ନୂଆଦିଲ୍ଲୀ : ଏସୟୁଭି ସେଗମେଣ୍ଟର ରାଜା କୁହାଯାଉଥିବା ଟୋୟୋଟା ଫର୍ଚ୍ୟୁନର ବିଲକୁଲ ନୂଆ ଅନ୍ଦାଜରେ ବଜାରକୁ ଆସିଛି । ଟୋୟୋଟା କିର୍ଲୋସ୍କର ମୋଟର ଆଜି ଭାରତୀୟ ବଜାରରେ ନୂଆ ଫର୍ଚ୍ୟୁନର ଲିଡର ଏଡିଶନର ବଜାର ପ୍ରବେଶ କରାଇଛି । ଏଥିରେ କମ୍ପାନୀ ସାମାନ୍ୟ କିଛି ପରିବର୍ତ୍ତନ କରିଛି ଯାହା ରେଗୁଲାର ମଡେଲ ଅପେକ୍ଷା ଅଧିକ ସୁନ୍ଦର ଲାଗୁଛି ।
ତେବେ କମ୍ପାନୀ ଫର୍ଚ୍ୟୁନର ଲିଡରର ଦାମ୍ ଘୋଷଣା କରିନି । କମ୍ପାନୀର କହିବାନୁସାରେ ଡିଲର ସ୍ତରରେ ଏହାର ଘୋଷଣା ହେବ । ଗ୍ରାହକ ଏହି ଏସୟୁଭିକୁ ଡିଲରସିପ ମାଧ୍ୟମରେ ବୁକ୍ କରିପାରିବେ । ଏଥିପାଇଁ ଗ୍ରାହକଙ୍କୁ ବୁକିଂ ଆମାଉଣ୍ଟ ୫୦ ହଜାର ଟଙ୍କା ରାଶି ଜମା କରିବାକୁ ହେବ । କହିରଖୁଛୁ ଟୋୟୋଟା ଫର୍ଚ୍ୟୁନର ପ୍ରଥମ ଥର ୨୦୦୯ରେ ବଜାରକୁ ଆସିଥିଲା । ସେବେଠୁ ଆଜି ପର୍ଯ୍ୟନ୍ତ କମ୍ପାନୀ ଏହାର ୨,୫୧,୦୦୦ରୁ ଅଧିକ ୟୁନିଟ୍ ବିକ୍ରି କରିସାରିଛି ।
ଲିଡର ଏଡିସନକୁ ସ୍ପୋର୍ଟି ଡିଜାଇନ ଦେବା ସହିତ ଏଥିରେ ୨.୮ ଲିଟରର କ୍ଷମତା ବିଶିଷ୍ଟ ଡିଜେଲ୍ ଇଞ୍ଜିନ ଦିଆଯାଇଛି। ଏହି ଇଞ୍ଜିନ ୬ ସ୍ପିଡ୍ ମାନୁଆଲ୍ ଏବଂ ଅଟୋମେଟିକ୍ ଟ୍ରାନ୍ସମିଶନ ଗିୟରବକ୍ସ ସହିତ ଯୋଡାଯାଇଛି । ମାନୁଆଲ ମୋଡରେ ଏହି ଇଞ୍ଜିନ ୨୦୪ ପିଏସର ପାଓ୍ବର ଏବଂ ୪୨୦ ଏନଏମର ଟର୍କ ଜେନେରେଟ୍ କରିଥାଏ । ସେହିଭଳି ଅଟୋମେଟିକ୍ ଟ୍ରାନ୍ସମିଶନ ଭେରିଏଣ୍ଟ ୫୦୦ ଏନଏମର ଟର୍କ ଉତ୍ପନ କରିଥାଏ ।
