ପିପିଲି: ଗଣେଶ ମେଢ ଭସାଣୀ ଶୋଭାଯାତ୍ରା ବେଳେ ପିପିଲି ଆଇଆଇସି ଶରତ କୁମାର ସାହୁଙ୍କ ସମେତ ଅନ୍ୟ ପୁଲିସ କର୍ମଚାରୀଙ୍କୁ କେତେକ ମଦ୍ୟପ ଯୁବକ ଦୁର୍ବ୍ୟବହାର କରିଥିବା ସୂଚନା ମିଳିଛି। ସାତଶଙ୍ଖ ବଜାରରେ ଶୁକ୍ରବାର ଅପରାହ୍ନରେ ଏହି ଘଟଣା ଘଟିଥିବା ବେଳେ ପୁଲିସ ଜଣେ ଗଣ୍ଡଗୋଳକାରୀ ଯୁବକକୁ ଥାନାରେ ଅଟକ ରଖିଛି।
ପ୍ରାପ୍ତ ସୂଚନା ଅନୁସାରେ, ନିକଟବର୍ତ୍ତି ଏକ ଗ୍ରାମର ଗଣେଶ ମେଢ ଭସାଣୀ ଶୋଭାଯାତ୍ରା ଶୁକ୍ରାବାର ସାତଶଙ୍ଖ ବଜାର ଅତିକ୍ରମ କରୁଥିବା ବେଳେ ଏହି ଘଟଣା ଘଟିଥିଲା। ଭସାଣୀ ଶୋଭାଯାତ୍ରାରେ ବେଆଇନ ଭାବେ ଡିଜେ ବଜାଇ କେତେକ ମଦ୍ୟପ ଯୁବକ ରାସ୍ତାକୁ ଅବରୋଧ କରି ନାଚ କରୁଥିବାରୁ ଗୁରୁତର ଟ୍ରାଫିକ୍ ସମସ୍ୟା ଉପୁଜିଥିଲା। ଏହି ସମୟରେ ପିପିଲି ଆଇଆଇସି ଶରତ କୁମାର ସାହୁ ପୁରୀରୁ ପିପିଲିକୁ ଫେରୁଥିଲେ। ଶ୍ରୀସାହୁ ସେଠାରେ ଅଟକି ଶାନ୍ତିଶୃଙ୍ଖଳାର ସହ ଟ୍ରାଫିକ୍ ଜାମ୍ ନକରି ଶୋଭାଯାତ୍ରା କରିବାକୁ ଶୋଭାଯାତ୍ରାକାରୀ ଯୁବକମାନଙ୍କୁ ବୁଝାଇଥିଲେ। ତେବେ ପ୍ରଚୁର ମଦ୍ୟପାନ କରିଥିବା କେତେକ ଯୁବକ ପୁଲିସକୁ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ। ଆଇଆଇସି ଶ୍ରୀସାହୁଙ୍କୁ ମଧ୍ୟ ସେମାନେ ଦୁର୍ବ୍ୟବହାର କରିଥିଲେ। ପୁଲିସ ଭ୍ୟାନ୍ର ଡ୍ରାଇଭରକୁ ସେମାନେ ଗାଳିଗୁଲଚ କରିବା ସହ ଠେଲାପେଲା କରିଥିବା ସୂଚନା ମିଳିଛି। ଏହି ଘଟଣାରେ ପୁଲିସ ଗଣ୍ଡଗୋଳକାରୀ ଯୁବକଙ୍କ ମଧ୍ୟରୁ ଜଣକୁ ଥାନାରେ ଅଟକ ରଖିଛି। ଏନେଇ ପୁଲିସରେ ଏକ ମାମଲା ରୁଜୁ ହୋଇଥିବା ଓ ଅନ୍ୟ ଗଣ୍ଡଗୋଳକାରୀ ଯୁବକଙ୍କୁ ଗିରଫ କରିବାକୁ ପୁଲିସ ଉଦ୍ୟମ ଚଳାଇଥିବା ସମ୍ପର୍କରେ ଆଇଆଇସି ଶ୍ରୀସାହୁ ସୂଚନା ଦେଇଛନ୍ତି।
