ନୂଆଦିଲ୍ଲୀ: ଗୋଟିଏ ପଟେ ୩ଟି ରାଜ୍ୟରେ ନିଜ ସ୍ଥିତି ସୁଦୃଢ କରି କଂଗ୍ରେସ ସରକାର ଗଢୁଥିବାବେଳେ ଅନ୍ୟପଟେ ୩୪ବର୍ଷ ପୂରୁଣା ଶିଖ୍ ସାମ୍ପ୍ରଦାୟିକ ହିଂସା ଘଟଣାରେ ନିମ୍ନ କୋର୍ଟର ରାୟକୁ ବଦଳାଇ କଂଗ୍ରେସ ନେତା ସଜ୍ଜନକୁମାରଙ୍କୁ ଜଣେ ବ୍ୟକ୍ତିଙ୍କ ହତ୍ୟା ଅଭିଯୋଗରେ ଆଜୀବନ କାରାଦଣ୍ଡରେ ଦଣ୍ଡିତ କରିଛି ଦିଲ୍ଲୀ ଉଚ୍ଚ ନ୍ୟାୟାଳୟ।
ପ୍ରାୟ ୩୪ବର୍ଷ ପରେ ୧୯୮୪ଶିଖ୍ ସାମ୍ପ୍ରଦାୟିକ ହିଂସା ଘଟଣାରେ ନିମ୍ନ କୋର୍ଟର ରାୟକୁ ବଦଳାଇ ସଜ୍ଜନ କୁମାରଙ୍କୁ ଏଥିରେ ଦୋଷୀ ବୋଲି ରାୟ ପ୍ରଦାନ କରିଛନ୍ତିି ଦିଲ୍ଲୀ ଉଚ୍ଚ ନ୍ୟାୟାଳୟ। ସଜ୍ଜନକୁମାରଙ୍କ ନାମରେ ହିଂସାତ୍ମକ ଘଟଣାକୁ ବୃଦ୍ଧି କରିବା ଓ ଅପରାଧୀକ ଷଡ଼ଯନ୍ତ୍ର କରିବା ଅଭିଯୋଗ ଥିଲା।
ଦିଲ୍ଲୀ ଉଚ୍ଚ ନ୍ୟାୟାଳୟ ସଜ୍ଜନ କୁମାରଙ୍କ ସମେତ ବଲବାନ ଖୋଖର, କ୍ୟାପଟେନ ଭାଗମଲ ଓ ଗିରିଧାରୀଙ୍କୁ ଆଜୀବନ ଦଣ୍ଡାଦେଶ ବଳବତ୍ତର ରଖିଛନ୍ତି। ଏହା ବ୍ୟତୀତ ପ୍ରାକ୍ତନ ବିଧାୟକ ମହେନ୍ଦ୍ର ଯାଦବ ଓ କିଶନ ଖୋଖରଙ୍କ ଦଣ୍ଡାଦେଶକୁ ବୃଦ୍ଧି କରି ସେମାନଙ୍କୁ ୧୦ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି। ନିମ୍ନ କୋର୍ଟ ପୂର୍ବରୁ ଉପରୋକ୍ତ ଅଭିଯୁକ୍ତିଙ୍କୁ ୩ବର୍ଷ କାରାଦଣ୍ଡରେ ଦଣ୍ଡିତ କରିଥିଲେ।
ଶିଖ ସାମ୍ପ୍ରଦାୟିକ ହିଂସାକାଣ୍ଡ ମାମଲାରେ ଉଚ୍ଚ ନ୍ୟାୟାଳୟର ଏହି ରାୟ ପରେ ସଜ୍ଜନ କୁମାରଙ୍କୁ ୩୧ଡିସେମ୍ବର ପୂର୍ବରୁ ଆତ୍ମସମର୍ପଣ କରିବାକୁ ପଡ଼ିବ।
ପୂର୍ବରୁ ୧୯୮୪ରେ ଘଟିଥିବା ଶିଖ ସାମ୍ପ୍ରଦାୟିକ ହିଂସାକାଣ୍ଡରେ ୨୦୧୩ରେ ନିମ୍ନ କୋର୍ଟ କଂଗ୍ରେସ ନେତା ସଜ୍ଜନ କୁମାରଙ୍କୁ ପ୍ରମାଣ ଅଭାବରୁ ନିର୍ଦେଶ ବୋଲି ରାୟ ପ୍ରଦାନ କରିଥିଲା। ଏହି ଘଟଣାରେ ସଜ୍ଜନ କୁମାରଙ୍କ ସମେତ ଅନ୍ୟ ଅଭିଯୁକ୍ତଙ୍କୁ କୋର୍ଟ ପକ୍ଷରୁ ଦଣ୍ଡିତ କରାଯାଇ ଥିଲା।
ନିମ୍ନ କୋର୍ଟରେ ଦଣ୍ଡିତ ଅଭିଯୁକ୍ତି ନିମ୍ନ କୋର୍ଟର ରାୟକୁ ଚ୍ୟାଲେଞ୍ଜ କରି ଉଚ୍ଚ ନ୍ୟାୟାଳୟର ଦ୍ୱାରସ୍ତ ହୋଇଥିବାବେଳେ ସିବିଆଇ ଓ ଦଙ୍ଗା ପିଡ଼ିତଙ୍କ ପକ୍ଷରୁ ସଜ୍ଜନ କୁମାରଙ୍କୁ ନିର୍ଦୋଶ ରାୟକୁ ଚ୍ୟାଲେଞ୍ଜ କରି ଉଚ୍ଚ ନ୍ୟାୟାଳୟରେ ଗୁହାରି କରାଯାଇ ଥିଲା।
