ପାଟଣା: ସାହାରପଡ଼ା ବ୍ଲକ ସିଲିପଦାଠାରୁ ବାଇକଳା ପର୍ଯ୍ୟନ୍ତ ଭାୟା ଚାତରପାଣି ରାସ୍ତାର ଉନ୍ନତିକରଣ କାମ ସମ୍ପୂର୍ଣ୍ଣ ହୋଇସାରିଥିଲେ ମଧ୍ୟ ବିଲା ସଂରକ୍ଷିତ ଜଙ୍ଗଲ ଦେଇ ୨ ଶହ ମିଟର ରାସ୍ତା ପଡିବାରୁ ଜଙ୍ଗଲ ବିଭାଗରୁ ଜମି ଅଧିଗ୍ରହଣ ହୋଇ ନ ପାରି କାମ ଅଟକିଥିଲା। ଜମି ଅଧିଗ୍ରହଣ ପରେ ଏବେ ଜଣେ ଠିକାଦାର ଉକ୍ତ ଅସମ୍ପୂର୍ଣ୍ଣ କାମକୁ କଂକ୍ରିଟ ରାସ୍ତା କରାଉଛନ୍ତି। ମାତ୍ର କାମ ନିମ୍ନମାନର ହେଉଥିବା ସ୍ଥାନୀୟ ଅଞ୍ଚଳବାସୀ ଅଭିଯୋଗ କରିଛନ୍ତି।
ନିମ୍ନାମାନର କାମ ଯୋଗୁ ରାସ୍ତାଟି ସାଙ୍ଗେ ସାଙ୍ଗେ ଫାଟି ଯାଉଛି । ଫାଟିଥିବା ସ୍ଥାନରେ ସିମେଣ୍ଟ ଗୁଣ୍ଡ ପକାଇ କରଣୀ ଘସା ଯାଇ ଫଟା ଦାଗକୁ ଲିଭାଇ ଦିଆଯାଉଛି। ଅନୁସନ୍ଧାନରୁ ଜଣାଯାଇଛି ଯେ ଠିକାଦାର ମାଟି ମିଶା ବାଲି ଓ ଧଳା ରଙ୍ଗର ଚିପ୍ସ ବ୍ୟବହାର କରୁଛନ୍ତି। କାମ ପାଖରେ ବିଭାଗୀୟ ଅଧିକାରୀ ରହୁ ନାହାନ୍ତି। ଧଳା ରଙ୍ଗର ଚିପ୍ସ ନରମ ଅଟେ। ଅଧୀକ୍ଷଣ ଯନ୍ତ୍ରୀ ବିନୋଦ ବିହାରୀ ମିଶ୍ରଙ୍କୁ ପଚାରିବାରୁ ସେ କହିଲେ, ହାର୍ଡ ଷ୍ଟୋନ ଅର୍ଥାତ କଳା ପଥର ଚିପ୍ସ ବ୍ୟବହାର କରିବା ନିୟମ ରହିଛି। ମାତ୍ର ଯେଉଁଠାରେ ଏପରି ଚିପ୍ସ ନ ମିଳିବ ସେଠାରେ ଧଳା ଚିପ୍ସ ବ୍ୟବହାର କଲେ ବି ଚଳିବ। ଉକ୍ତ ଅଞ୍ଚଳରେ ବହୁ ମାତ୍ରାରେ କଳା ପଥର ଚିପ୍ସ ମିଳୁଥିଲେ ମଧ୍ୟ ଦାମୀ ଚିପ୍ସ ବ୍ୟବହାର ନ କରି କମ ମୂଲ୍ୟର ଚିପ୍ସ ବ୍ୟବହାର କରିବା ପଛରେ କି ଉଦ୍ଦେଶ୍ୟ ରହିଛି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଉକ୍ତ କାମକୁ ବନ୍ଦ କରି ତଦନ୍ତ କରିବା ସହିତ ପୁନର୍ବାର ଉପଯୁକ୍ତ ବାଲି ଚିପ୍ସ ଲଗାଇ କାମ କରିବାକୁ ଅଞ୍ଚଳବାସୀ ଦାବି କରିଛନ୍ତି।
