ସମ୍ବଲପୁର (ସିଟି) : ସମ୍ବଲପୁର ପୁଲିସ ପକ୍ଷରୁ ମଙ୍ଗଳବାର ଦିନ ଛୋଟ ଛୋଟ ଅପରାଧରେ ସଂପୃକ୍ତ ଥିବା ଯୁବକ ମାନଙ୍କୁ ଧନ୍ଦାମୂଳକ ତାଲିମ ଦେଇ ମୁଖ୍ୟଧାରାରେ ସାମିଲ କରିବା ପାଇଁ ଏକ ନୁତନ ପ୍ରୟାସ ‘ନୁଆ ଦିଗ’ ନାମକ ଯୋଜନାର ଆରମ୍ଭ କରାଯାଇଛି। ତାଲିମ ପରେ ଏହି ଯୁବକମାନେ ରୋଜଗାରକ୍ଷମ ହେବେ ଏବଂ ଏଥି ଯୋଗୁଁ ସେମାନେ ଆଉ ଅପରାଧ କରିବାକୁ ମନ ବଳାଇବେ ନାହିଁ। ଏହା ଦ୍ୱାରା ଜିଲା ଓ ରାଜ୍ୟ ଅପରାଧ ମୁକ୍ତ ହୋଇପାରିବ। ସ୍ଥାନୀୟ ସମ୍ବଲପୁର ଜିଲା ପୁଲିସ ରିଜର୍ଭ ଲାଇନ ଠାରେ ଥିବା ଗୋଷ୍ଠୀ କେନ୍ଦ୍ରରେ ଆୟୋଜିତ ଏହି ଯୋଜନାର ଉଦଘାଟନୀ ଉତ୍ସବରେ ଉତ୍ତରାଞ୍ଚଳ ଡିଆଇଜି ସତ୍ୟବ୍ରତ ଭୋଇ ମୁଖ୍ୟ ଅତିଥି, ସମ୍ବଲପୁର ଜିଲାପାଳ ସମର୍ଥ ବର୍ମା, ଓଡିଶା ସ୍କିଲ ଡେଭଲପ୍ମେଣ୍ଟ ଅଥରିଟିର ଆଞ୍ଚଳିକ ନିର୍ଦ୍ଦେଶକ ଏନ କେ ଦାସ ସମ୍ମାନୀତ ଅତିଥି ରୁପେ ଯୋଗ ଦେଇଥିଲେ। ପ୍ରଥମ ଥର ପାଇଁ ଅପରାଧ କରିଥିବା ଅପରାଧିଙ୍କୁ କିପରି ସମାଜର ମୁଖ୍ୟ ସ୍ରୋତକୁ ଆଣି ହେବ ଏଥିପାଇଁ ଏହା ଏକ ପ୍ରୟାସ ବୋଲି ଡିଆଇଜି ଭୋଇ କହିଥିଲେ।,
ସୂଚନାଯୋଗ୍ୟ, ଅପରାଧିକ କାର୍ଯ୍ୟକଳାପରେ ସଂପୃକ୍ତ ଥିବା ଯୁବକଙ୍କୁ ନୂତନ ଦିଗ ଦେଖାଇ ରୋଜଗାରକ୍ଷମ କରି ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ଏଥିରେ ଜିଲା ପୁଲିସ ସମ୍ବଲପୁର ସହରରେ ଥିବା ୪ଟି ଥାନାକୁ ସାମିଲ କରାଯାଇଛି। ଓଡିଶା ସ୍କିଲ ଡେଭଲପ୍ମେଣ୍ଟ ଅଥୋରିଟି ପକ୍ଷରୁ କାଉନସେଲିଙ୍ଗ ପରେ ପ୍ରଥମ ପର୍ଯ୍ୟାୟରେ ୫୨ ଜଣଙ୍କୁ ଚୟନ କରାଯାଇ ଏହି ଯୋଜନାରେ ସାମିଲ କରାଯାଇଛି। ଏହି ଯୋଜନାରେ ଅଇଁଠାପାଲି ଥାନାର ୧୦ଜଣ, ଧନୁପାଲି ଥାନାର ୯ଜଣ, ଟାଉନ ଥାନାର ୧୪ଜଣ ଓ କ୍ଷେତରାଜପୁର ଥାନାର ୧୯ଜଣ ଛୋଟ ଛୋଟ ଅପରାଧରେ ସଂପୃକ୍ତ ଥିବା ଅପରାଧିଙ୍କୁ ବିଭିନ୍ନ ଟ୍ରେଡରେ ତାଲିମ ଦିଆଯିବ। ମୋଟ ୩୭ଟି ଟ୍ରେଡ ଥିବାବେଳେ ଏହି ଯୁବକମାନେ ୮ଟି ଟ୍ରେଡକୁ ବାଛିଛନ୍ତି। ଓଡିଶା ସ୍କିଲ ଡେଭଲପ୍ମେଣ୍ଟ ଅଥୋରିଟି ପକ୍ଷରୁ ୩ମାସର ସମୟ ବିଶିଷ୍ଟ ତାଲିମ କାର୍ଯ୍ୟକ୍ରମ ପରେ ସେମାନଙ୍କୁ ଚାକିରି ଦେବାର ବ୍ୟବସ୍ଥା କରାଯିବ। ଏହା ସମ୍ବଲପୁରରେ ପ୍ରଥମ ଥର ପାଇଁ ଆରମ୍ଭ ହୋଇଛି ।
