ଗୋପାଳପୁର : ଗତ କିଛି ମାସ ତଳେ ପରିବହନ ବିଭାଗ ପକ୍ଷରୁ ବ୍ରହ୍ମପୁର ସହରରେ ମୋ ବସ ସେବା ଚାଲୁ କରାଯାଇଥିଲା। ଏହା ମଧ୍ୟରେ ଏଠାରେ କେବଳ ଏସି ମୋ ବସ ଗୁଡ଼ିକ ଚଳପ୍ରଚଳ କରୁଥିବାବେଳେ ନନ୍ ଏସି ବସ ଗୁଡ଼ିକୁ ଏଠାରୁ ରାଉରକେଲା ପଠାଇ ଦିଆଯାଇଥିବା ଜଣେ ଅଧିକାରୀ ପ୍ରକାଶ କରିଛନ୍ତି । ବ୍ରହ୍ମପୁରରୁ ବ୍ରହ୍ମପୁର ବିଶ୍ବବିଦ୍ୟାଳୟ କ୍ୟାମ୍ପସ ପର୍ଯ୍ୟନ୍ତ ପ୍ରତିଦିନ ସକାଳୁ ରାତି ୮ଟା ପର୍ଯ୍ୟନ୍ତ ଚଳାଚଳ କରୁଛି । ଅନ୍ୟପଟେ ବିଶ୍ବବିଦ୍ୟାଳୟ କ୍ୟାମ୍ପସରୁ ଗୋପାଳପୁର ଆଉ ମାତ୍ର ୬ କିମି ଦୂର ରହିଥିବାବେଳେ ଗୋପାଳପୁରକୁ ବସ ଗଡିଥିଲେ ଅନେକ ପର୍ଯ୍ୟଟକ ଉପକୃତ ହୋଇପାରନ୍ତେ ବୋଲି ଗୋପାଳପୁରବାସୀ ଦାବି ଜଣାଇଛନ୍ତି।
ବ୍ରହ୍ମପୁର ନୂଆ ବସଷ୍ଟାଣ୍ଡ ପରିସରରୁ ପ୍ରତିଦିନ ସକାଳ ୬.୪୦ ମିନିଟରୁ ସନ୍ଧ୍ୟା ୭ ଟା ୧୫ ପର୍ଯ୍ୟନ୍ତ ପ୍ରାୟ ୩୦ ଥର ଯାଆସ କରୁଥିବାବେଳେ ବିଶ୍ବବିଦ୍ୟାଳୟ କ୍ୟାମ୍ପସରୁ ବ୍ରହ୍ମପୁର ନୂଆ ବସଷ୍ଟାଣ୍ଡ ପର୍ଯ୍ୟନ୍ତ ସକାଳ ୭ ଟା ୪୦ ରୁ ରାତି ୮ ଟା ୧୫ ପର୍ଯ୍ୟନ୍ତ ବସ ଚଳାଚଳର ବ୍ୟବସ୍ଥା କରାଯାଇଛି। ବସ ସେବାର ଶୁଭାରମ୍ଭର କିଛି ଦିନ ବ୍ରହ୍ମପୁର ସହରରେ ନନ୍ ଏସି ବସ ସହ ଏସି ବସ ଚଳାଚଳ କରୁଥିଲା। ନନ୍ ଏସି ବସରେ ଏସି ବସ ତୁଳନାରେ କମ୍ ଭଡ଼ା ମଧ୍ୟ ରହିଥିଲା। କିନ୍ତୁ ରାଉରକେଲାରେ ମୋ ବସର ଶୁଭାରମ୍ଭ ସମୟରେ ଏଠାରେ ସମସ୍ତ ନନ୍ ଏସି ବସକୁ ସେଠାକୁ ନିଆ ଯାଇଥିଲା। ଏବେ ଏଠାରେ ବ୍ରହ୍ମପୁରର ୪ ଟି ରୁଟରେ ପ୍ରାୟ ୨୦ ଖଣ୍ଡ କେବଳ ଏସି ବସ ଚଳାଚଳ କରୁଛି। ଏଣୁ ବ୍ରହ୍ମପୁର ବିଶ୍ଵବିଦ୍ୟାଳୟ ପର୍ଯ୍ୟନ୍ତ ଚଳାଚଳ କରୁଥିବା ମୋ ବସ ସେବାକୁ ଗୋପାଳପୁର ପର୍ଯ୍ୟନ୍ତ ସମ୍ପ୍ରସାରଣ କରାଇଲେ ଗୋପାଳପୁର ବୁଲିବାକୁ ଆସୁଥିବା ପର୍ଯ୍ୟଟକ ସମେତ ଅଞ୍ଚଳବାସୀ ଉପକୃତ ହୋଇ ପାରନ୍ତେ ବୋଲି ସାଧାରଣରେ ଦାବି ହେଉଛି। ଆଗାମୀ ଦିନରେ ଏହା ନେଇ ଗୋପାଳପୁର ବିଧାୟକ ତଥା ରାଜ୍ୟ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କୁ ଭେଟି ଦାବି ଜଣାଯିବ ବୋଲି ଅଞ୍ଚଳବାସୀ ମତପୋଷଣ କରିଛନ୍ତି।
ଦେଖନ୍ତୁ ଭିଡିଓ; ତେଲେଙ୍ଗା ପେଣ୍ଠରେ ମୋ ବସକୁ ଧକ୍କା ଦେଲା ଟ୍ରକ; ଜଣେ ମୃତ, ଫଶିଛନ୍ତି ଅନେକ
