ଲଣ୍ଡନ : ବିଶ୍ଵପାଇଁ ବିପଦ ସୃଷ୍ଟି କରିଛି ଆଉ ଏକ ନୂତନ ରୋଗ । ଏହି ରୋଗରେ କେବଳ ଶିଶୁମାନେ ଆକ୍ରାନ୍ତ ହେଉଥିବା ଦେଖିବାକୁ ମିଳୁଛି । ଯାହାକୁ ଦେଖି ଡାକ୍ତରମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି । ମହାମାରୀ କରୋନା ଭୂତାଣୁ ବିସ୍ତାର ଏପର୍ଯ୍ୟନ୍ତ ଶେଷ ହୋଇନଥିବା ବେଳେ ଆଉ ଏକ ନୂଆ ରୋଗର ସୃଷ୍ଟି ଅନେକ ଦେଶ ପାଇଁ ଚିନ୍ତା ଜନକ ପରିସ୍ଥିତି ସୃଷ୍ଟି କରିଛି । ଆମେରିକା ଏବଂ ୟୁରୋପୀୟ ଦେଶ ମାନଙ୍କରେ ଏହି ରୋଗ ଦେଖାଦେଇଛି । ଏହି ରୋଗରେ ବ୍ରିଟେନରେ ଜଣେ ଶିଶୁର ମୃତ୍ୟୁ ଘଟିବା ପରେ ଚିକିତ୍ସାଜଗତ ପାଇଁ ଆତଙ୍କର ବାତାବରଣ ସୃଷ୍ଟି କରିଛି । ଏହି ରୋଗର ନାମ ପିଡିଆଟ୍ରିକ ମଲ୍ଟି ସିଷ୍ଟ୍ରମ ଇନଫ୍ଲାମେଟୋରୀ ସିଣ୍ଡ୍ରୋମ କୁହାଯାଉଛି । ଏହି ରୋଗକୁ କୋଭିଡ-୧୯ ସହ ସଂଯୋଗ କରି ଦେଖାଯାଉଛି ।ବ୍ରିଟେନରେ ବର୍ତ୍ତମାନ ଏହି ରୋଗରେ ୬୪ ଜଣ ଶିଶୁ ଓ କିଶୋର ସଂଘର୍ଷ କରୁଥିବା ଦେଖାଯାଇଛି ।
କଣ ରହିଛି ଏହି ରୋଗର ଲକ୍ଷଣ
- ଅନୁସନ୍ଧାନକାରୀମାନେ କହିଛନ୍ତି ଯେ ଏହି ରୋଗ ହେଲେ ଅନେକ ଦିନ ଧରି ପିଲାମାନଙ୍କୁ ଜ୍ଵର ହୋଇଥାଏ
- ପେଟରେ ଯନ୍ତ୍ରଣା ହୁଏ ଏବଂ ବାନ୍ତି ହୁଏ
- ଶରୀର ଏବଂ ମୁଣ୍ଡ ବିନ୍ଧା ହୁଏ
- ତରଳ ଝାଡା ହୋଇଥାଏ
- ନିମ୍ନ ରକ୍ତଚାପ ଏବଂ ଭୀଷଣ ଜ୍ଵର ହୋଇଥାଏ
ହାର୍ଭାର୍ଡ ମେଡିକାଲ ସ୍କୁଲର ପ୍ରଫେସର ଜେନ ନେଉବର୍ଗ କହିଛନ୍ତି ଯେ ବର୍ତ୍ତମାନ ଏହି ରୋଗରେ ପୀଡିତଙ୍କ ସଂଖ୍ୟା କମ୍ ରହିଛି କିନ୍ତୁ ଏହି ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି । ଡାକ୍ତର ଏବଂ ବୈଜ୍ଞାନିକମାନେ ବର୍ତ୍ତମାନ ଏହି ରୋଗ ବିଷୟରେ ଅଧିକ ଜାଣିବା ପାଇଁ ଚେଷ୍ଟା କରୁଛନ୍ତି । କଣ ପାଇଁ ଏହି ରୋଗ କେବଳ ଶିଶୁ ମାନଙ୍କୁ ହେଉଛି ତାହା ଜାଣିବାକୁ ପ୍ରୟାସ ଜାରି ରହିଛି । ବ୍ରିଟେନର ଶିଶୁ ହସ୍ପିଟାଲର ଡାକ୍ତର ସଚିନ ଓଲିରି କହିଛନ୍ତି ଯେ ଯଦି ଶିଶୁ ଅସୁସ୍ଥ ଦେଖାଯାଏ ତେବେ ଡାକ୍ତରଙ୍କୁ ଦେଖାନ୍ତୁ । ନିମ୍ନ ରକ୍ତଚାପ ଏବଂ ଉଚ୍ଚ ଜ୍ଵର ସହିତ କେତେକ ରୋଗୀଙ୍କ ଅବସ୍ଥା ଅତି ଗୁରୁତର ହୋଇଯାଉଥିବା ଦେଖାଯାଉଛି । ଗୁରୁତର ହେଉଥିବା ଶିଶୁଙ୍କୁ ଇମ୍ୟୁନୋଗ୍ଲୋବିନ୍ ଦିଆଯାଉଛି ଯାହା ପ୍ରତିରକ୍ଷା ପ୍ରଣାଳୀରେ ଥିବା ଉତ୍ତେଜନାକୁ ହ୍ରାସ କରିବାରେ ସାହାଯ୍ୟ କରିଥାଏ । ସେମାନଙ୍କୁ ଷ୍ଟେରଏଡ ଏବଂ ସାଇଟୋକାଇନ୍ ବ୍ଲକର ମଧ୍ୟ ଦିଆଯାଉଥିବା କହିଛନ୍ତି ଡାକ୍ତର ସଚିନ ଓଲିରି ।
