କେନ୍ଦୁଝରଗଡ଼: ଜ୍ଞାନୋଦୟ ଏଜୁକେସନାଲ ଟ୍ରଷ୍ଟ ପରିଚାଳିତ ସେଣ୍ଟ ଜାଭିୟର୍ସ ସ୍କୁଲ କେନ୍ଦୁଝର ଏବଂ ରଙ୍ଗଲତା ଚାରିଟେବୁଲ ଟ୍ରଷ୍ଟ ମିଳିତ ଆନୁକୂଲ୍ୟରେ କେନ୍ଦୁଝର ସହର ଉପକଣ୍ଠ ନଇଗାଁସ୍ଥିତ ସେଣ୍ଟ ଜାଭିୟର୍ସ ସ୍କୁଲ ପରିସରରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି। ଏଥିରେ ରେକର୍ଡ ସଂଖ୍ୟକ ୩୦୪ ୟୁନିଟ୍ ରକ୍ତ ସଂଗ୍ରହ କରାଯାଇ ମାନବସେବା ନିମନ୍ତେ ଜିଲା ରକ୍ତ କେନ୍ଦ୍ରକୁ ପଠାଇ ଦିଆଯାଇଛି। ଜ୍ଞାନୋଦୟ ଏଜୁକେସନାଲ ଟ୍ରଷ୍ଟର ଟ୍ରଷ୍ଟି ତଥା କାଶ୍ଭି ଗ୍ରୁପ୍ ଅଫ୍ କମ୍ପାନୀର ନିର୍ଦ୍ଦେଶିକା ସୁସ୍ମିତା ବେହେରାଙ୍କ ଜନ୍ମଦିନ ଉପଲକ୍ଷେ ଆୟୋଜିତ ଏହି ରକ୍ତଦାନ ଶିବିରକୁ ବିଶିଷ୍ଟ ସମାଜସେବୀ ଚନ୍ଦ୍ରଶେଖର ବେହେରା ମୁଖ୍ୟଅତିଥି ଭାବେ ଯୋଗଦେଇ ଉଦ୍ଘାଟନ କରିବା ଅବସରରେ ମାନବସେବା ନିମନ୍ତେ ଏଭଳି ମହତ୍ କାର୍ଯ୍ୟପାଇଁ ବିଶେଷକରି ଯୁବବର୍ଗ ଆଗେଇ ଆସିବାକୁ ଆହ୍ୱାନ ଦେଇଥିଲେ। କାଶ୍ଭି ଗ୍ରୁପ୍ ଅଫ୍ କମ୍ପାନୀର ପରିଚାଳନା ନିର୍ଦ୍ଦେଶକ ଇଂ ଦେବବ୍ରତ ବେହେରା ପ୍ରଥମେ ନିଜେ ରକ୍ତଦାନ କରି ଏହି ଶିବିରକୁ ଶୁଭାରମ୍ଭ କରିବା ସହ ରକ୍ତଦାନ କରିଥିବା ସମସ୍ତ ରକ୍ତଦାତାଙ୍କୁ ଉପସ୍ଥିତ ରହି ଉତ୍ସାହିତ କରିଥିଲେ। ଜ୍ଞାନୋଦୟ ଏଜୁକେସନାଲ ଟ୍ରଷ୍ଟର ଅନ୍ୟତମ ଟ୍ରଷ୍ଟି ସୌମ୍ୟରଞ୍ଜନ ପଣ୍ଡା, ବିଦ୍ୟାଳୟର ଅଧ୍ୟକ୍ଷ ଦିବ୍ୟକିଶୋର ପ୍ରଧାନ ଓ ପ୍ରଶାସନିକ ଅଧିକାରୀ ମୃତ୍ୟୁଞ୍ଜୟ ନାୟକ, କାଶ୍ଭି ଗ୍ରୁପ୍ କମ୍ପାନୀର ଅଧିକାରୀ ଶରତ କୁମାର ମହାନ୍ତି, ବିଭୋର ମହାନ୍ତି, ଶତୃଜିତ୍ ସାହୁ, ଶଶାଙ୍କ ଶେଖର ପଟ୍ଟନାୟକ ଓ କିରଣ ଭାରତୀ ପ୍ରମୁଖ ଉପସ୍ଥିତ ରହି ଶିବିର ପରିଚାଳନା କରିଥିଲେ। ଜିଲା ରକ୍ତ କେନ୍ଦ୍ର କେନ୍ଦୁଝରର ଡାକ୍ତର ରମାକାନ୍ତ ମୁଣ୍ଡା ଓ କର୍ମଚାରୀ ଅକ୍ଷୟ କୁମାର ସାହୁଙ୍କ ସମେତ ଅନ୍ୟ କର୍ମଚାରୀ ଉପସ୍ଥିତ ରହି ରକ୍ତ ବର୍ଗୀକରଣ ଓ ସଂଗ୍ରହରେ ସହାୟତା କରିଥିଲେ।
Popular Categories
Previous article
Next article