ଭୁବନେଶ୍ଵର: ଭୁବନେଶ୍ଵର-ପୁରୀ ଏକ୍ସପ୍ରେସ୍ ଓ୍ବେ ବା ସବୁଜ ରାସ୍ତା ନିର୍ମାଣ କରାଯିବ। ୬ ଟିକିଆ ସବୁଜ ଏକ୍ସପ୍ରେସ୍ ସହିତ ଉଭୟ ପାର୍ଶ୍ବରେ ଦୁଇ ଟିକିଆ ସେବା ସଡକ ନିର୍ମାଣ ହେବ। ଏହି ସଡକ ନିର୍ମାଣ ପ୍ରସ୍ତାବକୁ ରାଜ୍ୟ ସରକାରଙ୍କ ପକ୍ଷରୁ ମଞ୍ଜୁର ମିଳିଥିବାବେଳେ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ ନକ୍ସା ପ୍ରସ୍ତୁତ କରିବାକୁ ପୂର୍ତ୍ତ ବିଭାଗ ଭୁବନେଶ୍ଵର ଆଞ୍ଚଳିକ ଏନଏଚଏଆଇକୁ ଚିଠି ଲେଖିଛି । ସେହିପରି ବଡବିଲ ଚଣ୍ଡିଖୋଲ ମଧ୍ୟରେ ନିର୍ମାଣ ହେବାକୁ ଥିବା ୮ ଟିକିଆ ସଡକ ପାଇଁ ମଧ୍ୟ ଡିପିଆର ପ୍ରସ୍ତୁତ କରିବାକୁ ଏନଏଚଆଇକୁ କୁହାଯାଇଛି। ଉଭୟ ରାସ୍ତାର ଡିପିଆର ତିଆରି ନେଇ ପୂର୍ତ୍ତ ବିଭାଗ ସ୍ଵତନ୍ତ୍ର ସଚିବ ଇଂ ଲକ୍ଷ୍ମୀକାନ୍ତ ପାଢୀ ଆଞ୍ଚଳିକ ଏନଏଚଏଆଇକୁ ଚିଠି ଲେଖିଛନ୍ତି। ଶ୍ରୀ ପାଢୀ ଚିଠିରେ ଉଲ୍ଲେଖ କରିଛନ୍ତି ଯେ ଚୂଡାନ୍ତ ଡିପିଆର ପ୍ରସ୍ତୁତ ପୂର୍ବରୁ ମୁଖ୍ୟ ଶାସନ ସଚିବ ଅନୁଧ୍ୟାନ କରିବେ। ପରବର୍ତ୍ତୀ ସମୟରେ ଚୂଡାନ୍ତ ଡିପିଆର ସରକାରଙ୍କ ପାଖରେ ଦାଖଲ କରାଯିବ ବୋଲି ଏନଏଚଏଆଇ କୁ କୁହାଯାଇଛି। ଭୁବନେଶ୍ଵର-ପୁରୀ ଏକ୍ସପ୍ରେସ ଓ୍ବେରେ ଘଣ୍ଟା ପ୍ରତି ୧୨୦ କିମି ବେଗରେ ଗାଡିମୋଟର ଚଳାଚଳ କରିବ । ଏକ୍ସପ୍ରେସ୍ ଓ୍ବେ ଭୁବନେଶ୍ଵର ବିମାନ ବନ୍ଦରରୁ ବାହାରି ମାଳତିପାଟପୁର ଦେଇ ପୁରୀ ବିମାନ ବନ୍ଦରକୁ ସଂଯୋଗ କରିବ। ଏହି ୫୭ କିମି ସଡକ ନିର୍ମାଣ ପ୍ରକଳ୍ପ ପାଇଁ ପ୍ରାଥମିକ ଭାବେ ୩,୫୯୨ କୋଟି ଟଙ୍କା ବ୍ୟୟ ଅଟକଳ କରାଯାଇଛି।
Comments are closed.