ଏନଏସି ପ୍ରଶାସନ ସିଲ କଲା ପେଟ୍ରୋଲ ପମ୍ପ, ଟ୍ରେଡିଂ ଲାଇସେନ୍ସ ନ ଥିବା ୮ଟି ବ୍ୟବସାୟ ପ୍ରତିଷ୍ଠାନ

କଣ୍ଟାବାଞ୍ଜି: କଣ୍ଟାବାଞ୍ଜି ଏନଏସି କାର୍ଯ୍ୟନିର୍ବାହୀ ଅଧିକାରୀ ସମି ଜୟଶ୍ରୀ ରେଡ଼ି ଏନଫୋର୍ସମେଣ୍ଟ ଅଧିକାରୀଙ୍କ ସହ ଅପରାହ୍ଣ ପ୍ରାୟ ୫ଟା ବେଳେ ରାଷ୍ଟ୍ରୀୟ ହିନ୍ଦୀ ବିଦ୍ୟାଳୟ ସଂଲଗ୍ନ ମାର୍କେଟ କମ୍ପ୍‌ଲେକ୍ସର ୮ଟି ବ୍ୟବସାୟ ପ୍ରତିଷ୍ଠାନ ଉପରେ ଚଢ଼ାଉ କରିଥିଲେ ଏବଂ ଟ୍ରେଡିଂ ଲାଇସେନ୍ସ ନଥିବାରୁ ଏହି ୮ଟି ଦୋକାନ ସିଲ କରି ଦେଇଥିଲେ। ସେହିପରି ବଙ୍ଗୋମୁଣ୍ଡା ରାସ୍ତାରେ ଥିବା ରିଲାଏନ୍ସ ପେଟ୍ରୋଲ ପମ୍ପକୁ ଏନଏସି ପ୍ରଶାସନ ସିଲ କରିଦେଇଛି। ଏନଏସି ପ୍ରଶାସନ ପକ୍ଷରୁ ରିଲାଏନ୍ସ ପେଟ୍ରୋଲ ପମ୍ପକୁ ଆବଶ୍ୟକ କାଗଜ ପତ୍ର ଦେଖାଇବାକୁ କୁହାଯାଇଥିଲା।

ଆବଶ୍ୟକ କାଗଜପତ୍ର ଦେଖାଇ ନପାରିବାରୁ ପେଟ୍ରୋଲ ପମ୍ପ ଅଫିସ ସିଲ କରାଯାଇଥିଲା। ଏନଏସି ପ୍ରଶାସନ ଏହି ପଦକ୍ଷେପ ଦେଖି ସହରର ମେନରୋଡ଼, ବଜାରରୋଡ଼ ସହ ଅଧିକାଂଶ ସ୍ଥାନରେ ଦୋକାନ ବଜାର ବ୍ୟବସାୟୀ ମାନେ ବନ୍ଦ କରିଦେଇ ଥିଲେ। ସହରରେ କର୍ଫ୍ୟୁ ଭଳି ପରିସ୍ଥିତି ଦେଖା ଯାଇଥିଲା। ବ୍ୟବସାୟୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଵା ସହ ସହରର ଅଧିକାଂଶ ବ୍ୟବସାୟୀ ଲାଇସେନ୍ସ ଅନଲାଇନ ସାଇଟ ବନ୍ଦ ଥିବାବେଳେ ଅନେକ ଆବେଦନ କରିପାରିନଥିଲେ। କେତେକ ବ୍ୟବସାୟୀ ଟ୍ରେଡିଙ୍ଗ ଲାଇସେନ୍ସ ପାଇଁ ଆବେଦନ କରି ସୁଦ୍ଧା ଲାଇସେନ୍ସ ପାଇନଥିବା ଅଭିଯୋଗ କରିଛନ୍ତି। ଅନେକ ଦୋକାନୀ ଲାଇସେନ୍ସ ଥାଇ ନବୀକରଣ କରିନଥିବା ଜଣାପଡିଛି।