ନୂଆଦିଲ୍ଲୀ: ସାରା ବିଶ୍ବରେ ମହାମାରୀର ରୂପ ନେଇଥିବା କରୋନା ଭାରତରେ ନିଜ କାୟା ବିସ୍ତାର କରି ଚାଲିଛି। ଦିଲ୍ଲୀରେ ବୃଦ୍ଧି ପାଉଥିବା ଆକ୍ରାନ୍ତଙ୍କ ସଂଖ୍ୟାକୁ ଦୃଷ୍ଟିରେ ରଖି ଗୁରୁବାର ଦିଲ୍ଲୀ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ଦିଲ୍ଲୀର ପରୀକ୍ଷା ଚାଲିଥିବା କେତୋଟି ସ୍କୁଲ, କଲେଜକୁ ବାଦ୍ ଦେଇ ଅନ୍ୟ ସମସ୍ତ ସ୍କୁଲ, କଲେଜକୁ ୩୧ ତାରିଖ ଯାଏ ବନ୍ଦ କରିବା ପରେ ଏବେ ସିନେମା ହଲଗୁଡ଼ିକ ମଧ୍ୟ ୩୧ ତାରିଖ ପର୍ୟ୍ୟନ୍ତ ବନ୍ଦ ରହିବ ବୋଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି। ଉପରାଜ୍ୟପାଳଙ୍କ ସହ ଆଲୋଚନା ପରେ ମୁଖ୍ୟମନ୍ତ୍ରୀ ଏହି ଘୋଷଣା କରିଛନ୍ତି। କରୋନାର ମୁକାବିଲା ପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନ ସବୁ ଦେଶକୁ ପରାମର୍ଶ ଦେଇଛି। ପରାମର୍ଶ ଅନୁଯାୟୀ, ଗୋଟିଏ ସ୍ଥାନରେ ଶତାଧିକ ଲୋକଙ୍କୁ ସମବେତ ହେବାକୁ ବାରଣ କରାଯାଇଛି। ଏହାକୁ ଦୃଷ୍ଟିରେ ରଖି ଦିଲ୍ଲୀ ସରକାର ଏଭଳି ଘୋଷଣା କରିଛନ୍ତି।
ଏହି ଘୋଷଣା କରି କେଜ୍ରିୱାଲ କହିଛନ୍ତି, କରୋନାକୁ ନେଇ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ଏହା ସହ ଲଢିବାକୁ ଦିଲ୍ଲୀରେ ପର୍ୟ୍ୟାପ୍ତ ବ୍ୟବସ୍ଥା କରାଯାଇଛି। ଏମ୍ସ ଏବଂ ଅନ୍ୟ ଏକ ହସ୍ପିଟାଲରେ କରୋନା ପରୀକ୍ଷଣର ବ୍ୟବସ୍ଥା କରାଯାଇଛି। ଏହା ବ୍ୟତୀତ ଆକ୍ରାନ୍ତମାନଙ୍କ ପର୍ୟ୍ୟବେକ୍ଷଣ ଓ ତାଙ୍କ ଦେଖାଶୁଣା ପାଇଁ ପ୍ରାୟ ୨୫ଟି ସ୍ଥାନରେ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଯଦି ଆବଶ୍ୟକ ପଡ଼େ ଏନେଇ ଆହୁରି ଅଧିକ ପଦକ୍ଷେପ ଗ୍ରହଣ କରାଯିବ ବୋଲି କେଜ୍ରିୱାଲ କହିଛନ୍ତି।
