ନୂଆଦିଲ୍ଲୀ : ଜାମ୍ମୁ-କାଶ୍ମୀରର ଶ୍ରୀନଗର ବିମାନବନ୍ଦରରେ ଅତିରିକ୍ତ ଲଗେଜକୁ ନେଇ ସେନାର ଜଣେ ଅଧିକାରୀ ସ୍ପାଇସଜେଟର ୪ ଜଣ କର୍ମଚାରୀଙ୍କ ସହିତ ମାରପିଟ୍ କରିଛନ୍ତି । ଜଣେ କର୍ମଚାରୀଙ୍କ ମେରୁଦଣ୍ଡ ହାଡ ଭାଙ୍ଗିଯାଇଛି । ଜଣଙ୍କ ନାକ ଓ ଅନ୍ୟଜଣଙ୍କ ଥୋଡିରେ ଆଘାତ ଲାଗିଛି । ଏପରିକି ଚତୁର୍ଥ କର୍ମଚାରୀ ଜଣକ ବେହୋସ ହେବା ପରେ ମଧ୍ୟ ସେନା କର୍ମଚାରୀଙ୍କ ତାଙ୍କୁ ଗୋଇଠା ମାରିବାରେ ଲାଗିଥିଲେ । ଏହି ଘଟଣାଟି ୨୬ ଜୁଲାଇରେ ଘଟିଥିଲା । କିନ୍ତୁ ମାମଲାଟି ଏବେ ସାମ୍ନାକୁ ଆସିଛି ।
ଏୟାରଲାଇନର ବୟାନ ଅନୁସାରେ ସେନାର ସେହି ଅଧିକାରୀଙ୍କୁ ନୋ ଫ୍ଲାଇଂ ତାଲିକାରେ ସାମିଲ କରାଯାଇଛି । ଅନ୍ୟପଟେ ସେନା ବୟାନ ଜାରି କରି କହିଛି କି ଭାରତୀୟ ସେନା ଅନୁଶାସନ ଓ ଆଚରଣ ମାନକ ବଜାୟ ରଖିବାରେ ପ୍ରତିବଦ୍ଧ । ଘଟଣାର ଯାଞ୍ଚ ପାଇଁ ଅଧିକାରୀଙ୍କୁ ସମ୍ପୂର୍ଣ୍ଣ ସହଯୋଗ ଦିଆଯାଉଛି । ସେନା ଅଧିକାରୀଙ୍କ ପରିଚୟ ଲେଫିନେଣ୍ଟ କର୍ଣ୍ଣଲ ରିତେଶ କୁମାର ସିଂହ ରୂପେ ଜଣାପଡିଛି ।
ଏୟାରଲାଇନର ସୂଚନା ଅନୁସାରେ ସେନା ଅଧିକାରୀ ୨ କେବିନ୍ ବ୍ୟାଗେଜ୍ ନେଇଯାଉଥିଲେ । ଏହାର ସମୁଦାୟ ଓଜନ ୧୬ କିଲୋ ଥିଲା । ଏହା ୭ କେଜି ସୀମାରୁ ୨ ଗୁଣ ଥିଲା । କ୍ରୁ ମେମ୍ବର ତାଙ୍କୁ ଏନେଇ ସୂଚନା ଦେଲେ । କିନ୍ତୁ ସେ ଅତିରିକ୍ତ ପେମେଣ୍ଟ କରିବାକୁ ମନା କରିଦେଲେ । ଧିରେ ଧିରେ ଏହାକୁ ନେଇ ଯୁକ୍ତି ତର୍କ ଶେଷରେ ସେନା କର୍ମଚାରୀ ବିମାନ କର୍ମଚାରୀଙ୍କୁ ଆକ୍ରମଣ କରିବାକୁ ଲାଗିଲେ । ଏହା ପରେ ସ୍ପାଇସଜେଟ୍ ନାଗରିକ ଉଡ୍ଡୟନ ମନ୍ତ୍ରାଳୟକୁ ପତ୍ର ଲେଖି ନିଜ କର୍ମଚାରୀଙ୍କ ଉପରେ ହୋଇଥିବା ଆକ୍ରମଣର ସୂଚନା ଦେଇ ଉଚିତ୍ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛି ।
