ନୂଆଦିଲ୍ଲୀ : ବଜ୍ରପାତକୁ ପ୍ରାକୃତିକ ବିପର୍ଯ୍ୟୟ ତାଲିକାଭୁକ୍ତ କରିବା ଲାଗି କେତେକ ରାଜ୍ୟ ସରକାର ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏନଡିଏମଏ)ଙ୍କ ନିକଟରେ ଦାବି କରିଛନ୍ତି। ବଜ୍ରପାତ ଜନିତ ମୃତ୍ୟୁସଂଖ୍ୟା ଅନ୍ୟ ବିପର୍ଯ୍ୟୟ ଜନିତ ମୃତ୍ୟୁସଂଖ୍ୟାକୁ ଅତିକ୍ରମ କରିଯାଉଥିବାରୁ ଏପରି ଦାବି କରାଯାଇଛି। ତେବେ ଏନଡିଏମଏ ସଦସ୍ୟ ସଚିବ କମଲ କିଶୋର କହିଛନ୍ତି ଯେ ବଜ୍ରପାତକୁ ପ୍ରାକୃତିକ ବିପର୍ଯ୍ୟୟ ତାଲିକାଭୁକ୍ତ କରିବା ଲାଗି ଆବଶ୍ୟକ ନୀତି ଓ ବିଚାରବିମର୍ଶ ଦରକାର। ବର୍ତ୍ତମାନର ନିୟମ ଅନୁଯାୟୀ ବାତ୍ୟା, ମରୁଡି, ଭୂମିକମ୍ପ, ଅଗ୍ନିକାଣ୍ଡ, ବନ୍ୟା, ସୁନାମୀ, ଝଡତୋଫାନ, ମାଟି ଅତଡା ଧସିବା, ବରଫ ଅତଡା ଧସିବା, ବାଦଲଫଟା ବର୍ଷା, କୀଟପତଙ୍ଗ ଆକ୍ରମଣ, ଶୀତ ଓ ଶୀତ ଲହରିକୁ ପ୍ରାକୃତିକ ବିପର୍ଯ୍ୟୟ ତାଲିକାଭୁକ୍ତ କରାଯାଇଛି। ପ୍ରାକୃତିକ ବିପର୍ଯ୍ୟୟ ତାଲିକାଭୁକ୍ତ ଅଘଟଣରେ ୭୫% କ୍ଷତିପୂରଣ କେନ୍ଦ୍ର ସରକାର ଦେଇଥାନ୍ତି। ସରକାରଙ୍କ ଆକଳନ ଅନୁଯାୟୀ ବଜ୍ରପାତ ଯୋଗୁଁ ପ୍ରତିବର୍ଷ ଦେଶରେ ପ୍ରାୟ ୨୫୦୦ ଲୋକଙ୍କର ମୃତ୍ୟୁ ହେଉଛି।
Comments are closed.