ବାରିପଦା: ଶିମିଳିପାଳ ଅଭୟାରଣ୍ୟର କବାଟଘାଇଠାରେ ପ୍ରସ୍ତୁତ ସ୍ବତନ୍ତ୍ର ଖୁଆଡ଼ରେ ମହାରାଷ୍ଟ୍ରରୁ ଆଣି ନିକଟରେ ଛଡାଯାଇଥିବା ଏକ ବାଘୁଣୀ ‘ଯମୁନା’ ସେଠାରେ ଏକ ବାର୍ହାକୁ ଶିକାର କରିଛି। ବାର୍ହା ଶିକାର ପରେ ଯମୁନା ପାଣି ପିଇଥିବା ଶିମିଳିପାଳ କର୍ତ୍ତୃପକ୍ଷ ସୂଚନା ଦେଇଛନ୍ତି। ବାଘୁଣୀକୁ ଶିକାର ପାଇଁ ଚିତ୍ତଲ, ହରିଣ ଓ ବାର୍ହା ଖୁଆଡ଼ ଭିତରକୁ ଛଡାଯାଇଥିଲେ ମଧ୍ୟ ସେ କେବଳ ବାର୍ହାକୁ ଶିକାର କରିଥିଲା। ୨ବର୍ଷ ୭ମାସ ବୟସ୍କା ବାଘୁଣୀଟି ଏବେ ସୁସ୍ଥ ତଥା ଶାନ୍ତ ରହିଥିବା ସହିତ ଠିକ୍ ବିଶ୍ରାମ ନେଉଥିବା ଉଲ୍ଲେଖ କରାଯାଇଛି। ଖୁଆଡ଼ରେ ସ୍ୱତନ୍ତ୍ର ସିସି କ୍ୟାମେରା ଲଗାଯାଇ ତାର ଗତିବିଧି ଉପରେ ନୀରିକ୍ଷଣ କରାଯାଉଛି। ଏହି ଖୁଆଡ଼ରେ ଅନ୍ୟ କାହାରି ପ୍ରବେଶକୁ ନିଷେଧ କରାଯାଇଛି। ସ୍ୱାଭାବିକ ଭାବେ ଯେପରି ବାଘୁଣୀଟି ଶିମିଳିପାଳର ଜଳବାୟୁ ଓ ପରିବେଶ ସହିତ ଚଳପ୍ରଚଳ କରିପାରିବ ସେ ନେଇ ବନ ବିଭାଗ ପକ୍ଷରୁ ସମସ୍ତ ପଦକ୍ଷେପ ନିଆଯାଇଛି।
ଦୁଇ ସପ୍ତାହ ପରେ ସଂପୃକ୍ତ ବାଘୁଣୀ ‘ଯମୁନା’କୁ ଟ୍ରାକ୍ଚିପ୍ ଲଗାଯାଇ ଶିମିଳିପାଳ ଅଭୟାରଣ୍ୟର ଆଭ୍ୟନ୍ତର ଅଞ୍ଚଳ (କୋର୍ ଏରିଆ)କୁ ଛଡାଯିବ । ପ୍ରଥମ ପର୍ଯ୍ୟାୟରେ ‘ଯମୁନା’କୁ ଗତ ରବିବାର ମହାରାଷ୍ଟ୍ରର ଚନ୍ଦ୍ରପୁର ଜିଲାସ୍ଥ ତାଡୋବା ଅନ୍ଧାରୀ ବ୍ୟାଘ୍ର ପ୍ରକଳ୍ପରୁ ଶିମିଳିପାଳକୁ ଅଣାଯାଇଥିଲା ଏବଂ ଦ୍ୱିତୀୟ ପର୍ଯ୍ୟାୟରେ ଅନ୍ୟତମ ବାଘୁଣୀ ‘ଗଙ୍ଗା’କୁ ଶିମିଳିପାଳ ଅଣାଯିବ। ବାଘ ବଂଶ ବୃଦ୍ଧି ପାଇଁ ଶିମିଳିପାଳ ଦେଶରେ ସର୍ବୋତ୍କୃଷ୍ଟ ସ୍ଥାନ ବୋଲି ଏନଟିସିଏ ପକ୍ଷରୁ ସ୍ପଷ୍ଟ କରାଯାଇଛି।
