ଭୁବନେଶ୍ୱର: ଗଭୀର ଅବପାତ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜାରି ରହିଛି । ଗତ ୨୪ଘଣ୍ଟା ମଧ୍ୟରେ ଅନେକ ସ୍ଥାନରେ ପ୍ରବଳ ବର୍ଷା ହୋଇଥିବା ବେଳେ ବାଲେଶ୍ୱରର ଭୋଗରାଇରେ ସର୍ବାଧିକ ୨୨୬ମିମି ବର୍ଷା ହୋଇଥିବା ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ରାଜ୍ୟର ୨ଟି ସ୍ଥାନରେ ଅତ୍ୟନ୍ତ ପ୍ରବଳ, ୨୭ଟି ସ୍ଥାନରେ ଅତି ପ୍ରବଳ ଓ ୪୯ଟି ସ୍ଥାନରେ ପ୍ରବଳ ବର୍ଷା ରେକର୍ଡ ହୋଇଛି । ଭୋଗରାଇରେ ସର୍ବାଧିକ ୨୨୬ମିମି ବର୍ଷା ହୋଇଥିବା ବେଳେ କନ୍ଧମାଳ ଜିଲ୍ଲାର ଫିରିଙ୍ଗିଆରେ ୨୧୧.୦ ମିମି, ମୟୂରଭଞ୍ଜର ନୱାନାରେ ୧୯୬.୪ ମିମି, କନ୍ଧମାଳ ଜିଲ୍ଲାର ଟିକାବାଲିରେ ୧୯୬.୦ ମିମି, ଚକାପଡ଼ରେ ୧୯୦.୦ମିମି ବର୍ଷା ହୋଇଛି ।
ସେହିପରି ରାଜ୍ୟର ଅନେକ ସ୍ଥାନରେ ପ୍ରବଳ ବର୍ଷା ହୋଇଥିବା କହିଛି ପାଣିପାଗ କେନ୍ଦ୍ର । ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ରର ସୂଚନା ଅନୁଯାୟୀ ଆଜି ବି ରାଜ୍ୟରେ ପ୍ରବଳ ବର୍ଷା ଜାରି ରହିବ । ଅନ୍ୟପଟେ ଦୀଘାରେ ସ୍ଥଳଭାଗ ଛୁଇଁବା ପରେ ଛତିଶଗଡ଼ ମୁହାଁ ହେଉଛି ଗଭୀର ଅବପାତ । ପ୍ରଭାବରେ ବାଲେଶ୍ୱର ସମେତ ଉତ୍ତର ଓଡ଼ିଶାରେ ପ୍ରବଳ ବର୍ଷା ହେବାନେଇ ପାଣିପାଗ କେନ୍ଦ୍ର ପକ୍ଷରୁ କହାଯାଇଛି । ସବୁଠାରୁ ବଡ଼ କଥା ହେଉଛି ଗତ ୨ରୁ ୩ଦିନର ବିରତି ପରେ ରାଜ୍ୟରେ ବର୍ଷା ଜାରି ରହିଥିବାରୁ ହୀରାକୁଦର ଜଳସ୍ତର କମିବାରେ ଲାଗିଛି । ବର୍ତ୍ତମାନ ୧୬ଟି ଗେଟ୍ ଦେଇ ବନ୍ୟାପାଣି ନିଷ୍କାସନ ହେଉଥିବା ବେଳେ ହୀରାକୁଦରେ ଜଳସ୍ତର ୬୨୦.୭୧ ଫୁଟ୍ ରହିଛି ।
ଡ୍ୟାମରୁ ୩ଲକ୍ଷ ୫୪ହଜାର ୬୦୪ କ୍ୟୁସେକ ପାଣି ନିଷ୍କାସିତ ହେଉଛି । ହୀରାକୁଦକୁ ୧ଲକ୍ଷ ୮୩ହଜାର ୩୮୧ ଘନଫୁଟ ଜଳ ପ୍ରବେଶ କରୁଛି । ଖାଲି ହୀରାକୁଦ ନୁହେଁ ସବୁଠି ବନ୍ୟାଜଳ ସ୍ତର ଖସୁଥିବା ଦେଖିବାକୁ ମିଳିଛି । ଖଇରମାଳରେ ୫ଲକ୍ଷ ୧୪ହଜାର କ୍ୟୁସେକ୍ ଜଳ ପ୍ରବାହିତ ହେଉଛି । ମୁଣ୍ଡୁଳିରେ ୮ଲକ୍ଷ ୫୭ହଜାର ୯୧୫କ୍ୟୁସେକ ପାଣି ପାସ୍ କରୁଥିବା ବେଳେ ବରମୂଳରେ ୭ଲକ୍ଷ ୪୮ ହଜାର କ୍ୟୁସେକ ଜଳ ପ୍ରବାହିତ ହେଉଛି ।
Comments are closed.