ମିରଟ୍: ଜନୈକ ସେନା ଅଧିକାରୀଙ୍କ ପତ୍ନୀଙ୍କୁ ହତ୍ୟା ଅଭିଯୋଗରେ ସେନା ବାହିନୀର ମେଜର ପାହ୍ୟାର ଜଣେ ଅଧିକାରୀଙ୍କୁ ମିରଟ ପୁଲିସ ଗିରଫ କରିଛି। ଅଧିକ ପଚରାଉଚୁରା ପାଇଁ ମେଜରଙ୍କୁ ଦିଲ୍ଲୀ ଅଣାଯାଇଛି।
ପୁଲିସ୍ ସୂଚନା ଅନୁଯାୟୀ, ମିରଟରେ ରହୁଥିବା ୩୦ ବର୍ଷ ବୟସ୍କା ମହିଳା ଜଣକ ଫିଜିଓଥେରାପି ପାଇଁ ଶନିବାର ସକାଳୁ ଦିଲ୍ଲୀ କ୍ୟାଣ୍ଟେନ୍ମେଣ୍ଟ ସ୍ଥିତ ବେସ୍ ହସ୍ପିଟାଲ୍କୁ ଯାଇଥିଲେ। ଘଟଣାର କିଛି ସମୟ ପୂର୍ବରୁ ଅଭିଯୁକ୍ତ ମେଜର ନିଖିଲ୍ ହାଣ୍ଡା ତାଙ୍କ ସରକାରୀ ଗାଡ଼ିରେ ହସ୍ପିଟାଲ୍କୁ ଆସିଥିଲେ। ସେଠାରେ ତାଙ୍କୁ ଛାଡ଼ି ଡ୍ରାଇଭର ଚାଲି ଯାଇଥିଲା। କିଛି ସମୟ ପରେ ରାସ୍ତା କଡ଼ାରେ ଜଣେ ମହିଳାଙ୍କ ଶବ ପଡ଼ିଥିବା ପୁଲିସ୍କୁ ସୂଚନା ମିଳିଥିଲା। ମହିଳାଙ୍କ ବେକକୁ ଧାରୁଆ ଅସ୍ତ୍ରରେ କଟାଯାଇଥିବା ଦେଖାଯାଇଛି। ଦୁଇ ମାସ ପୂର୍ବରୁ ନିଖିଲ ଓ ସମ୍ପୃକ୍ତ ମହିଳାଙ୍କ ପରିଚୟ ହୋଇଥିବା ଜଣାପଡ଼ିଛି।
