ରାଇରଙ୍ଗପୁର: ଶୁକ୍ରବାର ଠାରୁ ରାଇରଙ୍ଗପୁର ସହର ସମେତ ସମଗ୍ର ବାମନଘାଟୀ ଉପଖଣ୍ଡରେ ଲଘୁଚାପ ଜନିତ ପ୍ରବଳ ଲଗାଣ ବର୍ଷା ବିତ୍ପାତ ଘଟି ଅନେକ କ୍ଷୟକ୍ଷତି ହୋଇଥିବାର ସୂଚନା ମିଳିଛି । ଆଜି ଶନିବାର ବାମନଘାଟି ଉପଖଣ୍ଡରେ ତିନୋଟି ପୃଥକ ଘଟଣାରେ ୪ଜଣଙ୍କ ମୃତ୍ୟୁ ହୋଇଯାଇଛି । ପ୍ରଥମତଃ ବିଶୋଇ ବ୍ଲକର ଲୁହାକାନୀ ପଞ୍ଚାୟତର ବିଶୋଇ ଥାନା ଅନ୍ତର୍ଗତ ଭୋଳବେଡା ଗ୍ରାମରେ ମାଟିକାନ୍ଥ ଭୁଶୁଡି ଦୁଇ ନାବାଳିକା ଭଉଣୀଙ୍କ ଦୁଃଖଦ ମୃତ୍ୟୁ ଘଟିଛି । ଦ୍ବିତୀୟ ଘଟଣାରେ ରାଇରଙ୍ଗପୁର ଟାଉନଥାନା ଅନ୍ତର୍ଗତ ସହରର ଅମଲା ଲେନରେ ଗତକାଲି ରାତିରୁ ଗଛ ଉପୁଡି ରାସ୍ତା ଅବରୋଧ ହୋଇଥିଲା । ଅଗ୍ନିଶମ, ପୌରପରିଷଦ, ପୁଲିସ, ପ୍ରଶାସନ ତରଫରୁ ଏହାକୁ କାଟି ରାସ୍ତା ଅବରୋଧ ନହଟାଇବା ଫଳରେ ବାଡେଇ ହୋଇ ଜଣେ ବ୍ୟକ୍ତିଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି ।
ମୃତକଙ୍କ ନାମ ହେଉଛି ଶୁକଦେବ ମହାନ୍ତ, ପିତା ଉପେନ୍ଦ୍ର ମହାନ୍ତ । ତାଙ୍କ ଘର ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ଛଣପାଳ ଗ୍ରାମରେ । ସେହିପରି ତୃତୀୟ ଘଟଣାରେ ସହରର ରେଳବାଇ ଫାଟକ ପେଟ୍ରୋଲ ପମ୍ପ ସମ୍ମୁଖରେ ଏକ ମହିନ୍ଦ୍ରା ପିକଅପ ଜଣେ ସ୍କୁଟି ଆରୋହୀ କ୍ଷୀରୋଦ ମହାନ୍ତଙ୍କୁ ଜୋରଦାର ଧକ୍କା ଦେଇ ଘୋଷାରି ନେଇଯିବାରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା । ମୃତକଙ୍କ ରକ୍ତାକ୍ତ ଶବକୁ ସ୍ଥାନୀୟ ଲୋକମାନେ ବେଶ କସରତ କରି ଗାଡି ତଳୁ ଉଦ୍ଧାର କରିଥିଲେ । ଉତ୍ୟକ୍ତ ଲୋକେ ଗାଡିର ଡ୍ରାଇଭରକୁ କାବୁକରି ପୁଲିସର ଜିମା ଦେଇଥିଲେ । ଏହି ଘଟଣା ପରେ ଘଟଣାସ୍ଥଳରେ ବେଶ ଉତ୍ତେଜନା ପ୍ରକାଶ ପାଇଥିଲା । ରାଇରଙ୍ଗପୁର ଏସଡିପିଓ ରତିକାନ୍ତ ଗିରି ସଦଳବଳେ ପହଞ୍ଚି ଶବ ଉଦ୍ଧାର କରି ବ୍ୟବଚ୍ଛେଦ କରିବା ପାଇଁ ଡାକ୍ତରଖାନାକୁ ପଠାଇ ଥିଲେ । ଘଟଣା ଘଟାଇଥିବା ପିକ ଅପ ଗାଡିକୁ ଥାନାକୁ ନେଇଥିଲେ । ଡ୍ରାଇଭରକୁ ଅଟକ ରଖାଯାଇଛି ।
Comments are closed.