ସମ୍ବଲପୁର, – ପଶ୍ଚିମ ଓଡିଶାରେ କୋଶଳ ରାଜ୍ୟ ଦାବି ଆନ୍ଦୋଳନ ପୁର୍ନବାର ତେଜୁଛି । ଶୁକ୍ରବାର ପଶ୍ଚିମ ଓଡିଶାର ୪ଟି ସ୍ଥାନରେ ପୂର୍ବ ଓଡିଶାକୁ ସଂଯୋଗ କରୁଥିବା ରାଜରାସ୍ତାକୁ କୋଶଳ ସଙ୍ଗଠନ ଗୁଡିକ ପକ୍ଷରୁ ଅର୍ଥନୈତିକ ଅବରୋଧ କରିବା ସହିତ ସମ୍ବଲପୁର ଠାରେ ଉତ୍ତରାଞ୍ଚଳ ରାଜସ୍ୱ ଆୟୁକ୍ତ ଙ୍କ କାର୍ଯ୍ୟାଳୟକୁ ଘେରାଓ କରାଯାଇଥିଲା । ଗତ ୫ ତାରିଖରେ ରାଜଧାନୀ ଭୁବନେଶ୍ୱର ଠାରେ ବିଧାନସଭା ଘେରାଉ କରାଯିବା ସହିତ ମୁଖ୍ୟମନ୍ତ୍ରୀଙ୍କୁ ସମ୍ବିଧାନ ଭିତ୍ତିରେ ସ୍ୱତନ୍ତ୍ର କୋଶଲ ରାଜ୍ୟ ଗଠନ ପାଇଁ ବିଧାନସଭାରେ ପ୍ରସ୍ତାବ ଆଣିବା ପାଇଁ ଦାବି କରାଯାଇଥିଲା ।
କିନ୍ତୁ ଆଜି ପର୍ଯ୍ୟନ୍ତ ଏ ବାବଦରେ କୌଣସି ପଦକ୍ଷେପ ନିଆ ନ ଯିବାରୁ ଆଜି କୋଶଲ ସେନା ପକ୍ଷରୁ ସମ୍ବଲପୁର ଠାରେ ଏକ ରାଲି ଆୟୋଜିତ କରାଯାଇ ରାଜସ୍ୱ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଏହି ପରିପ୍ରେକ୍ଷୀରେ ସ୍ଥାନୀୟ ଧନୁପାଲି ରୁ ଗୋବିନ୍ଦତୋଲା, ଜେଲ ଛକ, ମ୍ୟୁନିସିପାଲିଟି ଛକ ଦେଇ ରାଜସ୍ୱ ଆୟୁକ୍ତଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଏକ ରାଲି ଆସିଥିଲା । ଏ ପର୍ଯ୍ୟନ୍ତ କୋଶଲର ୨ କୋଟି ଜନତା ମରି ନାହାନ୍ତି, ଜୀବିତ ଅଛନ୍ତି ବୋଲି ଜଣାଇବାକୁ ନିଆରା ଢ଼ଙ୍ଗରେ ଶୋଭାଯାତ୍ରାରେ ଏକ କୋକେଇରେ ଆସି କୋଶଲ ସେନାର ଅର୍ପଣ ଦାସ ଉଠି ବସି ଦାବିପତ୍ର ପ୍ରଦାନ କରିଥିଲେ । ଏଥି ସହ କୋଶଲ ମୁକ୍ତି ମୋର୍ଚ୍ଚା, କୋଶଲ ସେନା ଆଦି ସଙ୍ଗଠନର କର୍ମୀ ମାନେ ସମ୍ବଲପୁର ସ୍ଥିତ ମୋଚିବାହାଲ, ରାଉରକେଲା, ବୌଦ୍ଧ ଓ ଭବାନୀପାଟଣା ଠାରେ ରାଜପଥ ଅବରୋଧ କରିଥିଲେ ।
