ପିପିଲି : ଡକାୟତି ଯୋଜନା କରୁଥିବା ବେଳେ ୫ଜଣ ଅଭିଯୁକ୍ତଙ୍କୁ ପିପିଲି ପୁଲିସ ଗିରଫ କରିବାରେ ସଫଳ ହୋଇଛି । ସେମାନଙ୍କ ନିକଟରୁ ଗୋଟିଏ ଖଣ୍ଡା, ଗୋଟିଏ ଛୁରୀ, ଲଙ୍କାଗୁଣ୍ଡ ପ୍ୟାକେଟ୍, ମଦବୋତଲ ଓ ଅଧାଜଳା ମହମବତୀକୁ ପୁଲିସ ଜବତ କରିଛି । ଗିରଫ ଅଭିଯୁକ୍ତମାନେ ହେଲେ ପିପିଲି ଥାନା ଅନ୍ତର୍ଗତ ଦିନଉଦ୍ଧାରଣ ଗ୍ରାମର ଭୀମସେନ ବେହେରା ଓରଫ ଭୀମା (୨୧), ସୁନିଲ କୁମାର ବେହେରା ଓରଫ ମୁନା (୨୫), ସଙ୍ଗଳାଇଶାସନ ଗ୍ରାମର ରାଜକିଶୋର ମହନ୍ତ ଓରଫ ପପୁ (୨୪), ବିନାୟକପୁର ଗ୍ରାମର ସୁବାଷ ବେହେରା ଓରଫ ଟୁଲିଆ (୨୦) ଓ ବଳଙ୍ଗା ଥାନା ଅନ୍ତର୍ଗତ ଘୋଡକା ଗ୍ରାମର ଦୀପକ ସେଠୀ (୨୩)। ସମସ୍ତ ଅଭିଯୁକ୍ତଙ୍କୁ ଆଜି ପିପିଲି କୋର୍ଟ ଚାଲାଣ କରାଯାଇଥିବା ବେଳେ ଜାମିନ ଆବେଦନ ଖାରଜ ହୋଇଯିବାରୁ ସେମାନଙ୍କୁ ନିମାପଡା ସ୍ଥିତ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଥିବା ସୂଚନା ମିଳିଛି।
ସୂଚନା ଅନୁଯାଇ, ୮ ତାରିଖ ରାତିରେ ପୁବା ଗ୍ରାମ ନିକଟରେ ଥିବା ଏକ ନିକାଞ୍ଚନ ସ୍ଥାନରେ ୫ଜଣ ଅପରାଧି ମାରଣାସ୍ତ୍ର ସହ ବସିରହି ଡକାୟତି ପାଇଁ ଯୋଜନା କରୁଥିବା ସଂପର୍କରେ କୌଶଲ୍ୟାଗଙ୍ଗ ଫାଣ୍ଡି ଅଧିକାରୀ ସୌମ୍ୟରଞ୍ଜନ ଜେନା ବିଶ୍ୱସ୍ତ ସୂତ୍ରରୁ ଖବର ପାଇବା ପରେ ସେଠାରେ ଚଢଉ କରିଥିଲେ। ପୁଲିସ ଉପରୋକ୍ତ ୫ ଅଭିଯୁକ୍ତଙ୍କୁ ସେଠାରୁ ଧରିବାରେ ସଫଳ ହେବା ସହ ସେମାନଙ୍କ ନିକଟରୁ ଗୋଟିଏ ଖଣ୍ଡା, ଗୋଟିଏ ଛୁରୀ, ଲଙ୍କାଗୁଣ୍ଡ ପ୍ୟାକେଟ୍, ମଦବୋତଲ ଓ ଅଧାଜଳା ମହମବତୀ ଆଦିକୁ ଜବତ କରିଥିଲା । ଏନେଇ ଫାଣ୍ଡି ଅଧିକାରୀ ଶ୍ରୀଜେନାଙ୍କ ଲିଖିତ ଅଭିଯୋଗ ଉପରେ ପିପିଲି ଥାନାରେ ଏକ ମାମଲା ରୁଜୁ ହୋଇଥିବା ବେଳେ ତଦନ୍ତକାରୀ ଅଧିକାରୀ ଏସ୍ଆଇ ଶୁଭଶ୍ରୀ ପ୍ରୀୟଦର୍ଶିନୀ ନନ୍ଦ ଘଟଣାର ତଦନ୍ତ କରିବା ସହ ସମସ୍ତ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଥିଲେ।
Comments are closed.