ରେଙ୍ଗାଲିକେମ୍ପ: ଅତାବିରା ଚୋରଙ୍କ ଗଡ ସାଜି ଦିନକୁ ଦିନ ଅପ୍ରୀତିକର ଘଟଣାମାନ ଘଟି ଚାଲିଥିବା ବେଳେ ପୋଲିସ ମଧ୍ୟ ସତର୍କ ହୋଇସାରିଛି। ପ୍ରତିଦିନ ବିଭିନ୍ନ ପ୍ରକାର କୌଶଳ ଅବଲମ୍ବନ କରି ଚୋର ଡକାୟତମାନଙ୍କୁ ଧରିବାରେ ଲାଗିଛି। ଆଜି ପୁଣି ଏକ ଚୋରକୁ ଧରିବା ସହ ଚୋରି ଜିନିଷ ମଧ୍ୟ ପୋଲିସ ଜବତ କରିଛି। ପୋଲିସ ସୂତ୍ରରୁ ଜଣାପଡିଛି ଯେ ଗତ ବିଳମ୍ୱିତ ରାତ୍ରିରେ ଅତାବିରା ବ୍ଲକ ଭୋଇପୁରା ଗ୍ରାମର ୟେନେନା ସୁବାରାଓଙ୍କ ୧/୨ ଏଚପି ମଟର ପମ୍ପ ଓ ଗୋଟିଏ ଟିଭି ଚୋରି ହୋଇଥିବା ଅଭିଯୋଗ କରିଥିଲେ। ତେଣୁ ଅତାବିରା ଥାନା ଅଧିକାରୀ ଅନିଲ କୁମାର ପ୍ରଧାନଙ୍କ ତତ୍ବାବଧାନରେ ଏହାର ତଦନ୍ତ ଆରମ୍ଭ କରାଯାଇଥିଲା।
ପୋଲିସ ଆଜି ଉକ୍ତ ଚୋରକୁ ଭୋଇପୁରା କେନାଲ ପାଖରେ ଧରି ତାକୁ ପଚରା ଉଚୁରା କରିବାରୁ ସେ ଏହି ଚୋରି ଜିନିଷ ଗ୍ରାମର ଏକ ପୁଆଲ ଗଦା ଭିତରେ ଲୁଚାଇଥିବା ପ୍ରକାଶ କରିଥିଲା। ଫଳରେ ପୋଲିସ ଉକ୍ତ ଚୋରି ଜିନିଷ ଜବତ କରିଥିଲା। ଏହି ଅଭିଯୁକ୍ତ ଜଣକ ଉକ୍ତ ଗ୍ରାମର ଆନନ୍ଦ ଭୁଏ (୨୦) ବୋଲି ଜଣାପଡିଛି। ଏହା ବିରୁଦ୍ଧରେ ପୋଲିସ ଏକ କେସ ରୁଜୁ କରି ତାକୁ କୋର୍ଟ ଚାଲାଣ କରିଥିବା ଜଣାପଡିଛି। ଏହି ତଦନ୍ତ ରେ ଏସ ଆଇ ଯାଦବ ବାଗ, ଏ ଏସ ଆଇ ମହେନ୍ଦ୍ର ତାଣ୍ଡି ଓ ଯୁଗଳ ତାଣ୍ଡି ସହଯୋଗ କରିଥିଲେ।
