ବ୍ରହ୍ମପୁର: କରୋନା ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ବ୍ରହ୍ମପୁର ସ୍ଥିତ ଏମକେସିଜି ମେଡିକାଲ କଲେଜ ଓ ହସ୍ପିଟାଲର ଆଉଟଡୋର ଚିକିତ୍ସା ସେବାକୁ ଆଜି ଠାରୁ ବନ୍ଦ କରିଦିଆଯାଇଛି । କେବଳ ଜରୁରୀକାଳୀନ ଚିକିତ୍ସା ସହ ରେଫେର ହୋଇ ଆସୁଥିବା ରୋଗୀଙ୍କ ହିଁ ଚିକିତ୍ସା କରିବାକୁ ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି । ମେଡିକାଲର ମୁଖ୍ୟ ଫାଟକକୁ ଛାଡି ଅନ୍ୟ ସମସ୍ତ ରାସ୍ତା ବନ୍ଦ କରାଯାଇଛି । ସେହିପରି ମୁଖ୍ୟ ଫାଟକରେ ପୁଲିସ ମୁତୟନ କରିବାକୁ ବ୍ରହ୍ମପୁର ଏସପିଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି । ସୂଚନାଯୋଗ୍ୟ ଏମକେସିଜି ମେଡିକାଲରେ ଗତ କିଛି ଦିନ ହେଲା କରୋନା ସନ୍ଦିଗ୍ଧ ରୋଗୀଙ୍କ ସଂଖ୍ୟା ଅହେତୁକ ବୃଦ୍ଧି ପାଇଛି । ଏପରିକି ଏହା ଭିତରେ ଥିବା କରୋନା ଆଇସୋଲେସନ କକ୍ଷରେ ରୋଗୀ ଭର୍ତ୍ତି ହୋଇଯିବାରୁ ପ୍ରତ୍ୟେକ ବିଭାଗରେ ଆଇସୋଲେସନ କକ୍ଷ ଖୋଲିବାକୁ ଯୋଜନା ହୋଇଛି । ଏପଟେ ଏହି ମେଡିକାଲରୁ ପ୍ରତ୍ୟେକ ଦିନ ଏକାଧିକ ଡାକ୍ତର, ନର୍ସ କରୋନାରେ ଆକ୍ରାନ୍ତ ହେଉଛନ୍ତି । ବର୍ତ୍ତମାନ ସୁଦ୍ଧା ଏହି ମେଡିକାଲର ୧୦୦ ରୁ ଉର୍ଦ୍ଧ୍ବ ଡାକ୍ତର, ନର୍ସ, କର୍ମଚାରୀ କରୋନାରେ ସଂକ୍ରମିତ ହୋଇସାରିଲେଣି ।
Comments are closed.