ଡେସ୍କ: ନିକଟରେ ପାକିସ୍ତାନର ଖାଇବର ପଖ୍ତୁନଖୱା ପ୍ରଦେଶରେ ହୋଇଥିବା ଆତ୍ମଘାତୀ ଆକ୍ରମଣ ଦେଶରେ କାମ କରୁଥିବା ଚୀନ ନାଗରିକଙ୍କ ଆତ୍ମବିଶ୍ୱାସକୁ ଦୋହଲାଇ ଦେଇଛି। ପାକିସ୍ତାନର ଜଣେ ସୁରକ୍ଷା ବିଶ୍ଳେଷକ କହିଛନ୍ତି ଯେ ସୁରକ୍ଷା କାରଣରୁ କିଛି ଲୋକ ଦେଶ ଛାଡିବାକୁ ଚିନ୍ତା କରୁଛନ୍ତି ବୋଲି ରିପୋର୍ଟରୁ ଜଣାପଡିଛି।
ଯଦିଓ ପାକିସ୍ତାନ ସରକାର ଦୋଷୀମାନଙ୍କୁ ନ୍ୟାୟ ଦେବା ପାଇଁ ବାରମ୍ବାର ପ୍ରତିଶ୍ରୁତି ଦେଇଆସୁଛନ୍ତି, ତଥାପି ବିଶ୍ଳେଷକ କହିଛନ୍ତି ଯେ ନିକଟରେ ଘଟିଥିବା ଏହି ଘଟଣା ବିଶ୍ୱାସକୁ ଭାଙ୍ଗି ଦେଇଛି। ପାକିସ୍ତାନୀ ସୁରକ୍ଷା ବିଶ୍ଳେଷକ ମହମ୍ମଦ ଅମୀର ରାଣା ‘ଡନ୍’ ଖବରକାଗଜରେ ଲେଖିଛନ୍ତି, ‘ଚୀନ୍ ସୋସିଆଲ ମିଡିଆରେ ଏହାକୁ ନେଇ ଅନେକ ଚର୍ଚ୍ଚା ହେଉଛି। ପାକିସ୍ତାନରେ ରହୁଥିବା ଚୀନ୍ ନାଗରିକଙ୍କ ଜୀବନ ରକ୍ଷା ପାଇଁ କଠୋର ସୁରକ୍ଷା ବ୍ୟବସ୍ଥା ଗ୍ରହଣ କରିବାକୁ ଲୋକେ ଦାବି କରୁଛନ୍ତି।
ରବିବାର ଡନ୍ ଖବରକାଗଜରେ ପ୍ରକାଶିତ ଏକ ଲେଖାରେ ମହମ୍ମଦ ଅମୀର ରାଣା ଲେଖିଛନ୍ତି ଯେ ମଙ୍ଗଳବାର ଚୀନ୍ ଇଞ୍ଜିନିୟରଙ୍କ ଗାଡ଼ି ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ୫ ଜଣ ଚୀନ୍ ନାଗରିକଙ୍କ ମୃତ୍ୟୁ ଘଟିବା ପରେ ଚୀନ୍ କମ୍ପାନିମାନେ ଅତି କମରେ ତିନୋଟି ଗୁରୁତ୍ୱପୂର୍ଣ୍ଣ ଜଳବିଦ୍ୟୁତ ପ୍ରକଳ୍ପ- ଦାସୁ ଡ୍ୟାମ୍, ଡାୟାମେର-ବାଶା ଡ୍ୟାମ୍ ଏବଂ ତାରବେଲା ଏକ୍ସଟେନ୍ସନ୍ର କାମ ବନ୍ଦ କରିଦେଇଛନ୍ତି।
୬୦ ବିଲିୟନ ଡଲାରର ଚାଇନା-ପାକିସ୍ତାନ ଅର୍ଥନୈତିକ କରିଡର ଅଧୀନରେ ଥିବା ପ୍ରକଳ୍ପରେ ହଜାର ହଜାର ଚୀନ୍ ଶ୍ରମିକ ପାକିସ୍ତାନରେ କାମ କରୁଛନ୍ତି। ପାକିସ୍ତାନ ସୁରକ୍ଷା ବିଶ୍ଳେଷକ କହିଛନ୍ତି ଯେ ଏହି ଅଞ୍ଚଳର କିଛି ବାସିନ୍ଦା ଜିନଜିଆଙ୍ଗର ଉଇଘୁର ସମ୍ପ୍ରଦାୟ ପ୍ରତି ସହାନୁଭୂତି ପ୍ରକାଶ କରନ୍ତି ଏବଂ କିଛି ଲୋକ ସେମାନଙ୍କ ଦେଶରେ ବିଦେଶୀଙ୍କ ଉପସ୍ଥିତିକୁ ନାପସନ୍ଦ କରନ୍ତି। ଏହି ଅଞ୍ଚଳରେ ଚୀନ୍ ନାଗରିକଙ୍କ ବିଷୟରେ ବିଶେଷ ଭଲ ଧାରଣା ନାହିଁ।
