ରେଙ୍ଗାଲିକ୍ୟାମ୍ପ: ବରଗଡ଼ ଜିଲ୍ଲା ଶିକ୍ଷା ଅଧିକାରୀ ଶ୍ରୀ ମିତ୍ରଭାନୁ କଚ୍ଛପ ଅତାବିରା ବ୍ଲକର ବିଭିନ୍ନ ବିଦ୍ୟାଳୟ ଗୁଡ଼ିକୁ ପରିଦର୍ଶନ କରିଛନ୍ତି । ସେ ପ୍ରଥମେ ଅତାବିରା ୱାର୍ଡ ନଂ୬ ଭୋଇପୁରାରେ ନିର୍ମିତ ହେଉଥିବା ଆଦର୍ଶ ବିଦ୍ୟାଳୟକୁ ପରିଦର୍ଶନ କରି ସମସ୍ତ ତଥ୍ୟ ପଚାରିବୁଝିଥିଲେ । ପରେ ସେ ଲହଣ୍ଡାର ପ୍ରାଥମିକ ବିଦ୍ୟାଳୟ ଓ ଉଚ୍ଚ ବିଦ୍ୟାଳୟ, କଳା ଡୁଙ୍ଗୁରି ସ୍କୁଲ୍, ଯାଙ୍ଗେଡ୍ ହାଇସ୍କୁଲ ଓ ପୁଟପୁଟ ପାଲି ପ୍ରାଥମିକ ବିଦ୍ୟାଳୟକୁ ପରିଦର୍ଶନ କରିଥିଲେ । ପୁଟପୁଟ ପାଲି ସ୍କୁଲ୍ ସହ ଅନ୍ୟ ସମସ୍ତ ବିଦ୍ୟାଳୟ ଗୁଡିକରେ ସବୁ କିଛି ଠିକ୍ ଠାକ୍ ଭାବରେ ଚାଲିଥିବା ସେ ପ୍ରକାଶ କରିଥିଲେ । ପୁଟ ପୁଟ ପାଲିରେ ସ୍କୁଲ୍ ଗୃହ ଠିକ୍ ନଥିବା ବେଳେ ଦୁଇଜଣ ଶିକ୍ଷକ ପଦବୀ ମଧ୍ୟ ଖାଲି ପଡ଼ିଥିବା ସେ କହିଥିଲେ । ଏହି ସ୍କୁଲର ସମସ୍ୟା ଗୁଡ଼ିକର ସମାଧାନ ଦିଗରେ ସେ ତତ୍ପରତାର ସହିତ ବିଧିବଦ୍ଧ ପଦକ୍ଷେପ ନେବେ ବୋଲି କହିଛନ୍ତି । ବିଦ୍ୟାଳୟ ଗୁଡିକରେ ଶିକ୍ଷା ବ୍ୟବସ୍ଥାର ତଦାରଖ କରିବା ପାଇଁ ସେ ଯେଉଁ ଆକସ୍ମିକ ପରିଦର୍ଶନ କରିଥିଲେ , ପ୍ରକୃତରେ ତାହା ସ୍ଵାଗତ ଯୋଗ୍ୟ ଅଟେ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି। ଶିକ୍ଷା ଅଧିକାରୀଙ୍କ ଏମିତି ଆକସ୍ମିକ ପରିଦର୍ଶନ ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ସତର୍କ କରୁଛି ନିଜ ନିଜର ଦାୟିତ୍ଵକୁ ଠିକ୍ ଭାବରେ ପାଳନ କରିବାକୁ । କର୍ତ୍ତବ୍ୟରେ ଢିଲା ନହୋଇ ଶିକ୍ଷାଦାନ ପଦ୍ଧତିକୁ ଉନ୍ନତ ମାନର କରିବା ସହ ଏକ ସୁନ୍ଦର ଶୈକ୍ଷିକ ପରିବେଶ ସୃଷ୍ଟି କରିବା ପାଇଁ ସେ ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ନିର୍ଦ୍ଦେଶ ଦେଇଥିଲେ । ଏହି ପରିଦର୍ଶନ ବେଳେ ସେ ଅନେକ ସ୍କୁଲରେ ଛାତ୍ରଛାତ୍ରୀ ମାନଙ୍କୁ ଅନେକ ଶିକ୍ଷଣୀୟ ଉପଦେଶ ଦେବା ସହ ତାଙ୍କୁ ପାଠ ମଧ୍ୟ ପଢ଼ାଇଥିଲେ ଯାହା ଛାତ୍ରଛାତ୍ରୀ ମାନଙ୍କର ବେଶ ବୋଧଗମ୍ୟ ହୋଇଥିଲା । ବିଶେଷ କରି ବିଦ୍ୟାଳୟ ଗୁଡ଼ିକର ପରିବେଶ, ମଧ୍ୟାହ୍ନ ଭୋଜନ, ଛାତ୍ରଛାତ୍ରୀଙ୍କ ଉପସ୍ଥାନ, ସ୍କୁଲ୍ ଘରର ପରିସ୍ଥିତି ଏବଂ ଶିକ୍ଷକ ଶିକ୍ଷୟିତ୍ରୀ ମାନେ ନିୟମିତ ଭାବରେ ବିଦ୍ୟାଳୟକୁ ଆସୁଛନ୍ତି ନାନାହିଁ ତାହା ଯାଞ୍ଚ କରିଥିଲେ ।
Comments are closed.