ଗୁପ୍ତେଶ୍ୱର ଓଡ଼ିଶାର ଏକ ପ୍ରସିଦ୍ଧ ଶୈବପୀଠ ଭାବେ ପରିଚିତ। ଏହା କୋରାପୁଟ ଜିଲ୍ଲାର ଜୟପୁରରେ ଅବସ୍ଥିତ। ଏହି ମନ୍ଦିର ରାମଗିରି ପର୍ବତର ଏକ ଗୁମ୍ଫାରେ ଅବସ୍ଥିତ। ସେଠାରେ ଶିବ ଲିଙ୍ଗ ବହୁ ପ୍ରାଚୀନ କାଳରୁ ରହିଛି। ଘଞ୍ଚ ଜଙ୍ଗଲରେ ପରିପୂର୍ଣ୍ଣ ଗୁମ୍ଫା ମଧ୍ୟରେ ରହିଥିବାରୁ ଶିବଲିଙ୍ଗଙ୍କୁ ଦର୍ଶନ କରିବା କଷ୍ଟସାଧ୍ୟ। ତେଣୁ ଏହାଙ୍କୁ ଗୁପ୍ତେଶ୍ୱର ବୋଲି କୁହାଯାଏ। ପ୍ରାକୃତିକ ସୌନ୍ଦର୍ଯ୍ୟ ଓ ସବୁଜିମା ପରିବେଷ୍ଟିତ ଏହି ମନ୍ଦିରର ବହୁ ମାହାତ୍ମ୍ୟ ରହିଛି। ଗୁପ୍ତେଶ୍ୱରଙ୍କୁ ଦର୍ଶନ କରିବା ଦ୍ୱାରା ଜନ୍ମ ଜନ୍ମର ପାପ କ୍ଷୟ ହୋଇ ସବୁ ମନସ୍କାମନା ପୂରଣ ହୋଇଥାଏ।
ବହୁ ଦୂରଦୂରାନ୍ତରରୁ ଲୋକେ ଏଠାକୁ ଆସି ପ୍ରଭୁ ଗୁପ୍ତେଶ୍ୱରଙ୍କୁ ଦର୍ଶନ କରିଥାଆନ୍ତି। ଶିବରାତ୍ରି ଏଠାର ମୁଖ୍ୟ ପର୍ବ। ସେଠାରେ ପର୍ଯ୍ୟଟଙ୍କ ରହିବା ପାଇଁ ସୁବିଧା ମଧ୍ୟ ରହିଛି। ଶିବରାତ୍ରି ସମୟରେ ବହୁ ସ୍ୱତନ୍ତ୍ର ଦୋକାନ ବଜାର ମଧ୍ୟ ବସେ।
ଜୟପୁର ଠାରୁ ଏହା ନିକଟତର ଅଟେ। ଜୟପୁର କିମ୍ବା କୋରାପୁଟ୍ଠାରୁ ସେଠାକୁ ଯିବା ପାଇଁ ଘରୋଇ ଯାନର ସୁବିଧା ରହିଛି। ପାହାଡ଼ିଆ ରାସ୍ତା ହେତୁ ବସରେ ଯିବା ବିପଦପୂର୍ଣ୍ଣ। ତେଣୁ ଛୋଟ ଛୋଟ ଗାଡ଼ିରେ ଯାତ୍ରୀଙ୍କୁ ନେବା ଆଣିବା କରାଯାଏ।
ଜୟପୁର ଠାରୁ ୧୨ କିଲୋମିଟର ଯିବା ପରେ ପାରାପୁଟ ବ୍ରିଜ ପଡ଼ିବ। ସେଠାରୁ ୧ କିମି ଯିବା ପରେ ଏକ ୱାଇ ଜଙ୍ଗସନ୍ ଦେଖାଯିବ। ସେଥିରେ ସିଧା ରାସ୍ତାରେ ୯ କିଲୋମିଟର ଯିବା ପରେ ପହଞ୍ôଚବେ ବୈପାରିଗୁଡ଼ା। ସେଠାରୁ ଆଉ କିଛି ଦୂର ଯିବା ପରେ ଆପଣ ପହଞ୍ଚିଯିବେ ଗୁପ୍ତେଶ୍ୱର। ପିକ୍ନିକ୍ ନିମନ୍ତେ ମଧ୍ୟ ଏକ ପ୍ରମୁଖ ସ୍ଥାନ ଅଟେ।
