ଦୀର୍ଘଦିନ ଧରି ବଲିଉଡ଼ର ଦୁଇ ପ୍ରତିଦ୍ୱନ୍ଦ୍ୱୀ ଭାବେ ଜଣାଶୁଣା ସୁପରଷ୍ଟାର ସଲମାନ ଖାନ ଓ ଶାହାରୁଖ ଖାନଙ୍କ ମଧ୍ୟରେ ଦୂରତା କମ୍ ହେବାର ଦେଖାଯାଇଛି। ଖବର ମିଳିଛି ଦୁହେଁ ଏବେ ସଲମାନଙ୍କ ନୂଆ ସୋ “୧୦ କା ଦମ୍” ରେ ନଜର ଆସିବାକୁ ଯାଉଛନ୍ତି। ପୂର୍ବରୁ ଶାହାରୁଖ ୨୦୧୫ ରେ ସଲମାନଙ୍କ ଶୋ “ବିଗ୍ବସ୍” ରେ ନଜର ଆସିଥିଲେ। ଏହାଛଡ଼ା ଗତବର୍ଷର “ବିଗ୍ବସ୍” ରେ ମଧ୍ୟ ଶାହାରୁଖ ଅତିଥି ରୂପେ ସାମିଲ ହୋଇଥିଲେ।
ମିଳିଥିବା ଖବର ମୁତାବକ, ସଲମାନଙ୍କ ଏହି “୧୦ କା ଦମ୍” ସୋ ରେ ବଲିଉଡ଼ ବାଦ୍ଶାହ ଶାହାରୁଖଙ୍କ ସମେତ ବହୁତ ନାମୀଦାମୀ ଅଭିନେତା ଅଭିନେତ୍ରୀ ମାନଙ୍କୁ ଦେଖିବାକୁ ମିଳିବ। ଶାହାରୁଖ ସୋ ର ଶେଷ ଭାଗରେ ନଜର ଆସିବେ ବୋଲି ଜଣାପଡ଼ିଛି। ଏହା ପ୍ରଥମ ଥର ପାଇଁ ନୁହେଁ ଯେ, ଦୁହେଁ ଦୁହିଁଙ୍କୁ ସମର୍ଥନ କରିବେ। ପୂର୍ବରୁ ଶାହାରୁଖ ତାଙ୍କ ଚଳଚ୍ଚିତ୍ର “ଦିଲ୍ୱାଲେ” ଓ “ରୟିଜ୍” ର ପ୍ରଚାର ସମୟରେ ବିଗ୍ବସ୍ ରେ ସାମିଲ ହୋଇଥିଲେ। ଏହାଛଡ଼ା ପୂର୍ବବର୍ଷ ତାଙ୍କୁ ସଲମାନଙ୍କ ଚଳଚ୍ଚିତ୍ର “ଟ୍ୟୁବ୍ଲାଇଟ୍” ର ଏକ ଭୂମିକାରେ ଦେଖିବାକୁ ମିଳିଥିଲା। ଦୁହେଁ ଚଳିତ ବର୍ଷ ଡିସେମ୍ବର ମାସରେ ରିଲିଜ୍ ହେବାକୁ ଥିବା ଚଳଚ୍ଚିତ୍ର “ଜିରୋ” ରେ ମଧ୍ୟ ନଜର ଆସିବେ। ଖବର ଅନୁସାରେ ସଲମାନ ଶାହାରୁଖଙ୍କ ଚଳଚ୍ଚିତ୍ର “ଜିରୋ” ରେ ଏକ ସ୍ୱତନ୍ତ୍ର ଭୂମିକାରେ ନଜର ଆସିବେ। ଏହି ଦୁଇ ତାରକାଙ୍କୁ ସାଥିରେ ଦେଖି ଆନନ୍ଦିତ ହେଉଥିବା ତାଙ୍କ ପ୍ରଶଂସକ ମାନେ ଡିସେମ୍ବର ଆଗରୁ ତାଙ୍କୁ “୧୦ କା ଦମ୍” ରେ ଦେଖିପାରିବେ।
