ଭବାନୀପାଟଣା: ଇଡି ଖୋଲିବ ନାଗ ପେଡ଼ି । ଲେଡି ବ୍ଲାକମେଲର ଅର୍ଚ୍ଚନା ନାଗର ଫିଟିବ ଗୁମର । ଅର୍ଚ୍ଚନା ନାଗର ଆୟର ସୂତ୍ର ଜାଣିବାକୁ କଳାହାଣ୍ଡି କେସିଙ୍ଗାରେ ପହଞ୍ଚିଛି ଇଡି । ଦୁଇଟି ଗାଡିରେ ଇଡିର ଟିମ୍ କେସିଙ୍ଗାରେ ପହଞ୍ଚି ଅର୍ଚ୍ଚନାର ପୈତୃକ ଘରେ ତନାଘନା ଚଳାଇଛନ୍ତି ।
ଏହି ଟିମରେ ସ୍ଵତନ୍ତ୍ର ପୁଲିସ ସହ ପ୍ରାୟ ୧୪ ଜଣ ଥିବା ଜଣାପଡିଛି । ଅର୍ଚ୍ଚନାର ଘର ୧୦୦ ମିଟର ମଧ୍ୟରେ କାହାକୁ ଛଡ଼ାଯାଉନି । ବାହାରେ ପୁଲିସ ମଧ୍ୟ ଜଗିରହିଛି । ତେବେ ସ୍ଥାନୀୟ ପୁଲିସ ପାଖରେ ଏନେଇ କୌଣସି ସୂଚନା ନାହିଁ ବୋଲି ଜଣାପଡ଼ିଛି । ସକାଳୁ ସକାଳୁ ଇଡି ଟିମ୍ ପହଞ୍ଚିବା ପରେ କେସିଙ୍ଗାରେ ଏକ ପ୍ରକାରର ଅନ୍ୟ ମାହଲ ସୃଷ୍ଟି ହୋଇଛି ।
ସୂଚନା ଥାଉକି, ପୂର୍ବରୁ କମିସନରେଟ ପୁଲିସ ଯେଉଁ ଅଭିଯୋଗ ଆଧାରରେ ମାମଲା ରୁଜୁ କରିଥିଲା ସେ ସଂକ୍ରାନ୍ତରେ ୨ଟି ଏତଲା କପି ଇଡିକୁ ହସ୍ତାନ୍ତର କରାଯାଇଥିଲା। ସେହି ମାମଲାର ତଦନ୍ତ ଆଜିଠୁ ଇଡି ଆରମ୍ଭ କରିଛି । କଳାହାଣ୍ଡି କେସିଙ୍ଗାରେ ପହଞ୍ଚିଛି ଇଡି ଅର୍ଚ୍ଚନାଙ୍କ ପୈତୃକ ଘରେ ତନାଘନା ଚଳାଇଛି । ସକାଳୁ ସକାଳୁ ଇଡିର ଏହି ତନାଘନା କ୍ଷମତା ଅଳିନ୍ଦରେ କମ୍ପନ ସୃଷ୍ଟି କରିଛି । କାରଣ ନାଗ-ଫାଶରେ ଏକାଧିକ ରାଜନେତା, ମନ୍ତ୍ରୀ, ବ୍ୟୁରୋକ୍ରାଟ, ପୁଲିସ ଅଧିକାରୀ ଓ ମୁଷ୍ଟିମେୟ ବ୍ୟକ୍ତିଙ୍କ ସମ୍ପୃକ୍ତି ଥିବା ଚର୍ଚ୍ଚା ଚାଲିଛି।
ଏପରିକି ଅର୍ଚ୍ଚନାଙ୍କ ସହ କିଛି ନେତା, ମନ୍ତ୍ରୀ ଓ ପୁଲିସ ଫଟୋ ଲୋକ ଲୋଚନକୁ ଆସି ସାରିଛି। ନାଗ-ଫାଶରେ ପଡ଼ିଥିବା କେତେକ ହେଭିୱେଟ ଅର୍ଚ୍ଚନା ଓ ସ୍ବାମୀ ଜଗବନ୍ଧୁ ଚାନ୍ଦକୁ କୋଟି କୋଟି ଟଙ୍କା ଦେଇଥିବା ଅଭିଯୋଗ ହୋଇଆସୁଛି। ଟଙ୍କା ଦେଇଥିବା ବ୍ୟକ୍ତିମାନେ ଇଡି ଜେରାର ସମ୍ମୁଖୀନ ହେବା ନିଶ୍ଚିତ ହୋଇଛି। ଏତଲା କପି ପାଇବା ପରେ ଇଡି ପକ୍ଷରୁ ସ୍ବତନ୍ତ୍ର ଦଳ ଗଠନ କରାଯାଇଛି। ଉକ୍ତ ଦଳ ଚାନ୍ଦ ଦମ୍ପତିଙ୍କ ବେଆଇନ ଆର୍ଥିକ କାରବାର ଖୋଳତାଡ଼ କରିବା ଆରମ୍ଭ କରିଛି ।
Comments are closed.