ଡେସ୍କ: ରୁଷ-ୟୁକ୍ରେନ ଯୁଦ୍ଧ ପରେ ରାଷ୍ଟ୍ରପତି ଭ୍ଲାଦିମିର ପୁଟିନ ପ୍ରଥମ ଥର ପାଇଁ ଭାରତ ଗସ୍ତରେ ଆସିବେ। କ୍ରେମଲିନର ମୁଖପାତ୍ର ଦିମିତ୍ରୀ ପେସ୍କୋଭ ମଙ୍ଗଳବାର ଏହି ସୂଚନା ଦେଇଛନ୍ତି। ଖୁବଶୀଘ୍ର ପୁଟିନଙ୍କ ଗସ୍ତ ତାରିଖ ଘୋଷଣା କରିବେ ବୋଲି ସେ କହିଛନ୍ତି। ଏଥିପାଇଁ ପ୍ରସ୍ତୁତି ଆରମ୍ଭ ହୋଇଥିବା ସେ ସ୍ପଷ୍ଟ କରିଛନ୍ତି।
ପ୍ରଧାନମନ୍ତ୍ରୀ ମୋଦିଙ୍କ ଦୁଇ ଦୁଇ ଥର ଋଷ ଗସ୍ତ ପରେ ଏବେ ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତକୁ ନେଇ ବିଶ୍ୱ ରାଜନୀତିରେ କଳ୍ପନା ଜଳ୍ପନା ପ୍ରକାଶ ପାଇଛି। ସେପଟେ ଆସନ୍ତା ବର୍ଷ ଋଷ-ଭାରତ ବାର୍ଷିକ ଶିଖର ସମ୍ମିଳନୀ ଅବସରରେ ପୁଟିନ୍ ଭାରତ ଆସିପାରନ୍ତି ବୋଲିସମ୍ବାଦ ସରବରାହ ସଂସ୍ଥା ପିଟିଆଇ କହିଛି।
ଚଳିତ ବର୍ଷ ପ୍ରଧାନମନ୍ତ୍ରୀ ମୋଦୀ ଦୁଇଥର ରୁଷିଆ ଗସ୍ତ କରିଛନ୍ତି। ବ୍ରିକ୍ସ ଶିଖର ସମ୍ମିଳନୀପାଇଁ ସେ ଅକ୍ଟୋବର ୨୨ରେ ଋଷ ଯାଇଥିଲେ। ଏହା ପୂର୍ବରୁ ଜୁଲାଇ ମାସରେ ମୋଦି ଦୁଇ ଦିନ ପାଇଁ ଋଷ ଗସ୍ତ କରିଥିଲେ। ଏହାପରେ ସେ ପୁଟିନଙ୍କୁ ଭାରତ ଆସିବାକୁ ନିମନ୍ତ୍ରଣ କରିଥିଲେ।
ଏହା ପୂର୍ବରୁ ୨୦୨୧ ଡିସେମ୍ବର ୬ ତାରିଖରେ ରୁଷ୍ ରାଷ୍ଟ୍ରପତି ପୁଟିନ୍ ଭାରତ ଗସ୍ତରେ ଆସିଥିଲେ। ସେ ମାତ୍ର ୪ ଘଣ୍ଟା ପାଇଁ ଭାରତ ଆସିଥିଲେ। ଏହି ସମୟରେ ଭାରତ ଓ ରୁଷ୍ ମଧ୍ୟରେ ୨୮ଟି ଚୁକ୍ତି ସ୍ୱାକ୍ଷରିତ ହୋଇଥିଲା। ୨୦୨୫ ସୁଦ୍ଧା ଦୁଇ ଦେଶ ବାର୍ଷିକ ୩୦ ବିଲିୟନ ଡଲାର ବାଣିଜ୍ୟ କରିବାକୁ ଲକ୍ଷ୍ୟ ଧାର୍ଯ୍ୟ କରିଥିଲେ।
