ବାଗଦାଦ: ଇରାକ୍ର ବାଗଦାଦ ବିମାନବନ୍ଦରରେ ଆମେରିକା ପକ୍ଷରୁ ଶୁକ୍ରବାର ସକାଳେ ହୋଇଥିବା ଡ୍ରୋନ୍ ଆକ୍ରମଣରେ ଇରାନ୍ର ବାହୁବଳୀ ଭାବେ ପରିଚିତ ଇରାନ ରିଭୋଲ୍ୟୁଶନାରୀ ଗାର୍ଡ୍ସ ଫୋର୍ସ କମାଣ୍ଡର କାସିମ୍ ସୁଲେମାନି ନିହତ ହୋଇଛନ୍ତି। ଏହି ଆକ୍ରମଣରେ ୮ ଜଣଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ଆମେରିକା ଏବଂ ଇରାନ୍ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଇରାନ ଆମେରିକାକୁ କଡ଼ା ଚେତାବନୀ ଦେବା ସହିତ ଏଥିପାଇଁ ବହୁମୂଲ୍ୟ ଦେବାକୁ ପଡ଼ିବ ବୋଲି ଶୁକ୍ରବାର ଧମକ ଦେଇଛି।
ଏହି ଡ୍ରୋନ ଆକ୍ରମଣ ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିର୍ଦେଶ ଦେଇଥିଲେ ବୋଲି ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ବିଦେଶରେ ଆମେରିକୀୟମାନଙ୍କ ସୁରକ୍ଷା ଲାଗି କାର୍ଯ୍ୟାନୁଷ୍ଠାନ ସ୍ବରୂପ ଇରାନର ସୁଲେମାନିକୁ ହତ୍ୟା କରିବାକୁ ଟ୍ରମ୍ପ ଆଦେଶ ଦେଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସିରିୟା, ଲେବାନନ, ଜର୍ମାନୀ ଏବଂ ଭାରତରେ ବିଦେଶୀ ନେତାମାନଙ୍କୁ ହତ୍ୟା ଏବଂ ସେମାନଙ୍କ ଉପରେ ହେଉଥିବା ଆକ୍ରମଣ ପାଇଁ ଆମେରିକା ସୁଲେମାନିଙ୍କୁ ଦାୟୀ କରିଆସୁଥିଲା।
ସୁଲେମାନିର ମୃତ୍ୟୁ ପରେ ଇରାନ ବିଦେଶ ମନ୍ତ୍ରୀ ଜାଭେଦ ଜରିଫ ଆମେରିକା ଉପରେ ଆକ୍ରମଣାତ୍ମକ ଢଙ୍ଗରେ ଚେତାବନୀ ଦେଇଛନ୍ତି। ଏହି ଆକ୍ରମଣକୁ ଜରିଫ ମୁର୍ଖତାପୂର୍ଣ୍ଣ ବୋଲି କହିଛନ୍ତି। ସେ ଟ୍ବିଟ୍ କରି କହିଛନ୍ତି, ସୁଲେମାନିଙ୍କୁ ହତ୍ୟା କରାଯିବା ମୁର୍ଖାମୀର ପରିଚୟ। ଏହାକୁ ସେ ଅନ୍ତର୍ଜାତୀୟ ଆତଙ୍କବାଦ ବୋଲି ଦର୍ଶାଇଛନ୍ତି। ତାଙ୍କ ସୈନ୍ୟ ଆଇଏସ, ଅଲନୁସରାହ, ଅଲ୍କାଏଦା ଆଟ୍ ଅଲ୍ ଭଳି ଆତଙ୍କୀ ସଂଗଠନ ବିରୋଧରେ ଲଢ଼ୁଥିଲେ। ଆମେରିକାକୁ ନିଜର ଏଭଳି ଦୁଃସାହସ ପାଇଁ ବହୁମୂଲ୍ୟ ଦେବାକୁ ପଡ଼ିବ।
