ନର୍ଲା:ଆଜି ସଂଧ୍ୟା ସମୟରେ ନର୍ଲା-ମ.ରାମପୁର ରାଜ୍ୟ ରାଜରାସ୍ତା ତୁଳାପଡା ବଣାମୁଣ୍ଡା କ୍ଷୁଦ୍ର ଜଳ ସେଚନ ନିକଟରେ ପୃଥକ ପୃଥକ ଭାବେ ଦୁଇଟି ଦୁର୍ଘଟଣା ଘଟିଛି। ନର୍ଲା ପଞ୍ଚାୟତ ଅଧିନସ୍ଥ ଡଙ୍ଗରମାଲ ଗ୍ରାମର ଜନୈକ ଯୁବକ ବାଇକ ଚଳେଇ ମ.ରାମପୁର ପଟୁ ଆସୁଥିବା ବେଳେ ତୁଳାପଡା ଗ୍ରାମର ଦଶରଥ ପଧାନଙ୍କୁ ଧକ୍କା ଦେଇ ନିୟନ୍ତ୍ରଣ ହରେଇ ବାଇକ ଚାଳକ ଦୁର୍ଘଟଣାଗ୍ରସ୍ତ ହୋଇଥିଲା ଏବଂ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଦଶରଥ ପଧାନ ଗୁରୁତର ଆହତ ହୋଇ ଡାକ୍ତରଖାନାକୁ ସ୍ଥାନାନ୍ତରିତ ହୋଇଛନ୍ତି । ତେବେ ମୃତକଙ୍କ ସଂପର୍କିୟ ଘଟଣାସ୍ଥଳକୁ ତରତର ହୋଇ ଆସୁଥିବା ସମୟରେ ତୁଳାପଡା ଗ୍ରାମର ଦୁଃଖିଶ୍ୟାମ ନାୟକ ଓ ଶୁକଦେବ ନାୟକଙ୍କ ସହ ଦୁର୍ଘଟଣା ହୋଇଥିଲା। ଫଳରେ ତିନି ଜଣ ଆହତ ହୋଇଛନ୍ତି । ଘଟଣାସ୍ଥଳରେ ପୁଲିସ ପହଞ୍ଚିବା ପୂର୍ବରୁ ମୃତକଙ୍କ ଜୀବନ ଥିବା ଆଶଙ୍କା କରି ନର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିବା ସହ ମୁଣ୍ଡ ପଛରେ ଗଭୀର ଆଘାତ ହୋଇଥିବା ଡାକ୍ତର ସନତ କୁମାର ଶତପଥି ପ୍ରକାଶ କରିଛନ୍ତି । ୧୦୮କୁ ଫୋନ କରି ଅନେକ ସମୟ ପ୍ରତୀକ୍ଷା କରିଥିଲେ ହେଁ ଜରୁରୀକାଳୀନ ଆମ୍ବୁଲାନ୍ସ ପହଞ୍ଚି ପାରିନଥିଲା। ତେଣୁ ମୃତକଙ୍କ ପରିବାର ସ୍ବତନ୍ତ୍ର ଗାଡି କରି ଜୀବନ ବଞ୍ଚେଇବା ଆଶାରେ ଡାକ୍ତରଖାନାକୁ ନେଇଥିଲେ। କେମିତି ଦୁର୍ଘଟଣା ଘଟିଲା ତାହାକୁ ନେଇ ନର୍ଲା ପୁଲିସ ତଦନ୍ତ କରୁଛି।
Comments are closed.