କଳାପଥର : ବୈଦ୍ୟେଶ୍ୱର ଥାନା ଅନ୍ତର୍ଗତ ବାଘମାରି -କଣ୍ଟିଲୋ ରାଜ୍ୟ ରାଜପଥର କଳାପଥର ବଜାର ମସଜିଦ ନିକଟରେ ମଙ୍ଗଳବାର ସକାଳ ୫ଟା ୪୫ ରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ବାଙ୍କୀ ବ୍ଳକ ରଗଡି ଗ୍ରାମରୁ ବୋଲଗଡ ବ୍ଳକ ହଳଦିପଦା ଗ୍ରାମକୁ ବାଇକରେ ଯାଉଥିବା ବେଳେ ଜଣେ ଯୁବତୀ ଙ୍କ ଉପରେ ଏକ ଦୃତଗାମୀ ସିମେଣ୍ଟବୋଝେଇ ଟ୍ରକ ଚଢିଯିବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଛି।
ମୃତ ଯୁବତୀ ଜଣଙ୍କ ଦୀପା ପ୍ରଧାନ (୧୮ ବର୍ଷ) । ତାଙ୍କର ବାହାଘର ଆଉ ୧୫ ଦିନ ଥିବା ବେଳେ ସେ ମାମୁଁ ଘର ରଗଡିକୁ ତେରାଣି ପିଆ ପାଇଁ ଯାଇଥିଲେ। ତାଙ୍କ ସହିତ ବିବାହ ଠିକ୍ ହୋଇଥିବା ଯୁବକ ବି ଆସିଥିଲେ । ଏକ ଏଚ ଏଫ ଡିଲକ୍ସ ବାଇକ ନଂ ଓଡି-୦୫-ଡବ୍ଳୁ ୭୪୫୯ ଗାଡିରେ ଭାବି ସ୍ୱାମୀଙ୍କ ସହିତ ମାଇଁ ମିଶି ତିନି ଜଣ ବାପଘର ହଳଦିପଦା ଯାଉଥିଲେ। ଟ୍ରକର ବାମପଟେ ଓଭର ଟେକ କଲାବେଳେ କଳାପଥର ବଜାରରେ ମଝିରେ ବସିଥିବା ଯୁବତୀଙ୍କ ଓଡଣୀ ଟ୍ରକରେ ଲାଗି ଯିବାରୁ ସେ ଛିଟିକି ପଡି ଯାଇଥିଲେ। ଫଳରେ ଟ୍ରକର ପଛଚକା ତାଙ୍କ ମୁଣ୍ଡରେ ଚଢି ଯିବାରୁ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଛି। ଟ୍ରକ ଚାଳକ ଧର୍ମେନ୍ଦ୍ର ପ୍ରଧାନକୁ କଳାପଥର ଗ୍ରାମବାସୀ ଅଟକ ରଖି ବୈଦ୍ୟେଶ୍ୱର ପୁଲିସ ଜିମା ଦେଇଛନ୍ତି । ଓଆର -୧୫-ଏ-୩୦୯୫ ଗାଡିକୁ ପୁଲିସ ଜବତ କରିଛି। ଉକ୍ତ ଟ୍ରକରେ ନମ୍ବର ପ୍ଳେଟ ଦୁଇଟି ଥିବା ବେଳେ ଗାଡିର କାଗଜ ପତ୍ର ଠିକ ନଥିବା ସନ୍ଦେହ କରାଯାଉଛି।