ବିଲ ଭିତରୁ ୧୯ ବର୍ଷର ଯୁବକଙ୍କ ଅର୍ଧଦଗ୍ଧ ମୃତଦେହ ଉଦ୍ଧାର

ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ଡିଣ୍ଡିରା ଗାଁ ପଞ୍ଚାୟତର ଗଞ୍ଜୁଖୋଲ ଗ୍ରାମ ନିକଟରେ ଥିବା ଏକ ବିଲରୁ ଜଣେ ୧୯ ବର୍ଷର ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ଜବତ ହୋଇଛି ।ପୁଲିସ୍‌ ଏନେଇ ଖବର ପାଇବା ପରେ ମୃତଦେହଟିକୁ ଉଦ୍ଧାର କରିଛି । ଏହି ଘଟଣା ସମଗ୍ର  ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ମୃତ ଯୁବକ ଜଣକ କନ୍ଧମାଳ ଜିଲ୍ଲା  ଗୋଛାପଡା ଥାନା ଅନ୍ତର୍ଗତ କ୍ରାଣ୍ଡିବାଲି ଗ୍ରାମର ବଉଦୁ କହଁରଙ୍କ ସାନ ପୁଅ ବିଭୁଦତ୍ତ କହଁର (୧୯) ବୋଲି ଜଣାପଡିଛି । ତେବେ ମୃତ ଯୁବକ ଜଣକ ଫିରିଙ୍ଗିଆ ପଞ୍ଚାୟତ ମହାବିଦ୍ୟାଳୟର ଯୁକ୍ତଦୁଇ ଦ୍ୱିତୀୟ ବର୍ଷର ଛାତ୍ର । ସେ ଫିରିଙ୍ଗିଆର ଏକ ସାହିରେ ଘର ଭଡାନେଇ ରହୁଥିଲେ ।

ଶନିବାର ସକାଳୁ ସକାଳୁ ଗଞ୍ଜୁଖୋଲ ଗ୍ରାମର କିଛି ଲୋକ ଗ୍ରାମ ନିକଟ ବିଲକୁ ଶୌଚହେବା ପାଇଁ ଯାଇଥିବା ବେଳେ ଯୁବକଙ୍କ ଅର୍ଧଦଗ୍ଧ ମୃତଦେହ ବିଲ ମଧ୍ୟରେ ପଡିଥିବା ଦେଖି ଫିରିଙ୍ଗିଆ ଥାନାକୁ ଖବର ଦେଇଥିଲେ । ଖବରପାଇ ଫିରିଙ୍ଗିଆ ଥାନା ଅଧିକାରୀ ପି ଶ୍ୟାମସୁନ୍ଦର ରାଓ , ଅତିରିକ୍ତ ଥାନା ଅଧିକାରୀ ପ୍ରଦିପ କୁମାର ରାଉଳ, ଏଏସଆଇ ପ୍ରମୋଦ କୁମାର ପ୍ରଧାନଙ୍କ ସହ ଏକ ଟିମ ଘଟଣାସ୍ଥଳରେ ପହଞ୍ଚି ପ୍ରଥମେ ତଦନ୍ତ ଆରମ୍ଭ କରିଥିଲ।। ପରେ ଫୁଲବାଣୀ ସଦର ଏସଡିପିଓ ସୁପ୍ରସନ ମଲିକଙ୍କ ସହ ସାଇଣ୍ଟିଫିକ୍‌ ଟିମ୍‌ ମଧ୍ୟ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିଲେ । ମୃତଦେହ ପଡିଥିବା ବିଲଠାରୁ ପ୍ରାୟ ୨୦୦ ମିଟର ଦୂରରେ ପୁଲିସ ମୃତ ଯୁବକଙ୍କ ପୋଷାକ, ମୋବାଇଲ, ପୋଡିଯାଇଥିବା ମନିପର୍ସ , ଏଟିଏମ କାର୍ଡ ସହ କିଛି ପୋଡି ଯଇଥିବା ଟଙ୍କା ଓ ଅନ୍ୟକିଛି ସାମଗ୍ରୀ ମଧ୍ୟ ଜବତ କରିଛି ।

ଏହି ଘଟଣା ସଂପୃକ୍ତ ଅଞ୍ଚଳରେ ଆଲୋଚନାର ବିଷୟ ହୋଇଥିବା ବେଳେ ପାରିପାର୍ଶ୍ବିକ ପରିସ୍ଥିତିରୁ ଏହା ଏକ ସୁପରିକଲ୍ପିତ ହତ୍ୟାକାଣ୍ଡ ବୋଲି ଅନୁମାନ କରାଯାଉଛି । ପରିବାର ପକ୍ଷରୁ ମଧ୍ୟ ଏହା ଏକ ହତ୍ୟା କାଣ୍ଡ ବୋଲି ଅଭିଯୋଗ ହୋଇଛି । ମୃତକଙ୍କ ବଡଭାଇ ବିଛନ୍ଦ କହଁର ଫିରିଙ୍ଗିଆ ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୁଲିସ ହତ୍ୟା ମାମାଲା ରୁଜୁ କରିବା ସହ ଶବକୁ ଜବତ କରି ଫୁଲବାଣୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଦେଇଛି । ଏନେଇ ତଦନ୍ତ ଜାରି ରହିଥିବା ବେଳେ, ଘଟଣାର ସତ୍ୟତା ପଦାକୁ ଆସିବ ବୋଲି ଥାନା ଅଧିକାରୀ ପି ଶ୍ୟାମସୁନ୍ଦର ରାଓ ସୂଚନା ଦେଇଛନ୍ତି ।