ଠାକୁରମୁଣ୍ଡା : ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ଥାନା ଅନ୍ତର୍ଗତ କେନ୍ଦୁଜିଆଣି-ଭୀମକୁଣ୍ଡ ପ୍ରଧାନମନ୍ତ୍ରୀ ରାସ୍ତାର ଯୋଡ଼ିବିଲ ଗ୍ରାମ ନିକଟରେ ଶୁକ୍ରବାର ଦ୍ବିପ୍ରହର ସମୟରେ ଏକ ଯାତ୍ରୀବାହୀ ଅଟୋ ଓଲଟି ପଡିବାରୁ ଜଣେ ମହିଳା ଓ ଅଟୋ ଡ୍ରାଇଭର ଗୁରୁତର ଥିବା ବେଳେ ଅନ୍ୟ ୩ ଜଣ ମହିଳା ଆହତ ହୋଇଛନ୍ତି। ଦୁର୍ଘଟଣା ପରେ ସମସ୍ତଙ୍କୁ ୧୦୮ ଆମ୍ବୁଲାନ୍ସ ଯୋଗେ ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇ ଚିକିତ୍ସା କରାଯାଇଛି। ଗୁରୁତର ଥିବା ରଶ୍ମିରେଖା ଦାସଙ୍କୁ କଟକ ବଡ଼ଡାକ୍ତରଖାନା ଓ ଡ୍ରାଇଭର ମୁକେଶ ଦାସଙ୍କୁ କରଞ୍ଜିଆ ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ପ୍ରକାଶ ଯେ, ଖଣ୍ଡବନ୍ଧ ଗ୍ରାମପଞ୍ଚାୟତ ଅଧିନ ବାଲିପୋଷୀ ଗ୍ରାମର ୧୧ ଜଣ ମା’ ସରସ୍ଵତୀ ସ୍ୱୟଂ ସହାୟକ ଗୋଷ୍ଠୀର ମହିଳା କେନ୍ଦୁଜିଆଣିଠାରେ ଥିବା ଓଡ଼ିଶା ଗ୍ରାମ୍ୟ ବ୍ୟାଙ୍କକୁ ଆସି କାମ ସାରି ଦିନ ପ୍ରାୟ ୨ଟା ସମୟରେ ଫେରୁଥିବା ବେଳେ ଯୋଡ଼ିବିଲ ଗ୍ରାମ ନିକଟରେ ଯାଉଥିବା ଓଟୋ ସମୁଖକୁ ଏକ ଛେଳି ଆସି ଯିବାରୁ ଅଟୋ ଦୁର୍ଘଟଣା ଘଟିଥିଲା। ଘଟଣାସ୍ଥଳରୁ ସମସ୍ତଙ୍କୁ ଉଦ୍ଧାର କରାଯାଇ ୧୦୮ ଆମ୍ବୁଲାନ୍ସରେ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଦୁର୍ଘଟଣାରେ ଆହତ ମହିଳାମାନେ ହେଲେ ସୁମିତ୍ରା ଦଣ୍ଡପାଟ, ରୀନା ଦାଣ୍ଡପାଟ ଆହତ ହୋଇ ଠାକୁରମୁଣ୍ଡା ସ୍ଵାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ଅନ୍ୟମାନଙ୍କୁ ପ୍ରାଥମିକ ଚିକିତ୍ସା ପରେ ଛାଡି ଦିଆଯାଇଥିଲା ବେଳେ ଠାକୁରମୁଣ୍ଡା ପୁଲିସ ଖବର ପାଇ ଦୁର୍ଘଟଣା ତଦନ୍ତ କରୁଛି।
