ଉତ୍କଳ ସଂସ୍କୃତି ବିଶ୍ବବିଦ୍ୟାଳୟରେ ଶରତ ସାହିତ୍ୟ ସମାରୋହ ଓ ନବୀନବରଣ ଉତ୍ସବ

ଭୁବନେଶ୍ବର: ଉତ୍କଳ ସଂସ୍କୃତି ବିଶ୍ବବିଦ୍ୟାଳୟରେ ଶରତ ସାହିତ୍ୟ ସମାରୋହ ଓ ନବୀନବରଣ ଉତ୍ସବ ୨୦୨୪ ଅନୁଷ୍ଠିତ ହୋଇଯାଇଛି। କୁଳପତି ପ୍ରଫେସର ପ୍ରସନ୍ନ କୁମାର ସ୍ବାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଦ୍‌ଘାଟନୀ ଉତ୍ସବରେ ବିଶିଷ୍ଟ ସାହିତ୍ୟିକ ପ୍ରଫେସର ରାମଚନ୍ଦ୍ର ବେହେରା ମୁଖ୍ୟଅତିଥି ଭାବେ ଯୋଗଦେଇଥିଲେ। ଜୀବନରେ ନିଜସ୍ବ ଆତ୍ମବିଶ୍ବାସ ଓ ଦୃଢ଼ତା ବଳରେ ଛାତ୍ରଛାତ୍ରୀମାନେ ସମସ୍ତ ପ୍ରତିବନ୍ଧକୁ ଅତିକ୍ରମ କରିବା ନିମନ୍ତେ ଏକାଗ୍ରତା ସହ ସଂକଳ୍ପ ନେଇ ଆଗେଇଲେ ସଫଳତା ସେମାନଙ୍କ କପାଳରେ ଚନ୍ଦନଟୋପା ସଦୃଶ ଝଟକିବ ବୋଲି ପ୍ରକାଶ କରିଥିଲେ।

ବିଶିଷ୍ଟ ଚିନ୍ତକ, ଲୋକସଂସ୍କୃତି ଗବେଷକ ତଥା ଦୂରଦର୍ଶନର ପ୍ରାକ୍ତନ ନିର୍ଦ୍ଦେଶକ ଡ. ଶାନ୍ତନୁକୁମାର ରଥ ମୁଖ୍ୟବକ୍ତା ଭାବେ ଯୋଗଦେଇ ସାଧନା, ଚିନ୍ତନ, ମନନ, ଆଧ୍ୟାତ୍ମିକ ଓ ଧାର୍ମିକ ସହନଶୀଳତାରୁ ହିଁ ସାଂସ୍କୃତିକ ଚେତନା ସୃଷ୍ଟି ହୁଏ ଓ ଏହି ସଂସ୍କୃତିରୁ ଅସ୍ମିତା ଆସିଥାଏ େବାଲି କହିଥିେଲ।  ଆଜିର ଯୁବପିଢ଼ି  ଆମ ଇତିହାସ, ଭାଷା ଓ ସାହିତ୍ୟକୁ ବୁଝିବା ଦ୍ବାରା ସେମାନଙ୍କ ମଧ୍ୟରେ ସାଂସ୍କୃତିକ ଗୌରବବୋଧ ସୃଷ୍ଟିହେବ ଏବଂ ଏହିପରି ସଂସ୍କୃତି ମନସ୍କତାର ବିକାଶ ଦ୍ବାରା ସଂସ୍କୃତି ବିଶ୍ବବିଦ୍ୟାଳୟର ଛାତ୍ରଛାତ୍ରୀମାନେ ନିଜର ପ୍ରତିଭା ପ୍ରଦର୍ଶନ କରିବାରେ ସଫଳ ହେବେ ବୋଲି ମତବ୍ୟକ୍ତ କରିଥିଲେ। ବିଶିଷ୍ଟ କବି ତଥା ଚିତ୍ରଶିଳ୍ପୀ ଶ୍ରୀଯୁକ୍ତ ଅତୁଲ ବଳ ସମ୍ମାନିତ ଅତିଥିଭାବେ ଯୋଗଦେଇ ଛାତ୍ରଛାତ୍ରୀମାନେ ଶୃଙ୍ଖଳା ଓ ଦୃଢ଼ ପ୍ରତିଜ୍ଞା ଦ୍ବାରା ପରିଶ୍ରମ କରିବା ସହ ସରଳ ମଣିଷପଣିଆ ଦ୍ବାରା ଜୀବନର ଲକ୍ଷ୍ୟସ୍ଥଳରେ ପହଞ୍ଚିବା ସମ୍ଭବପର ହୋଇପାରିବ ବୋଲି ପରାମର୍ଶ ଦେଇଥିଲେ। କୁଳପତି ପ୍ରଫେସର ପ୍ରସନ୍ନ କୁମାର ସ୍ବାଇଁ ତାଙ୍କ ସଭାପତିତ୍ବ ବକ୍ତବ୍ୟରେ ଭାଷା, ସାହିତ୍ୟ, ନୃତ୍ୟ, ସଂଗୀତ, ଚିତ୍ରକଳା, ସ୍ଥାପତ୍ୟ କ୍ଷେତ୍ରରେ ସମୃଦ୍ଧ ଭାରତୀୟ ଜ୍ଞାନ ପରମ୍ପରାରେ ଓ ମୂଲ୍ୟବୋଧକୁ ପାଥେୟକରି ଉତ୍କଳ ସଂସ୍କୃତି ବିଶ୍ବବିଦ୍ୟାଳୟରେ ଗୁଣାତ୍ମକ ଶିକ୍ଷା ଗ୍ରହଣକରି ଛାତ୍ରଛାତ୍ରୀମାନେ ଆଗାମୀ ଦିନରେ ଆମର ସାଂସ୍କୃତିକ ରାଷ୍ଟ୍ରଦୂତ ହୋଇପାରିବେ ବୋଲି ମତବ୍ୟକ୍ତ କରିଥିଲେ।

ଏହି ଅବସରରେ ବିଶ୍ବବିଦ୍ୟାଳୟରେ ଯୋଗଦେଇଥିବା ଭୀମଭୋଇ ଚେୟାର ପ୍ରଫେସର ଡ. ନିଶାମଣି କର ଓ ସାରଳାଦାସ ଚେୟାର ପ୍ରଫେସର ଡ.ପ୍ରେମାନନ୍ଦ ମହାପାତ୍ରଙ୍କୁ ବିଶ୍ବବିଦ୍ୟାଳୟ ପକ୍ଷରୁ କୁଳପତି ଆନୁଷ୍ଠାନିକଭାବେ ସମ୍ବର୍ଦ୍ଧିତ କରିଥିଲେ। ସହକାରୀ ପ୍ରଫେସର ଡ. ଆଶିଷ ମହାପାତ୍ର ଅତିଥି ପରିଚୟ ଓ ସ୍ବାଗତ ଭାଷଣ ଦେଇଥିବାବେଳେ କୁଳସଚିବ ଅନାମିକା ଅଧିକାରୀ ଧନ୍ୟବାଦ ଅର୍ପଣ କରିଥିଲେ। ଡ. ଜ୍ଞାନ ରଂଜନ ପଣ୍ଡା କାର୍ଯ୍ୟକ୍ରମକୁ ସଂଯୋଜନା କରିଥିଲେ। କାର୍ଯ୍ୟକ୍ରମର ଦ୍ବିତୀୟାର୍ଦ୍ଧରେ ନବୀନବରଣ ଓ ସାଂସ୍କୃତିକ କାର୍ଯ୍ୟକ୍ରମରେ ହିନ୍ଦୁସ୍ତାନୀ କଣ୍ଠ ସଂଗୀତ, ଯନ୍ତ୍ର ସଂଗୀତ, ଓଡ଼ିଶୀ କଣ୍ଠ ସଂଗୀତ, ତବଲା ବାଦନ, ଓଡ଼ିଶୀ ଓ ଛଉନୃତ୍ୟ ପରିବେଷିତ ହୋଇଥିଲା। ବିଶ୍ବବିଦ୍ୟାଳୟରେ ଯୋଗଦେଇଥିବା ନବାଗତ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହାକୁ ଶ୍ରୀ ଅବିନାଶ ରାଉତ ଓ ସୁଶ୍ରୀ ଶର୍ମିଷ୍ଠା ଷଡଙ୍ଗୀ ପରିଚାଳନା କରିଥିଲେ। ଏହି କାର୍ଯ୍ୟକ୍ରମରେ ସମସ୍ତ ବିଭାଗର ଅଧ୍ୟାପକ, ଅଧ୍ୟାପିକା ଓ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।