ସିକୋ: ବେଗୁନିଆ ବ୍ଲକ ଅନ୍ତର୍ଗତ ସିକୋଠାରେ ଖୋଲାଯାଇଥିବା ଫରେଷ୍ଟ ବିଟ ହାଉସରେ କର୍ମଚାରୀ ନଥିବା ଯୋଗୁଁ ସେଠାରେ ଗତ ଡିସେମ୍ବର ମାସରୁ ତାଲା ପଡିଥିବାର ଦେଖିବାକୁ ମିଳୁଛି। ସିକୋ ସାହି ଭିତରକୁ ଯିବା ରାସ୍ତାରେ ଏହି କାର୍ଯ୍ୟାଳୟଟି ଅବସ୍ଥିତ। ଲକ୍ଷ ଲକ୍ଷ ଟଙ୍କା ବ୍ୟୟ କରି ସରକାର ଏହି କାର୍ଯ୍ୟାଳୟଟି ନିର୍ମାଣ କରିଥିବା ବେଳେ ଏବେ ୧୧ ମାସ ହେଲା ସେଠାରେ ତାଲା ଝୁଲୁଛି। ତାଲା ପଡି ରହିବା ଯୋଗୁଁ କାର୍ଯ୍ୟାଳୟ ଭିତର ଏକ ପ୍ରକାର ଜଙ୍ଗଲରେ ପରିଣତ ହୋଇ ସରୀସୃପମାନଙ୍କ ବାସସ୍ଥାନ ପାଲଟି ଥିବା ବେଳେ ଘର ଭିତରେ ଉଇ ହୁଙ୍କା ଚଢ଼ିଗଲେଣି। ସବୁବେଳେ ତାଲା ପଡିରହିବା ଯୋଗୁଁ କାର୍ଯ୍ୟାଳୟର ଗେଟ ଏବଂ ପାଚେରୀକୁ ଲୋକମାନେ ସେମାନଙ୍କର ଲୁଗା ପଟା ଶୁଖାଇବା ସ୍ଥାନ ଭାବେ ବ୍ୟବହାର କରୁଥିବାର ଦେଖିବାକୁ ମିଳୁଛି।
ଏଠାରେ କାର୍ଯ୍ୟରତ କର୍ମଚାରୀ ଡିସେମ୍ବର ମାସରୁ ବଦଳି ହୋଇ ଗଲାପରେ ତାଙ୍କ ସ୍ଥାନରେ କାହାରିକୁ ନିଯୁକ୍ତି ଦିଆନଯାଇ ତାଙ୍କୁ ଏଠାରୁ କାହା ସ୍ୱାର୍ଥରେ ରିଲିଭ କରାଗଲା ବୋଲି ସାଧାରଣରେ ଆଲୋଚନା ହେଉଛି। ଲୋକମାନଙ୍କର ଏଠାରେ ଏବେ କୌଣସି କାମ ହେଉନଥିବା ବେଳେ ଅଯଥା ହଇରାଣ ହରକତ ହୋଇ ଧାଇଁବା ସାର ହେଉଛି। ସେହିପରି ବେଗୁନିଆ ବ୍ଲକର ସିମୋର ଠାରେ ଖୋଲା ଯାଇଥିବା ଫରେଷ୍ଟ ବିଟ ହାଉସରେ ନିଯୁକ୍ତି ପାଇଥିବା ବନପାଳ ଏଠାରେ ଆଦୌ ନରହି ଖୋର୍ଦ୍ଧାରେ ରହୁଥିବା ଅଭିଯୋଗ ହେଉଛି। ତାଙ୍କର କାର୍ଯ୍ୟାଳୟକୁ ଗଲେ କେହି ତାଙ୍କର ଦେଖା ପାଉନାହାନ୍ତି। ବାହାର ଲୋକ କାର୍ଯ୍ୟାଳୟ ଖୋଲି ବସୁଥିବା ବେଳେ ମାଡ଼ାମ ଆସିଥିଲେ ଏଇଠିକି ଯାଇଛନ୍ତି ବୋଲି କହି ବୋଧ ଦେଉଛନ୍ତି।
ଏବେ ସମ୍ପୃକ୍ତ ବିଭାଗ ତରଫରୁ ବିଭିନ୍ନ ସ୍ଥାନରେ ଗଛ ଲଗା ଯାଉଥିବା ବେଳେ ଏଥିରେ ବହୁ ଅର୍ଥ ହେରଫେର ହୋଇଥିବାର ସାଧାରଣରେ ଅଭିଯୋଗ ହେଉଛି। ଗଛଗୁଡିକ ଲଗାଇ ଦିଆଯାଇ ତାର ଯତ୍ନ ନିଆ ଯାଉନାହିଁ କିମ୍ବା ସାର ଏବଂ ପାଣି ଦିଆ ନଯିବା ଯୋଗୁଁ ଅନେକ ଜାଗାରେ ଗଛ ଗୁଡିକ ମରିଯାଉଥିବା ଦେଖିବାକୁ ମିଳୁଛି। ଏ ସଂକ୍ରାନ୍ତରେ ବୁଝିବା ପାଇଁ ବନପାଳ ପ୍ରିୟଦର୍ଶିନୀ ସେଠୀଙ୍କୁ ଫୋନ କରିଥିଲେ ମଧ୍ୟ ସେ ଫୋନ ଗ୍ରହଣ କରି ନଥିଲେ।
Comments are closed.