ନରସିଂହପୁର: ହାତୀ ଆକ୍ରମଣରେ ଜଣେ ୫୫ ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତକ ଜଣକ ବଡ଼ମ୍ବା ବ୍ଲକ୍ ଖଇରିପାଙ୍ଗା ଗ୍ରାମର ବିନୋଦ ବରଡ଼ା ବୋଲି ଜଣାପଡ଼ିଛି। ସ୍ଥାନୀୟ ଲୋକଙ୍କ ସୂଚନା ଅନୁଯାୟୀ, ବିନୋଦ ଆଜି ସକାଳେ ତିନିଜଣ ସାଥୀଙ୍କ ସହିତ ବିଲକୁ ଯାଇଥିବା ବେଳେ ହାତୀ ମୁହଁରେ ପଡ଼ିଥିଲେ। ଅନ୍ୟ ତିନିଜଣ କୌଣସିମତେ ଖସି ଆସିଥିବା ବେଳେ ହାତୀଟି ବିନୋଦଙ୍କୁ ଦଳି ଦେଇଥିଲା। ଘଟଣାସ୍ଥଳରେ ହିଁ ବିନୋଦଙ୍କ ମୃତ୍ୟୁ ଘଟିଥିଲା। ବାରମ୍ବାର ଏଭଳି ଘଟଣା ଘଟୁଥିଲେ ମଧ୍ୟ ହାତୀ ଉପଦ୍ରବ ନିୟନ୍ତ୍ରଣ ପାଇଁ ବନ ବିଭାଗ କୌଣସି ପଦକ୍ଷେପ ନେଉ ନଥିବାରୁ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା। ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ଘଟଣାସ୍ଥଳକୁ ଆସିଥିବା ବନ କର୍ମଚାରୀଙ୍କୁ ଗାଁ ଲୋକେ ଘେରାଉ କରିଥିଲେ।
