ଭୁବନେଶ୍ୱର : ଓଡିଶାରେ ସାଧାରଣତଃ ପାର୍ବଣ ଋତୁରେ ଭଲ ଚଳଚ୍ଚିତ୍ର ମୁକ୍ତିଲାଭ କରିଥାଏ। ବିଶେଷକରି ରଜରେ ବଡ ବଜେଟ ସିନେମା ରିଲିଜ ହୋଇଥାଏ। ଓଡିଆ ଦର୍ଶକ ମଧ୍ୟ ଏହି ସମୟକୁ ଉତ୍କଣ୍ଠାର ସହ ଚାହିଁ ରହିଥାନ୍ତି। ପୂଜା ବଜାରକୁ ଦୃଷ୍ଟିରେ ରଖି ନିର୍ମାତାମାନେ ମଧ୍ୟ ଭଲ ସିନେମା ପ୍ରସ୍ତୁତ କରିଥାଆନ୍ତି। ଚଳିତବର୍ଷ ରଜ ବଜାରରେ ଦୁଇଟି ଓଡିଆ ଚଳଚ୍ଚିତ ପ୍ରେକ୍ଷାଳୟକୁ ଆସୁଛି। ଗୋଟିଏ ଚଳଚ୍ଚିତ୍ର ତରଙ୍ଗ ସିନେ ପ୍ରଡକ୍ସନର’ସୁନ୍ଦରଗଡର ସଲମନ ଖାନ୍’ ହୋଇଥିବାବେଳେ ଅନ୍ୟଟି ପରିଜା ପ୍ରଡକ୍ସନ, ପ୍ରକାଶ ଫିଲ୍ମସ୍ ଓ ଜୀ ସାର୍ଥକର ‘୪-ଇଡିଅଟ୍ସ ‘। ଦୁଇଟିଯାକ ଚଳଚ୍ଚିତ୍ର ହାସ୍ୟରସରେ ଭରପୁର ଏବଂ ରୋମାଣ୍ଟିକ କାହାଣୀକୁ ନେଇ ନିର୍ମିତ ହୋଇଛି।
ତରଙ୍ଗ ସିନେ ପ୍ରଡକ୍ସନରେ ନିର୍ମିତ ସୁନ୍ଦରଗଡର ସଲମନ ଖାନ ଚଳଚ୍ଚିତ୍ରରେ ମୁଖ୍ୟ ଭୂମିକାରେ ନଜର ଆସିବେ ଓଲିଉଡ ଜଗତର ଚକଲେଟ ବୟ ବାବୁସାନ ଓ ନାୟିକା ଦିବ୍ୟା। ଅଭିନେତା ବାବୁସାନ ଉଭୟ ହିନ୍ଦୁ ପୂଜାରୀ ଓ ମୁସଲମାନ ଫକିର ଭାବରେ ଅଭିନୟ କରୁଛନ୍ତି।। ‘ସୁନ୍ଦରଗଡର ସଲମନ ଖାନ’ରେ ନିର୍ଦେଶନା ଦେଉଛନ୍ତି ଅଶୋକ ପତି, ସ୍ୱର ସଂଯୋଜନା କରିଛନ୍ତି ଅଭିଜିତ ମଜୁମଦାର।
ସେହିପରି ବସନ୍ତ ସାହୁଙ୍କ ନିର୍ଦେଶନାରେ ନିର୍ମିତ ୪ ଇଡିଅଟ୍ସ ଚଳଚ୍ଚିତ୍ରରେ ମୁଖ୍ୟ ଭୂମିକାରେ ନଜର ଆସିବେ ଅଭିନେତା ସବ୍ୟସାଚୀ ଓ ଏଲିନା ରହିଛନ୍ତି। ଏହା ବ୍ୟତୀତ ଆକାଶ, କୁନା ତ୍ରିପାଠୀ, ଚିତ୍ତ ତ୍ରିପାଠୀ, ପୁନମ, ଲିପ୍ସା, ଗୁଡୁ, ଚାନ୍ଦିନୀ, ନୀହାରିକା, ସମରେଶ, କେକେ ଆଦି କଳାକାର ଅଭିନୟ କରିଛନ୍ତି।
ଦୁଇଟି ଯାକ ଚଳଚ୍ଚିତ୍ରର ସଙ୍ଗୀତ ବେଶ ଭଲ ରହିଥିବାରୁ ଏହା ସବୁ ବର୍ଗର ଲୋକଙ୍କୁ ପ୍ରଭାବିତ କରିବ ବୋଲି ଚଳଚ୍ଚିତ୍ର ସମିକ୍ଷକ କହିଛନ୍ତି। ଦୁଇଟି ଚଳଚ୍ଚିତ୍ର ଦର୍ଶକଙ୍କୁ ବେଶ ଆନନ୍ଦୀତ କରିବ ବୋଲି ସମସ୍ତଙ୍କ ଆଶା ରହିଛି।
