖସି ପଡିବା ବେଳେ ପାଟି କରିଥିଲା;ମାତ୍ର ତାର ପାଟି କାହାକୁ ଶୁଣା ଯାଇ ନଥିଲା। ପିତାମାତା ଝିଅ ନିଖୋଜ ନେଇ ପୁଲିସରେ ଅଭିଯୋଗ କରିଥିଲେ। ପୁଲିସ ଟିମ୍ ଗଠନ କରି ବିଭିନ୍ନ ଅଞ୍ଚଳ ତଲାସ କରିବା ସହ ନିକଟସ୍ଥ ଥାନାକୁ ସୂଚନା ଦେଇଥିଲା। ମାତ୍ର ପୁଲିସ ବାଳିକାଟି ସମ୍ପର୍କରେ କୌଣସି ସୁରାକ ପାଇପାରି ନଥିଲା। ବୁଧବାର ପଡୋଶୀ ଲୋକ ବୁଲାବୁଲି ସାରି ଘରକୁ ଫେରିବା ପରେ ଗାଧୁଆ ଘରେ ପିଲାଟିକୁ ଦେଇ ଆଶ୍ଚର୍ଯ୍ୟ ହୋଇପଡିଥିଲେ। ସେମାନେ ପଡୋଶୀଙ୍କୁ ଏ ସମ୍ପର୍କରେ ଜଣାଇବାରୁ ପିଲାଟି ତାଙ୍କ ଘରେ ଭଡା ରହୁଥିବା ପରିବାର ଲୋକଙ୍କ ଝିଅ ବୋଲି ଜଣାପଡିଥିଲା। ଖାଦ୍ୟ ଅଭାବରୁ ଝିଅଟି ଦୁର୍ବଳ ହୋଇପଡିବା ସହ କଥାବାର୍ତ୍ତା କରିପାରୁ ନଥିଲା। ତାକୁ ଏବେ ହସ୍ପିଟାଲରେ ଭର୍ତ୍ତି କରାଯାଇଛି।
Popular Categories
Previous article
Next article