ଜଳିଗଲା ୯ ବଖରା; ବାଛୁରୀ ଦଗ୍ଧ

ବାସୁଦେବପୁର/ଭଣ୍ଡାରିପୋଖରୀ: ଶୁକ୍ରବାର ରାତିରେ ବାସୁଦେବପୁର ଓ ଭଣ୍ଡାରିପୋଖରୀରେ ଅଗ୍ନିକାଣ୍ଡ ଘଟି ୯ ବଖରା ଜଳିଯିବା ସହିତ ସମସ୍ତ ଆସବାବପତ୍ର ଜଳିଯାଇଥିବା ବେଳେ ବାସୁଦେବପୁରରେ ଗୋଟିଏ ବାଛୁରୀ ଜୀବନ୍ତ ଦଗ୍ଧ ହୋଇଛି। ଭଣ୍ଡାରିପୋଖରୀରେ ୫ ବଖରା ଜଳିଯାଇଥିବା ବେଳେ ବାସୁଦେବପୁରରେ ୪ ବଖରା ପୋଡ଼ି ପାଉଶଁ ହୋଇଛି।
ସୂଚନା ଅନୁଯାୟୀ; ବାସୁଦେବପୁର ବ୍ଲକସ୍ଥିତ ଗୁଆ ଗଡିଆ ମଳିକସାହି ଗ୍ରାମରେ ଶୁକ୍ରବାର ରାତିରେ ଭୟାବହ ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ ୪ବଖରା ଚାଳଛପର ଜଳିଯିବା ସହିତ ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଛି। ଏହି ନିଆଁରୁ ବର୍ତ୍ତି ପାରିନି ଗୃହପାଳିତ ପ୍ରାଣୀ। ଗୋଟିଏ ବାଛୁରୀ ଜୀବନ୍ତ ଦଗ୍ଧ ହୋଇଥିବା ବେଳେ ଗୋଟିଏ ଗାଈ ଗୁରୁତର ଆହତ ହୋଇଛି। ବିପନ୍ନଙ୍କ ନାମ କ୍ଷୀରୋଦ ମଲିକ ଓ ଭଗବାନ ମଲିକ। ତେବେ ଅଗ୍ନିକାଣ୍ଡର କାରଣ ଜଣାପଡିନି। ଉଭୟ ପରିବାର ସଦସ୍ୟ ଶୋଇଥିବା ବେଳେ ବିଳମ୍ବିତ ରାତିରେ ଅଗ୍ନିକାଣ୍ଡ ହୋଇଥିଲା। ପଡୋଶୀ ନିଆଁ ଲାଗିଥିବା ଦେଖି ଡାକ ପକାଇଥିଲେ। ବିପନ୍ନ ପରିବାର ଜୀବନ ବିକଳରେ ପଦାକୁ ବାହାରି ଆସିବାରୁ ରକ୍ଷା ପାଇଯାଇଛନ୍ତି। ଏହି ନିଆଁର ତିବ୍ରତା ଏତେ କ୍ଷିପ୍ରଥିଲା ଯେ ନିମିଷକ ମଧ୍ୟରେ ସମଗ୍ର ଘର ଜଳିଯାଇଛି। ଚାରିବଖରା ଘର ସମେତ ସମସ୍ତ ଆସବାବପତ୍ର, ଧାନ ଚାଉଳ ପୋଡି ପାଉଁଶ ହୋଇଯାଇଛି। ପଡୋଶୀ ନିଆଁକୁ ଆୟତ କରିବାକୁ ଚେଷ୍ଟା କରିବା ସହ ଦମକଳ ବାହିନୀକୁ ଖବର ଦେଇଥିଲେ। ଦମକଳ କର୍ମଚାରୀ ନିଆଁକୁ ଆୟତ୍ତ କରିଥିଲେ ମଧ୍ୟ କୌଣସି ଜିନିଷ ବର୍ତ୍ତି ପାରି ନ ଥିଲା। ସର୍ବସ୍ୱ ହରାଇ ବିପନ୍ନ ପରିବାର ଭାଙ୍ଗି ପଡିଥିବା ବେଳେ ସରକାରୀ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି।
ସେହିପରି ଭଣ୍ଡାରିପୋଖରୀ ବ୍ଲକର ରାଜେନ୍ଦ୍ରପୁର ପଞ୍ଚାୟତ ଅନ୍ତର୍ଗତ ଅଗେଇବେହେରା ଗ୍ରାମରେ ଚଳିତ ସପ୍ତାହରେ ତୃତୀୟ ଥର ପାଇଁ ଅଗ୍ନିକାଣ୍ଡ ହୋଇଛି। ଶୁକ୍ରବାର ରାତି ପ୍ରାୟ ୯ଟା ୩୦ରେ କାହ୍ନୁଚରଣ ସାହୁ ଓ ବିରଞ୍ଚି ନାରାୟଣ ସାହୁଙ୍କ ଘରେ ଅଗ୍ନିକାଣ୍ଡ ଘଟି ପାଞ୍ଚବଖରା ସହ ଗୁହାଳ ଘର ପୋଡିଯାଇଛି। ଭଣ୍ଡାରିପୋଖରୀରୁ ଦମକଳ ଆସି ଗ୍ରାମବାସୀଙ୍କ ସହାୟତାରେ ନିଅଁାକୁ ଆୟତ୍ତ କରିଥିଲା। ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇ ନାହିଁ। ସୂଚନାଯୋଗ୍ୟ; ଗତ ରବିବାର ଓ ବୁଧବାର ବିଳମ୍ବିତ ରାତିରେ ଗ୍ରାମର ହାଡିବନ୍ଧୁ ଦାସ ଓ ଶଙ୍କର ଦାସଙ୍କ ଘରେ ଅଗ୍ନିକାଣ୍ଡ ଘଟିଥିଲା।