ବଲାଙ୍ଗିର: ୧୭ ବର୍ଷରୁ କମ୍ ମହିଳା ବିଶ୍ୱକପ୍ ଫୁଟବଲ ଓଡ଼ିଶାରେ ମଙ୍ଗଳବାର ଆରମ୍ଭ ହୋଇଛି । ଫୁଟବଲକୁ ପ୍ରୋତ୍ସାହିତ କରିବା ପାଇଁ ବଲାଙ୍ଗିର ଜିଲାରେ ୧୭ ବର୍ଷରୁ କମ୍ ବାଳକ ଓ ବାଳିକା ଆନ୍ତଃ ବିଦ୍ୟାଳୟ ଫୁଟବଲ ସ୍ଥାନୀୟ ଗାନ୍ଧୀ ଷ୍ଟାଡିୟମରେ ଉଦ୍ଘାଟିତ ହୋଇଛି । ଜିଲା ଶିକ୍ଷାଧିକାରୀ ଧ୍ରୁବଚରଣ ବେହେରାଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ଘାଟନୀ ସଭାରେ ଜିଲାପାଳ ଚଞ୍ଚଳ ରାଣା ମୁଖ୍ୟଅତିଥି ଭାବେ କ୍ରୀଡ଼ା ପତାକା ଉତ୍ତୋଳନ କରିଥିଲେ । ଅନ୍ୟତମ ଅତିଥି ଭାବେ ସମ୍ବଲପୁର ବିଦ୍ୟାଳୟ ଓ ଗଣଶିକ୍ଷା ବିଭାଗର ଆଞ୍ଚଳିକ ନିର୍ଦ୍ଦେଶକ ବିକାଶ ଚନ୍ଦ୍ର ପ୍ରଧାନ, ଅତିରିକ୍ତ ଜିଲା ଶିକ୍ଷାଧିକାରୀ କେଶବ ମେହେର, ଶାରିରୀକ ଶିକ୍ଷା ନିରୀକ୍ଷକ ଅନ୍ତର୍ଯ୍ୟାମୀ ବିଶ୍ୱାଳ ମଞ୍ଚାସୀନ ଥିଲେ । ଜିଲା ବିଜ୍ଞାନ ନିରୀକ୍ଷକ ସରୋଜ କୁମାର ନାୟକ ମଞ୍ଚ ପରିଚାଳନା କରିଥିଲେ ।
ମଙ୍ଗଳବାର ବାଳକ ବିଭାଗରେ ବଲାଙ୍ଗିର ଓ ଲୋଇସିଂହା ବ୍ଲକ ମଧ୍ୟରେ ଖେଳ ଯାଇଥିଲା । ବଲାଙ୍ଗିର ପକ୍ଷରୁ ପ୍ରବୀଣ ଲାକ୍ରା ୨ଟି ଗୋଲ୍ ଓ ଲୋଇସିଂହାରୁ ଲିପୁନ ବିଶି ଓ ସୌମ୍ୟରଞ୍ଜନ ଧରୁଆ ଗୋଲ୍ ଦେଇଥିଲେ । ଉଭୟ ଦଳ ୨ଟି ଗୋଲ୍ ଦେଇଥିବାରୁ ଟାଇବ୍ରେକରରେ ବଲାଙ୍ଗିର ଦଳ ୩-୧ରେ ବିଜୟୀ ହୋଇଥିଲା । ସେହିପରି ବାଳିକା ବିଭାଗରେ ସଇଁନ୍ତଲା ଓ ଦେଓଗାଁ ବ୍ଲକ ମଧ୍ୟରେ ଫୁଟବଲ ଖେଳାଯାଇଥିଲା । ସଇଁନ୍ତଲା ପକ୍ଷରୁ ଦୋଳେଶ୍ୱରୀ ବୁଡେକ ୨ଟି ଓ ଗୀତାଞ୍ଜଳି ମାଝୀ ଗୋଟିଏ ଗୋଲ୍ କରି ବିଜୟୀ ହୋଇଥିଲେ । ଖେଳକୁ ରାଜେନ୍ଦ୍ର ସେଠ, ସୁଦର୍ଶନ ସେଠ, ଆଶିଷ ଦେବ ସା, ଉପେନ୍ଦ୍ର ଚନ୍ଦନ, ଦୋଳଗୋବିନ୍ଦ ମୁଣ୍ଡା, ରାଜେନ୍ଦ୍ର ଧରୁଆ, ବୈକୁଣ୍ଠ ଜେନା, ସୁଶାନ୍ତ ନାଗ, ସସ୍ମିତାରାଣୀ ମିଶ୍ର ପରିଚାଳନା କରିଥିଲେ । ନରସିଂହ ସ୍ୱାମୀ ନାଇଡୁ ମ୍ୟାଚ କମିଶନର୍ ଦାୟିତ୍ୱ ତୁଲାଇଥିଲେ । ବୁଧୁବାର ବାଳକ ବିଭାଗରେ ବଲାଙ୍ଗିର ଓ ପାଟଣାଗଡ ବ୍ଳକ, ବାଳିକା ବିଭାଗରେ ସଇଁନ୍ତଲା-ବଲାଙ୍ଗିର ମଧ୍ୟରେ ଫୁଟବଲ ଖେଳାଯିବ । ସୂଚନାଯୋଗ୍ୟ ଯେ, ଆସନ୍ତା ୧୭ ତାରିଖ ଯାଏ ଆନ୍ତଃ ବିଦ୍ୟାଳୟ ଫୁଟବଲ ଚାଲିବ ।
