ରାତିରେ ଜଣେ ୮ ବର୍ଷର ନାବାଳକ ନିଜ ୧୬ ବର୍ଷର ଭାଇ ଓ ଅଜାଙ୍କ ସହ ଏକ ଘରେ ଶୋଇଥିଲା। ମାତ୍ର ସକାଳେ ତାଙ୍କ ମୃତ୍ୟୁର ଖବର ଶୁଣିବାକୁ ମିଳିଥିଲା। ଶୋଇଥିବା ସମୟରେ ୩ ଜଣଙ୍କୁ ଏକ ବିଷାକ୍ତ ସର୍ପ କାମୁଡ଼ିଥିଲା। ଯାହାଫଳରେ ସେମାନଙ୍କ ମୃତ୍ୟୁ ହୋଇଥିଲା। ଏଭଳି ଏକ ଦୁଃଖଦ ଘଟଣା ମଧ୍ୟପ୍ରଦେଶର ବାଲାଘାଟ ଜିଲାରେ ଘଟିଛି।
ବାରାସିବନୀ ଥାନା ଅନ୍ତର୍ଗତ ବୋଟେଝରୀ ଗାଁରେ ସୋମବାର ଭୋର ସମୟରେ ସାପ ଦଂଶନ କରିବାରୁ ଏକ ଝୁମ୍ପୁଡ଼ି ଘରେ ଶୋଇଥିବା ଗୋଟିଏ ପରିବାରର ୮ ବର୍ଷର ନାବାଳକ ସହ ୩ ଜଣଙ୍କର ମୃତ୍ୟୁ ହୋଇଛି।
ମୃତକ ହେଲେ ଗନ୍ନାଲାଲ ମେକ୍ଷାମ (୬୦), ରାଜେଶ (୧୬), ରାହୁଲ (୮)। ମୃତ ରାଜେଶ ଓ ରାହୁଲ ଭାଇଥିଲେ, ମୃତ ଗନ୍ନାଲାଲ ତାଙ୍କ ଅଜା ଥିଲେ।
ସୂଚନା ଯୋଗ୍ୟ, ଗନ୍ନାଲାଲ , ରାଜେଶ ଓ ରାହୁଲ ଜମି ନିକଟରେ ଥିବା ଏକ ଝୁମ୍ପୁଡ଼ି ଘରେ ଚଟାଣରେ ଶୋଇଥିଲେ। ସେହି ସମୟରେ ୩ ଜଣଙ୍କୁ ଏକ ବିଷାକ୍ତ ସର୍ପ ଦଂଶନ କରିଥିଲା। ଫଳରେ ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଯାଇଥିଲା।
ଖବର ପାଇ ବାରାସିବନୀ ପୁଲିସ ଘଟଣାସ୍ଥଳରେ ପହଂଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ଏହି ଖବର ପ୍ରଘଟ ହେବା ପରେ ସମଗ୍ର ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
Comments are closed.