ନୂଆଦିଲ୍ଲୀ : ସଙ୍କଟ ସମୟରେ ସିବିଆଇକୁ ପୁନଃ ବ୍ୟବସ୍ଥିତ କରିବା ଲାଗି ଏହାର ଅନ୍ତରୀଣ ନିର୍ଦେଶକ ଭାବେ ନିଯୁକ୍ତ ୧୯୮୬ ବ୍ୟାଚ୍ ଆଇପିଏସ୍ ଏମ୍. ନାଗେଶ୍ୱର ରାଓ ମଧ୍ୟ ଦୁର୍ନୀତି ଅଭିଯୋଗର କଳାଛିଟାରୁ ବର୍ତ୍ତି ନାହାନ୍ତି। ଅଭିଯୋଗ ଅନୁସାରେ ରାଓ ଚେନ୍ନଇ ଜୋନ ମୁଖ୍ୟ ଥିବା ବେଳେ ଚେନ୍ନଇ କମ୍ପାନୀ ଭିଜିଏନ୍ ଡେଭଲପରସକୁ କମ୍ ମୂଲ୍ୟରେ ଭାରତୀୟ ଷ୍ଟେଟ୍ ବ୍ୟାଙ୍କର ଜମି ବିକ୍ରୟ କରାଯାଇଥିଲା। ଏହାଦ୍ୱାରା ବ୍ୟାପକ ରାଜସ୍ୱ ହାନୀ ହୋଇଥିଲେ ମଧ୍ୟ ରାଓ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିଲେ। ଏହି କାରଣରୁ ଡିଏମ୍କେ ନେତା ଏମ୍. କେ. ଷ୍ଟାଲିନ୍ ସିବିଆଇ ଅଧିକାରୀ ଭାବେ ରାଓଙ୍କ ପଦୋନ୍ନତିକୁ ବିରୋଧ କରିଥିଲେ। ସେହିଭଳି ରାଓ ସିବିଆଇ ଯୁଗ୍ମ ନିର୍ଦେଶକ ଥିବା ବେଳେ ଚଳିତବର୍ଷ ପ୍ରାରମ୍ଭରେ ‘ସମୟପୂର୍ବରୁ ନାଗେଶ୍ୱର ରାଓଙ୍କ ସ୍ୱଦେଶ ଫରାଇ ଦିଆଯାଛି’ ଶୀର୍ଷକ ଏକ ଫାଇଲ ନିରାପତ୍ତା ସମ୍ବନ୍ଧୀୟ କ୍ୟାବିନେଟ୍ କମିଟି ନିକଟକୁ ପଠାଯାଇଥିଲା। ବିଭିନ୍ନ ଅଭିଯୋଗକୁ ଭିତ୍ତି କରି ରାଓଙ୍କୁ ଓଡ଼ିଶା ଫେରାଇ ଦିଆଯାଇଥିବା ସେଥିରେ ଉଲ୍ଲେଖ ଥିଲା। ଅଭିଯୋଗ ଅନୁଯାୟୀ ରାଓ ଦିଲ୍ଲୀସ୍ଥିତ ନିଜ ବରିଷ୍ଠ ଅଧିକାରୀଙ୍କ ସହ ଯୋଗାଯୋଗ ବନ୍ଦ କରିଦେଇଥିଲେ। ଆୟକର ବିଭାଗର ୭୦ ଜଣ ଅଧିକାରୀଙ୍କ ବିରୋଧରେ ଥିବା ମାମଲାର ତଦନ୍ତରେ ରାଓ ବାଧା ସୃଷ୍ଟି କରିଥିଲେ। ଏପରିକି ନିଜର ବାର୍ଷିକ ଆୟକର ସମ୍ବନ୍ଧରେ ମିଥ୍ୟା ତଥ୍ୟ ଉପସ୍ଥାପନ କରିଥିବା ନେଇ ମଧ୍ୟ ତାଙ୍କ ବିରୋଧରେ ଅଭିଯୋଗ ରହିଛି।
Popular Categories
Previous article
Next article