କାଲିମେଳା : ପୁଣି ମାଲକାନଗିରି ଜିଲା ପଡିଆ ଥାନା ଅନ୍ତର୍ଗତ ଏମପିଭି-୫୯ ଗ୍ରାମର ପଡିଆ ଅଞ୍ଚଳରେ ଏକ ଲଜ୍ଜାଜନକ ଘଟଣା ଘଟିଛି। ଜଣେ ନାବାଳିକା ୫ ମାସର ଗର୍ଭବତୀ ହୋଇଥିବାର ଖବର ମିଳିଛି। ଶରୀରର ଅସ୍ବାଭାବିକ ଲକ୍ଷଣ ଦେଖି ପୀଡିତାଙ୍କୁ ତାଙ୍କ ମା’ ପଚରାଉଚରା କରିବା ପରେ ମଧ୍ୟ ସେ କିଛି କହିନଥିଲା। ପରେ ଗାଁରେ ଥିବା ମହିଳା ସ୍ୱାସ୍ଥ୍ୟକର୍ମୀଙ୍କ ଦ୍ୱାରା ପରୀକ୍ଷା କରାଯିବା ପରେ ନାବାଳିକା ଗର୍ଭବତୀ ଥିବା ଜଣାପଡିଥିଲା।ଉକ୍ତ ଘଟଣା ପାଇଁ ନାବାଳିକା ତାଙ୍କ ବାପା ଓ ଗ୍ରାମର ଅନ୍ୟ ଜଣେ ଯୁବକଙ୍କୁ ଦାୟୀ କରିଥିବା କୁହାଯାଉଛି। ଖ୍ବାପ ପଞ୍ଚାୟତ ମାଧ୍ୟମରେ ବିବାଦର ସମାଧାନ କରିବାକୁ ଗ୍ରାମବାସୀ ନିଷ୍ପତ୍ତି ନେଇଥିଲେ। କିନ୍ତୁ ଉକ୍ତ ଯୁବକର ବାପା ସେହି ବୈଠକରେ ଅନୁପସ୍ଥିତ ରହିବାରୁ ଗ୍ରାମବାସୀ କୌଣସି ସମାଧାନ କରିପାରିନଥିଲେ। ନାବାଳିକାର ନିଜ ବାପା ବିରୋଧରେ ଏଭଳି ବୟାନ ଦେବା ପରେ ପଡିଆ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛିା ଏବେ ନାବାଳିକାଟି ନ୍ୟାୟ ପାଇବା ଆଶାରେ ଚାହିଁ ବସିଥିବା ବେଳେ ପ୍ରଶାସନ ଘଟଣାର ନିରପେକ୍ଷ ତଦନ୍ତ କରି ପ୍ରକୃତ ସତ୍ୟ ଘଟଣାକୁ ସମସ୍ତଙ୍କ ସାମ୍ନାକୁ ଆଣିବାକୁ ଗ୍ରାମବାସୀ ଦାବି କରିଛନ୍ତି। ତେବେ ପୀଡିତା ନାବାଳିକାଟି ମାନସିକ ବିକଳାଙ୍ଗ ଥିବା କିଛି ଗ୍ରାମବାସୀ ପ୍ରକାଶ କରିଥିବା ଜଣାପଡିଛି। ଖବର ପାଇ କାଲିମେଳା ଚାଇଲ୍ଡ ଲାଇନ ଉକ୍ତ ଗ୍ରାମରେ ପହଞ୍ଚି ନାବାଳିକାକୁ ଉଦ୍ଧାର କରି ପଡିଆ ଥାନାକୁ ନେଇଥିଲେ। ଥାନା ପକ୍ଷରୁ ସୂଚନା ଦିଆଯାଇଥିଲା ଯେ, ଘଟଣାର ଅନୁସନ୍ଧାନ କରି ଏହାର ସତ୍ୟତା ରହିଥିଲେ ମାମଲା ରୁଜୁ କରି ତଦନ୍ତ କରାଯିବ। ପରେ ନାବାଳିକାକୁ ଚାଇଲ୍ଡ ଲାଇନ ଟିମ ପଡିଆରୁ ନେଇ ମାଲକାନଗିରି ଶିଶୁ ସୁରକ୍ଷା ସମିତି ନିକଟକୁ ହସ୍ତାନ୍ତର କରାଯାଇଥିବା ଜଣାପଡିଛିା ପଡିଆ ପୁଲିସ ଘଟଣାର ତଦନ୍ତ ଜାରି ରଖିଛି।