ଚୌଦ୍ୱାର : ଚୌଦ୍ୱାରର ମୁସଲିମ ପଞ୍ଚାୟତ ଆନୁକୁଲ୍ୟରେ ମହାପୁରୁଷ ମହମ୍ମଦଙ୍କ ଜୟନ୍ତୀ ଉତ୍ସବ ଅନୁଷ୍ଠିତ ହୋଇ ଯାଇଛି । ମୁସଲିମ୍ ପଞ୍ଚାୟତ ସଭାପତି ସେକ୍ ସାଜିଦ୍ ଚାନ୍ଦଙ୍କ ପୌରହିତ୍ୟରେ ରୂପଯାତ୍ରା ପଡିଆରେ ଆୟୋଜିତ ଏହି ଉତ୍ସବରେ ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳ ଅତିଥି ଭାବେ ଯୋଗଦେଇ ହିନ୍ଦୁ ଓ ମୁସଲମାନ ସମୁଦାୟ ମଧ୍ୟରେ ସାଂପ୍ରଦାୟିକ ସଦ୍ଭାବନା ଓ ଭାଇଚାରା ସୃଷ୍ଟିକରିବା ଦିଗରେ ଚୌଦ୍ୱାର ମୁସଲିମ୍ ପଞ୍ଚାୟତର କାର୍ଯ୍ୟାବଳୀକୁ ପ୍ରଶଂସା କରିବା ସହିତ ବିଭିନ୍ନ କାର୍ଯ୍ୟକ୍ରମର ଆୟୋଜନ ମାଧ୍ୟମରେ ମୁସଲିମ୍ ପଞ୍ଚାୟତ ସମସ୍ତଙ୍କୁ ଏକ ସୁତ୍ରରେ ବାନ୍ଧି ରଖିଛି ବୋଲି ମତବ୍ୟକ୍ତ କରିଥିଲେ । ପୌରାଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲ, ଉପାଧ୍ୟକ୍ଷ ଶୁଭେନ୍ଦୁ ସାମଲ, ପୂର୍ବତନ ନଗରପାଳ ପ୍ରେମଚାନ୍ଦ ନାୟକ, କାଉନସିଲର ସବିତା ମାହାଳି, ସୁଜାତା ସାହୁ, ଅର୍ଜୁନ ପଣ୍ଡା, ବିମଲ କୁମାର ବେଉରା, ରାଜୀବ ମହାନ୍ତି, ହରିହର ପରିଡା, ବିଜୟଲକ୍ଷ୍ମୀ ମହାପାତ୍ର ପ୍ରମୁଖ ଉତ୍ସବରେ ଅତିଥି ଭାବେ ଯୋଗଦେଇଥିଲେ। ମୌଲବୀ ଉସ୍ମାନୀ ମହାପୁରୁଷଙ୍କ ମହମ୍ମଦଙ୍କ ବାଣୀ ଓ କୋରାନ୍ ପାଠ କରିଥିଲେ। ଏହି ଅବସରରେ ଉପସ୍ଥିତ ଜନତା ପରସ୍ପରକୁ ମିଠା ଖୁଆଇ ବନ୍ଧୁତାର ବାର୍ତ୍ତା ପ୍ରଚାର କରିଥିଲେ । ପରେ ପଞ୍ଚାୟତ ତରଫରୁ ଏକ ଶୋଭାଯାତ୍ରା ଯାତ୍ରା ପଡ଼ିଆରୁ ବାହାର କରାଯାଇ ଗ୍ରାମ ପରିକ୍ରମା କରାଯାଇଥିଲା । ସନ୍ଧ୍ୟାରେ ସମୁହ ନମାଜ, କୋରାନ ପାଠ ସହିତ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ପଂଚାୟତ ସମ୍ପାଦକ ନସିମ୍ଉଦ୍ଦିନ ଖାଁ, ମଦ୍ରାସା ସଂପାଦକ ସେକ୍ ସବିରଉଦ୍ଦିନ,ନସିମ ଖାନ, ସେକ ଇସ୍ମାଇଲ, ଏମ୍.ଡି.ରାଜଉଦ୍ଦିନ, ଐଶାନ ନକିବ୍ ସାହା ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ।
Comments are closed.