ଲଜ୍ଜା: ଟ୍ରେନରେ ମହିଳାଙ୍କ ଉପରେ ପରିସ୍ରା କଲେ ନିଶାସକ୍ତ ଯବାନ, ପ୍ରଧାନମନ୍ତ୍ରୀ କାର୍ଯ୍ୟାଳୟକୁ ଅଭିଯୋଗ ପଠାଇଲେ ପୀଡ଼ିତା

ସମାଜ ଡିଜିଟାଲ ଡେସ୍କ: ଟ୍ରେନରେ ଘଟିଛି ଲଜ୍ଜାଜନକ ଘଟଣା। ନିଶାସକ୍ତ ଅବସ୍ଥାରେ ଜଣେ ଯବାନ ଟ୍ରେନରେ ଯାତ୍ରା କରୁଥିବା ଜଣେ ମହିଳା ଯାତ୍ରୀଙ୍କ ଉପରେ ପରିସ୍ରା କରିଥିବା ଅଭିଯୋଗ ହୋଇଛି। ହଜରତ ନିଜାମୁଦ୍ଦିନରୁ ଛତିଶଗଡ଼଼ର ଦୁର୍ଗ ଯାଉଥିବା ଗଣ୍ଡୱାନା ଏକ୍ସପ୍ରେସରେ ଏହି ଅଭାବନୀୟ ଘଟଣା ଘଟିଛି। ମହିଳା ଯାତ୍ରୀଙ୍କ ଅଭିଯୋଗ ଉପରେ ରେଳ ସୁରକ୍ଷା ବଳ(ଆରପିଏଫ) ନୀରବ ରହିବାରୁ ପୀଡ଼ିତା ଜଣକ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ)କୁ ଅଭିଯୋଗ ପଠାଇଛନ୍ତି।

ମିଳିଥିବା ସୂଚନା ଅନୁସାରେ, ଅଭିଯୋଗକାରୀ ମହିଳାଙ୍କ ଘର ଛତିଶଗଡ଼଼ରେ। ସେ ତାଙ୍କ ସ୍ୱାମୀ ଏବଂ ସନ୍ତାନଙ୍କ ସହିତ ଟ୍ରେନର ବି-୯ ବଗିରେ ଯାତ୍ରା କରୁଥିଲେ। ଯାତ୍ରା ସମୟରେ ସେ ତଳ ସିଟ୍‌‌ରେ ଶୋଇଥିଲେ। ଗ୍ୱାଲିୟରରେ ଟ୍ରେନ ପହଞ୍ଚିବାକୁ କିଛି ସମୟ ରହିଥିଲା। ଏହି ସମୟରେ ଉପର ସିଟ୍‌‌ରେ ଯାତ୍ରା କରୁଥିବା ଜଣେ ଯବାନ ତାଙ୍କ ଉପରେ ପରିସ୍ରା କରିଥିବା ନେଇ ସେ ତାଙ୍କ ସ୍ୱାମୀଙ୍କୁ ଜଣାଇଥିଲେ। ତାଙ୍କ ସ୍ୱାମୀ ଏ ସମ୍ପର୍କରେ ଆରପିଏଫ ନିକଟରେ ଅଭିଯୋଗ କରିଥିଲେ। କିନ୍ତୁ ଆରପିଏଫ ପକ୍ଷରୁ ଏ ଦିଗରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିଲା।

ଆରପିଏଫର ଏପରି କାର୍ଯ୍ୟକଳାପ ଦେଖି ମହିଳା ଜଣକ ଅସନ୍ତୋଷ ପ୍ରକାଶ କରିବା ସହିତ ପିଏମଓ ଏବଂ ରେଳ ମନ୍ତ୍ରୀଙ୍କୁ ଅଭିଯୋଗ କରିଥିବା ସୂଚନା ମିଳିଛି। ଅନ୍ୟପଟେ ଆରପିଏଫ ପକ୍ଷରୁ ସଫେଇ ଦେଇ କୁହାଯାଇଛି ଯେ, ସେମାନେ ଅଭିଯୋଗ ପାଇବା ପରେ ଘଟଣାସ୍ଥଳକୁ ଯାଇଥିଲେ। କିନ୍ତୁ ସେଠାରେ ଅଭିଯୋଗକାରୀ ମହିଳାଙ୍କୁ ପାଇ ନ ଥିଲେ।