କଣ୍ଟାମାଳ : ଚିକିତ୍ସା ବିଜ୍ଞାନର ଅଗ୍ରଗତି ସତ୍ୱେ ଅନ୍ଧ ବିଶ୍ୱାସର ଅନ୍ଧଗଳିରୁ ମଣିଷ ସମାଜ ମୁକୁଳି ପାରୁନାହିଁ। ଆଜି ଏକ ଗୁଣିଗାରେଡି ସନ୍ଦେହରେ କଣ୍ଟାମାଳ ଥାନା ଅନ୍ତର୍ଗତ ଶ୍ରୀମାଲ ନିକଟ ତେଲ ନଦୀ ଉରଧର ଘାଟରେ ପୂଜାର୍ଚ୍ଚନା ଏବଂ ନଦୀର ଗଣ୍ଡରେ ବୁଡିବା ପାଇଁ ଚାଲିଥିବା ଏକ ଅଭାବନୀୟ ଘଟଣାରେ ବିଭିନ୍ନ ଗାଁରୁ ଶହ ଶହ ଲୋକଙ୍କୁ ଦେଖିବାକୁ ମିଳିଥିଲା। ଘଣ୍ଟାପଡା ନିକ ରେକଡୋଲ ଗାଁରେ ଗୁଣିଗାରେଡିକୁ ନେଇ ଦୁଇଟି ପରିବାର ମଧ୍ୟରେ ରହିଥିବା ତିକ୍ତତା ପାଇଁ ଆଜି ଦୁଇ ଜଣଙ୍କୁ ଆଣି ଏହି ଘାଟରେ ପୂଜାର୍ଚ୍ଚନା କରାଯାଇ ତେଲନଦୀର ଗଭୀର ଗଣ୍ଡରେ ବୁଡା ଯାଇଥିଲା। ସ୍ଥାନୀୟ ଲୋକଙ୍କ ବିଶ୍ୱାସ ପ୍ରକାରେ ଯେ ଦୀର୍ଘ ସମୟ ଧରି ପାଣି ଭିତରେ ବୁଡି ରହୁଛି ସେ ନିର୍ଦ୍ଦୋଶ ଏବଂ ଯିଏ ବୁଡି ରହି ପାରିନଥାଏ ସେ ଦୋଷୀ ବୋଲି କୁହାଯାଇ ଥାଏ। କୌଣସି ଅପରାଧୀକ ଘଟଣାରେ ଲୋକେ ପୋଲିସର ଦ୍ୱାରସ୍ଥ ନହୋଇ ଉରଧରରେ ବୁଡାଇବା ନିଷ୍ପତ୍ତିକୁ ସାଧାରଣରେ ନାପସନ୍ଦ କରାଯାଇଛି।
ବର୍ତ୍ତମାନର କୋଭିଡ କଟକଣା ଏବଂ ସାପ୍ତାହିକ ସଟ ଡାଉନକୁ ବେଖାତିର କରି ଏଭଳି ଭାବେ ଶହ ଶହ ଲୋକଙ୍କ ଏକତ୍ରୀକରଣ କୌଣସି ଖବର ପ୍ରଶାସନ ପାଖରେ ନଥିଲା ଫଳରେ ଦୀର୍ଘ ୩ ଘଣ୍ଟାରୁ ଅଧିକ ସମୟ ଧରି ତେଲ ନଦୀ ଉରଧର ଘାଟ ଲୋକାରଣ୍ୟ ହୋଇ ପଡିଥିଲା। ସମସ୍ତ ପ୍ରାୟୋଜିତ କାର୍ଯ୍ୟକ୍ରମ ଶେଷ ହେବା ବେଳକୁ ପୋଲିସ ଘଟଣା ସ୍ଥଳରେ ପହଞ୍ଚିଥିଲା ଯଦ୍ୱାରା ଲୋକେ ଭୟରେ ଏଣେ ତେଣେ ଦୌଡି ପଳାଇଥିଲେ। କିଛି ଦିନ ପୂର୍ବରୁ ଉମା ଗାଁ ସରକାରୀ ବନ୍ଧରେ ଶହ ଶହ ପୁରୁଷ, ମହିଳା, ଯୁବକଙ୍କ ମାଛମରା ଚର୍ଚ୍ଚା ଏଯାବତ ଥମି ନଥିବା ବେଳେ ଆଜିର ଏହି ଘଟଣା ପ୍ରଶାସନ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଏଭଳି ଏକ ଘଟଣା ଘଟିବାର କୌଣସି ସୂଚନା ପ୍ରଶାସନ କି ପୋଲିସ ପାଖରେ ନଥିବା ଏବଂ ଲୋକଙ୍କ କରୋନା କଟକଣାକୁ ବେଖାତିର କରିବା ଆଦୌ ଶୁଭ ସୂଚନା ନୁହଁ ବୋଲି ସାଧାରଣରେ ଆଲୋଚନା ହେଉଥିଲେ ହେଁ ପ୍ରଶାସନିକ ଅବହେଳାକୁ ସବୁ ସ୍ତରରେ ଦାୟୀ କରାଯାଇଛି।
