ହରଭଙ୍ଗା: ହରଭଙ୍ଗା ତହସିଲ ଅର୍ନ୍ତଗତ ମହାନଦୀର ସାକୁଶିଙ୍ଗା ଘାଟରୁ ବ୍ୟାପକ ବାଲି ଚୋରାଚାଲାଣ ହେଉଥିବା ଏକ ଶୀର୍ଷକ ଖବର ଶୁକ୍ରବାର ସମାଜରେ ପ୍ରକାଶ ପାଇଥିଲା। ଖବରର ସତ୍ୟତାକୁ ହୃଦୟଙ୍ଗମ କରି ହରଭଙ୍ଗା ତହସିଲ ପ୍ରଶାସନ ଏବଂ ପୁରୁଣାକଟକ ପୁଲିସ ପକ୍ଷରୁ ବାଲି ଚୋରାଚାଲାଣ ଉପରେ ମିଳିତ ଚଢଉ କରାଯାଇଥିଲା। ହରଭଙ୍ଗା ଏବଂ ସାକୁଶିଙ୍ଗା ମହାନଦୀ ଘାଟରୁ ବାଲି ଚୋରା ଚାଲାଣ କରୁଥିବା ୬ଟି ହାଇୱା ଯାଞ୍ଚ ବେଳେ ରୟାଲଟି ଫର୍ମ ଦେଖାଇ ପାରିନଥିବାରୁ ସେଗୁଡିକୁ ଜବତ କରିଥିଲେ। ଜବତ ଗାଡ଼ିଗୁଡିକରୁ ୭୦ ହଜାର ଟଙ୍କା ଜୋରିମାନା ଆଦାୟ କରାଯାଇଥିବା ହରଭଙ୍ଗା ତହସିଲଦାର ଶମ୍ଭୁଭୂଷଣ ମିଶ୍ର ସୂଚନା ଦେଇଛନ୍ତି। ଚଢାଉ ବେଳେ ହରଭଙ୍ଗା ଅତିରିକ୍ତ ତହସିଲଦାର ହରିଓମ ଭୋଇ, ପୁରୁଣାକଟକ ଆଇଆଇସି ଜ୍ୟୋସ୍ନା କାଉଁରୀ, ଏସଆଇ ତୁଳାରାମ ନାଏକ ପ୍ରମୁଖ ସାମିଲ ଥିଲେ। ତହସିଲ ପ୍ରଶାସନର ଏଭଳି କାର୍ଯ୍ୟାନୁଷ୍ଠାନ ବାଲି ଚୋରା ଚାଲାଣକାରୀଙ୍କ ମଧ୍ୟରେ ଏକ ଆତଙ୍କ ସୃଷ୍ଟି କରିଛି।
