ନୂଆଦିଲ୍ଲୀ,୨୨ା୧୧: ଗାନ୍ଧୀ ପରିବାରଠାରୁ ଏସପିଜି ସୁରକ୍ଷା ପ୍ରତ୍ୟାହାରକୁ ନେଇ କଂଗ୍ରେସ ହଟ୍ଟଗୋଳ କରୁଥିବା ବେଳେ କେନ୍ଦ୍ର ସରକାର ଆସନ୍ତା ସପ୍ତାହରେ ସଂସଦରେ ଏସପିଜି ସଂଶୋଧିତ ବିଧେୟକ ଆଗତ କରିବାକୁ ପ୍ରସ୍ତୁତି ଚଳାଇଛନ୍ତି। ପ୍ରସ୍ତାବିତ ସଂଶୋଧନ ବିଧେୟକ ଅନୁସାରେ ପୂର୍ବତନ ପ୍ରଧାନମନ୍ତ୍ରୀଙ୍କ ପରିବାର ବର୍ଗ ଏସପିଜି ସୁରକ୍ଷା ହରାଇବେ। ଏହି ସୁରକ୍ଷା ବ୍ୟବସ୍ଥା କେବଳ ଦାୟିତ୍ବରେ ଥିବା ପ୍ରଧାନମନ୍ତ୍ରୀମାନେ ପାଇବେ। ଏହି ବିଧେୟକକୁ କେନ୍ଦ୍ର କ୍ୟାବିନେଟ ବୁଧବାର ମଞ୍ଜୁରୀ ପ୍ରଦାନ କରିଛି। ୧୯୯୧ ମେ’ ୨୧ରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟା ପରେ ବିଗତ ୨୮ ବର୍ଷ ଧରି ତାଙ୍କ ପତ୍ନୀ ତଥା କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ, ପୁଅ ରାହୁଲ ଗାନ୍ଧୀ ଏବଂ ଝିଅ ପ୍ରିୟଙ୍କା ଗାନ୍ଧୀଙ୍କୁ ଏସପିଜି ସୁରକ୍ଷା ପ୍ରଦାନ କରାଯାଇଆସୁଥିଲା। କେନ୍ଦ୍ର ସରକାର ଏବେ ଏହି ଏସପିଜ ସୁରକ୍ଷା ବ୍ୟବସ୍ଥାକୁ ପ୍ରତ୍ୟାହାର କରିନେଇଛନ୍ତି। ଏହା ପଛରେ ରାଜନୈତିକ ଉଦ୍ଦେଶ୍ୟ ନିହିତ ଏବଂ ଏହା ଦ୍ବାରା ସୋନିଆ, ରାହୁଲ ଓ ପ୍ରିୟଙ୍କାଙ୍କ ଜୀବନ ବିପଦକୁ ଠେଲି ଦିଆଯାଇଛି ବୋଲି କଂଗ୍ରେସ ଅଭିଯୋଗ କରିଛି। ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କଠାରୁ ମଧ୍ୟ ଏହି ସୁରକ୍ଷା ବ୍ୟବସ୍ଥା ପ୍ରତ୍ୟାହାର କରାଯାଇଛି।
Comments are closed.